Ecclesiastes 4
4
1Ethòne shé꞉kon sakatkátho oriwahkwékon ne iáh tehioteriwakwaríshions tsi nihiawénsehrons ne kénʼen ionhwenhtsáte. Ne ronhwatironhiakéntha tehonséntʼthos, tánon iáh ónhka tahonwatihiathakéna. Iáh ónhka tahonwatinikonhrahiewénhtʼthoʼte, tsioríhwa ne ronwanathonnhotʼthakwénhnis ne kashastsʼténsera ronónha nokwáhti kaienthá꞉kwen. 2Khenósas tsi niháti nónenh ronenhéion tánon sohnaténhtion; sénha ronónha ronahteraswí꞉io tsi ní꞉ioht nónhka shé꞉kon iakónhnhe. 3Ók sénha ronahteraswí꞉io tsi niháti ne iáh nonhwénhton tehonahnakeráhton, iáh nonhwénhton tehonatʼkáton ne kariwahétkens tsi natehonthatsheráse nonhkweshón꞉ʼas né kénʼen ionhwenhtsáte.
4Onhkaterientarahnèʼna káti ó꞉ni nonhtséren nónhkwe tsi niehiakótre iakohióthe né꞉ne ahiakohianerásten: Né aoríhwa né tsi rothinósen tsi nahoténsons ne tehonnonhsanékens rotí꞉ien. Ók iáh kíʼ thén꞉nenh tekástha. Thóh ní꞉ioht tsi ní꞉ioht ne owéra konhwá꞉sehre. 5Rónhton entionkwathonʼnhotʼthá꞉ke tó꞉ka tentewatsiawénheke tánon entewatʼthónthaʼte nathonkharhiákon ahionkwárhiothe. 6Tó꞉ka kíʼ nónhwa, sénha né ioiánere ne kenkníkon ahiakoiénthaʼke, ahiakonikonhrihióhake, tsi ní꞉ioht ne tehiontsanáhke tiókonhte tahiakoweienhnaráhon, hiontheniéntha nakonhwahiéna nówera.
7Óia ó꞉ni nahó꞉ten wakátʼthoʼke ne tsi iakónhnhe né iáh othénenh tehioríhonthe. 8Né꞉ne ónhkak akahonháʼa khók iéteron. Iáh tehiakonekenteronhtsheráien, iáh tehiakothatekénhsen, ethohʼsáne tiotkonhónwe rohióthe, iáh nonhwénhton tehawerientí꞉hios tsi nihokwáhtse. Ónhka akoriwá꞉ke tsi niehótre tsi rohióthe tánon thaʼtatotʼthakwénhni nahatenikonhró꞉ri? Kí꞉ken kwáh iáh othénenh tehioríhonte, nònhne—tánon ioterihónkot né ní꞉ioht tsi ahiakónhnheke.
9Sénha tehionkwétahke ioiánere tsi ní꞉ioht ne tionhkwétha, tsioríhwa tenitsáronh sénha kahiotensehrí꞉io tsi enhotihióten. 10Tó꞉ka kakʼnikáien ne tenihiá꞉se ahonahtesenhnáksenhne, nóia thóh íhiens nahonwasniénon. Ók tó꞉ka ónhkak akahonháʼa khók íken tánon wahakotesenhnáksenhne, kwáh kíʼ iothakwáswa, tsioríhwa tsi iáh ónhka thóh téiens nahonwasniénonh. 11Tó꞉ka iotʼtó꞉re, né tenihiáse honwáhthon ne skátne ahiaráhte tánon tahiatsiathateríhate, ók onh ní꞉ioht tsi ahsathataʼtshiatateríhate tó꞉ka shonháhakʼkók íken? 12Né tehionkwétahke enwáhton nahnihióthate ne tó꞉sa ahontahonwanahtsiathónti tsi ní꞉ioht ne tionkwéta khók akénhake. Naserí꞉ie násen niwaseriʼiétake tekawahtáse tsi ionhniáton kwáh íken tsi ioníronh ne tahiéhiake.
13-14Ónhkak kententhetsherákon nónhwe néntre nahatenonhtí꞉iosthe ne raonahkerahserákon, tó꞉ka ó꞉ni tsi ionhthatenhothónkwa tenthahiákenhne tánon né wahaterihónten ne ronhnontí꞉io ahotenikonhrasónterahse. 15Wakheʼiehiá꞉rahne nonhkwetakwékon ne kénhʼen tsi ionhwenhtsáte iakónnhe, tánon wakátʼtoʼke kakʼnónhwe né skátke rahtináhkere kén nithohiónha tenshonatʼthá꞉kwen ne ronhnonhtí꞉io. 16Tó꞉ka nónhwa iáh tseiótʼthe tsi nihiakotiókwa ne ronhnonhtí꞉io shakotʼkoráston; nónenh rothohétston, iáh ónhka thaʼhiontʼtshenhnónhni tsi nahohioténhʼen. Kwáh iáh othénenh tehioríhonthe. Thóh ní꞉ioht tsi shí꞉ken ní꞉ioht ne ówera konhwáhsere.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.