Isaiah 18
18
Ne Ne Aterihwaʼnotátsheras Aorihwàke Ne Ethiopia
1Áh, tsi ionhontsáien ne tewatenonhontʼtsaríkʼkons
iehiotohétston ne tsi kaniataratátie ne Ethiopia,
2iahonwanaténieʼte ne sakonatátsiaʼse wahonteniaʼtaríhtha ne Nile
ne ne ohshonwennitaʼkó꞉wa nahó꞉ten kahonwehionhniá꞉tons nahonktonwàrehke nonekakésons!
Wáhs, í꞉se né tesewáka sewarihwakarénies,
tsi thaʼtíterons ne ronhnonhontsaʼkerónons ne ne ratiʼnenhiésons tánon ratinhí꞉hios,
né꞉ne nonkweshónhas ronwatiʼtshánis aktatsesónhas tánon nahinónhsons nió꞉re ít꞉ken,
né꞉ne ratiʼtsowashátstes tánon sakotiʼsénhnies,
né꞉ne raononhóntsa ne tsi kaniataratátie tehiokhá꞉shion.
3Sewakwékon ne tsi ionwentsá꞉te sewanákere,
í꞉se ne ohontsàke sewanákere,
nó꞉nen enkaniatarakétskwen ne tsi iononhtáhere, sewatʼkátho!
Nó꞉nen ne iehonrawáts꞉tha enkonwatátiste, sewatahónsatat!
4Asèken ne aorihwàke ne Roiá꞉ner wahakénhase:
Kwáh kí sák thenkénhake tsi entkatkátho tsi nón꞉we tkí꞉teron
kwáh tsi ní꞉ioht tsi niwé꞉ne tsi nihiotaríhen tsi iorákote,
kwáh tsi ní꞉ioht iotshátare ne ioháweien tsi niʼhiotaríhen tsi nihieienhtwákwas.
5Asèken nohénton tsi niʼieientwákwas, ne nó꞉nen iotsitsentáhon
tánon ne iotsítsionte ienwahiáritste nonénhare,
kwáh kí enhahiá꞉khon ne tetsiorenhá꞉ron iontkwiʼriákstha énratsʼte,
tánon ne tehionenré꞉sons kwáh kí enhanhatóskare.
6Kwáh kí akwékon ne enhsakonénhrase
notsitohokónhas ne ronterhiothatórats ne tsi iononhtarónhnions
tánon kontikwékon ne kontiʼtshénens ne tsi ionhontsàte.
Tánon notsithenokónhas ne konteriothatórats thóh kí nón꞉we nenhkonhtiʼkenhníhiaʼke,
tánon kontikwékon ne kontitshénens thóh kí nón꞉we nenhkonhnoseríhiaʼke.
7Né thóh nenhkaháwiʼke nathatawítsheras kwáh kí entonhwahawítaʼse ne Sakoiá꞉ner ne ronterí꞉io ratiʼronhiakeró꞉nons né thoʼnatkháwen ne ratiʼnenhiéshons tánon ne ratinhí꞉ios, né nonkweshón꞉has ne ronhwatiʼtshánis aktónties tánon nahinónhsons nió꞉re ít꞉kens, ne nonkweshón꞉has ne ratiʼshátstes tánon sakotisénhnies, né꞉ne rahononhóntsas ne tsi kaniataratáse tehiotʼkháshion, ièhio ne tsi Ionontáhere ne Zion, né nón꞉we ne konwanatón꞉kwah ne Sakoiá꞉ner ne ronterí꞉io ratironhiakeró꞉nons.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.