Isaiah 2
2
Tsi Niahawenonhátie Ne Raonónsa Ne Ní꞉io
1Né꞉ne raowénhna nètho Isaiah ne roiénha ne Amoz tsi nahatkato tsi no꞉kwáh ne Judah tánon ne Jerusalem.
2Tsi niwenhniseraténions tsi nienkáheʼwe
ne tsi rotenonhtáhere ne Roiá꞉ner tsi nón꞉we nikanónshote ne raoʼnonsatokentiʼkówa
ne ahonhá꞉ʼa entsotenontáteske tsi níkon ionontarónhnions.
Akahontsakwékon thóh nón꞉we iatonhonskénhni nienhonhnéthaʼke.
3Iakotsokowánenh éntsien tánon enhiaiéron,
“Káts, áhnion thóh ietewanontáran tsi rotenontáhere ne Roiá꞉ner,
ietewatáwehiat ne raononsatokentiʼkowáne ne raoní꞉io Jacob;
ne nahónton nashonkwahrihónhnien tsi nihaweienótens
tánon nahónton thóh nón꞉we nahitewaténhti tsi rohatátie.”
Asèken Zion nón꞉we entkaiákenhne ne enkahénte ne karihonhnienhnítshera,
tánon ne raowénhna ne Roiá꞉ner Jerusalem ne nón꞉we nénhtewe.
4Kwáh tensakohiatórehte tsi natehónteres nonhkweʼó꞉kons,
tánon ensakoteriwaʼshónterase ne iakotsokowáhnen ónkwe;
ne rahonasarekówa ne sahonónhniate ne ietarakarahthóstha otsiiewéiontha,
tánon ne raotishiʼkwáhras iontkwiraseronhniátah ne ohnió꞉kwas sahonnónhniaʼte;
nonkweʼó꞉kons iáh shé꞉kon nonhwénhton tahonshahionterí꞉io,
iáh ó꞉ni nonhwénton tahonshahatiweienʼtétonke nahonterihiosehrónhni.
Karihwenhtátshera Wahonwatirihowanáthen Ne Rontatkowanátha
5Ó tsi ronónshote ne Jacob,
káts, áhnion thóh tewathénhti
rahoswathetserákon ne Roiá꞉ner!
6Ó Ní꞉io sehiatewenhtéton ne shonkwetaʼshónha,
Ó tsi ronónshote ne Jacob.
Kwáh thiʼtatíhere nonkweʼó꞉kons tehontʼkónstas ne tsitkarakwínekens nithonhnétha
tánon tehontʼkónstha kwáh tsi ní꞉ioht ne Philistines,
tánon tehonatatenenhtsawáhkons ne tihononhontsátes.
7Ne raononhontsáke titʼkáhere ne kawistaráken tánon nowistanóron,
tánon iáh tshiehiótokte ne raʼonattsiokowátsheras;
ne raononhontsákes kosátens titʼtatíhere
tánon iah tshieiótokʼte tsi nihiawetowánens rotiseréthaiens notsiónkwahs.
8Ne raononhontsákes titʼkaiatonhniseráhere;
né konwasénhnaiens tsi nahó꞉tens ne rontsanákes ioshaʼhánion,
óni tsi nahó꞉tens ne ratisnonhsákes ioshahánion.
9Tánon káti ne rónhkwe kwáh kíʼ enhaniténhte,
tánon onhkwetakwékon ehʼtàke iakontónhon—
tó꞉sa kí sashenikónhrens, Saiá꞉ner!
10Wáhs thóh iasewatáseht tsi iostenhrakarón꞉tons
khéhs enhontashetánion ohontsàke
nahonteniénten nakonwatékwahse ne Roiá꞉ner raonhakwáhtshera
tánon nakonwatashé꞉ten ne raoshatsténhsera ó꞉ni ne raoiatanerakwáhtshera!
11Tsi tehakánere ne ratatkowánen rónkwe kwáh kíʼ ehtsioserónhnenhte,
tánon ne hionthatónhni onhkwetakwékon kwáh kíʼ entsionhnítenhte;
tánon rahonhatsíwa ne Roiá꞉ner enhatʼtsenhnakaráthate
nètho entewenhniseráte.
12Asèken ne Sakoiá꞉ner ne ronterí꞉os ratironhiakerónons tsi rawenhniserahrákwen
né sakokkónten ratikwékon ne iontatónhni tánon ne iakotatkowaná꞉ton
ensakokkónten tsi niháti ne iakotatʼtharatáton tánon aiesenhnowanénhke;
13kwáh ó꞉ni enhátonhte akwékon ne onenhtakwenhtátsheras ne Lebanon ionhteronhtonhniánion,
tánon akwékon enharontátonhte ne onentakwenhtétsheras tánon ne karontésons ne Lebanon;
tánon akwékon enharontátonhte ne karíhton ne Bashan;
14enhátonte ó꞉ni akwékon ne tsiotenontatónhnions;
tánon akwékon ne tiótʼtes ionhniarónhnions;
15enháton꞉te ne kanikatésons,
tánon akwékon ne tekanatanátʼtons wathenhenró꞉tons;
16kwáh ó꞉ni enhanónwahien iekaníhare ne kwáh tkahoniowá꞉nens ne Tarshish nón꞉we,
tánon ne kwáh tsioràse kahoniowánens.
17Ne iontatkowanátha onhkweʼó꞉kons kwáh kí ehʼtàke enshonwenhnónhni,
tánon tsi nihiontatónhni onhkwetakwékon kwáh kí ehʼtàke entiónhton;
tánon iatehahiáti ne Roiá꞉ner kwáh éhʼneken enhonhiónhni nètho enwenhniseráteke.
18Ne kahiatonhnisónhas kwáh akwékon tsi enhkariwatón꞉thonke.
19Enhontasehtánion ne tsi iosthenrakarónhtons
khéhs nahontasehtánion nohontsákes,
ne nakonwatékwase ne Roiá꞉ner raonhakwáhtshera
tánon raoshatstenhsera ó꞉ni ne raohiatanerakwáhtshera,
ne nó꞉nen thethaʼtáhne naronhtáwete tsi ionwenhtsá꞉te.
20Nètho enwenhniseráteke nonkweʼó꞉kons kwáh ne ienhonwanatiéten
notsiniónkaron tánon ne tsikerawístiks
ne raotiʼiatonhnisónhas ne kawistarákens ó꞉ni nowistanó꞉rons,
ronahtatsenhénhni né꞉ne akonwasenhnaiénseʼke,
21nonkweʼó꞉kons enhontasehtánion nostenrokónson
tánon ne tsi teionitstenrorénhseron; o꞉ni tsi ioshonwénion nonhontsáke,
ne nakonwatékwaʼse ne raonhakwáhtshera Roiá꞉ner,
tánon ne raoshatstensera oni raohiatanerakwáhtshera,
ne nó꞉nenh thethá꞉taʼne narontaweʼte tsi ionwenhtsá꞉te.
22Tonsashewatkaraténi tsi nón꞉we nihón꞉nes nonkweʼó꞉kons,
aséken ne ronónha nék khók tsi ronhnonhniseráhien tsi tehatiʼnionhkáronhte,
asèken tók néh satehón꞉nas ne ronhnón꞉ha?
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.