Exodus 1
1
Ne Israerʼró꞉nons Wahonwanateniaʼkátsʼtase Ne Egypt Nón꞉we
1Né raoʼnekenteronʼtsherashóna ne Jacob né skátʼke niehonénon ne Egypt nónhwe, né sahtiwahtsirátʼtsions, né꞉ne 2Reuben, Simeon, Levi, Judah, 3Issachar, Zebulun, Benjamin, 4Dan, Naphtali, Gad, tánon Asher. 5Né tkhakwékton tsi niháti kí꞉ken onhkweshón꞉aʼs né꞉ne kwáh Jacob nónhwe nithonatwatsirínon tsáta niwáhsen nihatiʼhiatásen. Ne roʼiénha Só꞉se ó꞉nenk nènhneʼe Egypt nónhwe iéhres. 6Tsi niakáhewe ne Só꞉se, ne ronhtatekenʼhokónhas, tánon ne thóh kawátsire wahonhníheie, 7ók ne sakonahterehokónhas, né꞉ne lsraeró꞉nonhs, wéso wahotiʼwirahʼientàsehron tánon tsi nahonahtsiokowàhna tánon wahatiʼtsiokwahnírahne né Egypt nónhwe kwáh ronònhak khók thitahtírahkwe.
8Ethòne, Ononhtiiosehràse, kwáh iáh othé꞉nen tehoientérihkwe ne Só꞉se. 9Washakawénhase ne rahonkwetashón꞉ʼa, “Kí꞉ken lsraeró꞉nonhs tsi nihonahʼtsiokowáhnen tánon rotiʼtsiokwahníron iótʼteron nonhkwahriwàhke. 10Tó꞉ka enwaʼteriʼiosehrakétsko nonhtiérek né enthontènhroʼwe ne thetewahtátʼtsions ne nahonaʼtesenhnaʼién꞉tanʼe ahitewahtherí꞉io, tánon nonhtiérenk enshatiʼniáʼkenhne nonhkwaʼnakerahʼsehrákon. Ónenk tsi knahótenk entewaʼteniʼkonhrónhni onhnaiáwenhne ne tó꞉sa sénha ahonahtiokowáhna.” 11Káti ne Egyptró꞉nons né꞉ne ratiʼniakátstes waʼhonwaʼtiriʼhónten ne tashakoʼtishatsʼtenserhiàʼke Né꞉ne iohiotensehrahníron tsi ashaʼkotiʼiótensthe. Ne lsraeró꞉nonhs wahatiʼnahtonhniánion né꞉ne Pithom ó꞉ni ne Rameses né꞉ne tsi nónhwe nenhateweienthónsehke tsi nahoténsons tahothonwenhtsóniʼke ne Ronhnonhtí꞉io. 12Ók né sénha ne Egyptró꞉nons enhonwatiʼronhiákenhte ne lsraeró꞉nonhs, sénha kíʼ wahonahtsiokowáhnah tánon sénha tenhonwanahréniaʼte ne tsi ionhwénhtsaien. Ne Egyptró꞉nons wahonwatiʼtshá꞉nihke ne lsraeró꞉nonhs 13-14tánon wahonwanonhnáksate tsi tahonwaʼnahnónhtonʼse wahonwanahteniákatsʼtatse tsi wahonwatinaskónhni. Wahonwenhnónhnien nahotihióten nahoténsons kahiotenseráhien ne tsi rotinonhsóhtons tsi ní꞉iot ne tahatisténrote, ó꞉ni ne raotihentàkes, tánon iáh othé꞉nen tekàien ne tahonwanahró꞉ton.
15Ethòne ne Ronhnonhtíio ne Egypt waʼthatiʼtháren ne Shiphrah ó꞉ni ne Puah, né꞉ne tetiátsnie nenhiaʼkotiʼsnié꞉non ne Hebrew tsionatʼthonwísen nó꞉nen enhiotiʼwiraʼhiéntahne. 16“Nó꞉nen enʼietshiʼsniénon ne Hebrew tsionatʼthonwísen naʼiotiwiraiénʼtane,” wasakoró꞉ri, “Ietsiʼnonhwarhiákon nʼowirá꞉ʼa tó꞉ka roʼskenrahkèhte; ók tó꞉ka tsiakokʼthonwísen, iakónhnhek nènhneʼe.” 17Ók ne tsiaʼtsniénionhskwe Rawenni꞉io ronhwatʼtsánisʼkwe tánon káti iáh tehonwaʼwenhnaráhkwen ne Ronhnonhtí꞉io; khè꞉kok, wahonwatiʼríhon ne rahtiksaʼhokónhas nahoʼnónhnheke. 18Káti ne Ronhnonhtí꞉io iaʼshakónonhke ne tsiatsniénons tánon wahsakoriwahnónhtonhse, “Ónh niʼhiotiéren tsi kíʼ ètho nisehniierenhátie? Ónh ní꞉hiotiéren tsi ietʼtsiriwáhwis ne ratiksaʼhokónhas nahonónhnheke?”
19Watʼkeniriwahseráhko, “Ne Hebrew tsionatʼthonwísen iáh ètho tekonhnonhnhótens tsi ní꞉ioht ne Egyptró꞉nons konhnónhkwe; wahtiésenh naʼiotiwiraiénhtaʼne, tánon naʼhotiwirahʼsónhas enhonhnákerahte nohénton nónhkak ne tehiaʼkenihiá꞉se ne thóh iahiá꞉keneʼwe.” 20-21Tsoríwa ne tsiaʼtsniénonhs tsi Rawenni꞉io ronhwatʼtsànis, ne Rawenni꞉io kwáh íken tsi iohiá꞉nere tsi ní꞉ioht tsi tesakoriwasnieséhakwe nonónha tánon sakowahtsironhniénhni nònhne nonónha. Tánon kíʼ ne lsraeró꞉nonhs iahatiʼkónhtakwe wahonaʼtsiokowáhna tánon kwáh íken tsi wahatiʼshátstenhne. 22Kharekiʼónenne ne Ronhnonhtí꞉io wasahkoʼianerenhserónhnien ratiʼkwékon ne rahonkwetashón꞉ʼa: “Iahetsihiaʼténhaf ratiʼkwékon nónhwak roʼnahnakeráhton ne Hebrew roʼtiskenrahkéthe tánon kaniataràhke ne Nile iahetsihiaʼtón꞉ti, ók konhtiʼkwé꞉konh ne tsionatʼthonwísenh konhtiksaʼhokónhas konònhnhek nènhneʼe.”
Currently Selected:
Exodus 1: MHK
Highlight
Copy
Compare
Share
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
