Acts 15

Tsi Ronatʼkennisónhonne Ne Jerusalem

1Tóhka niháti ronnónkwe Judea nontahónne tánon Antioch niahónne tánon tahontásawen wasakotirihónnien ne iakoriwiʼióstons, “Iáh tahónton nahonsehsewaniákenne tóhka iáh tesewatewarakwétaron tsi nikariwanóntons ne Mahís raoianerénsera.” 2Kór tánon ne Barnabas kwáh éhʼtho tsi natathiriwatirónten kíʼ nahorihóten, sók kíʼ iatkariwaiéntaʼne ne Kór tánon ne Barnabas tánon ó꞉ni tóhka niháti neh nónwe ne Antioch nihatinákere Jerusalem nieʼhónne ronwanatʼkénsera ne ronteriwanótʼtha ó꞉ni ne rathiretsiárons rahthiriwisákʼkha kí꞉ken nahorihóten.

3Nehne iakoriwiʼióstons iehonwanatheniéton; tánon tsi hiathiatawénrie ne Phoenicia ó꞉ni ne Samaria, wahiatʼróri tsi ní꞉ioht ne iáh tehatiʼsitaeʼró꞉nons tsi tahonwétakwe ne Rawenni꞉io; tsi wahatiriwáhronke tahiakáwen ne kowáhnen atʼtsennonʼniátsera ne thoʼnehthákwens. 4Siahónnewe ne Jerusalem, thon tahonwanaróhton ne rotiriwiʼióstons, nehne ronteriwanótʼthas, ó꞉ni ne ratiretsárons, tánon ne Kór ó꞉ni ne Barnabas kwáh oriwakwékon wahiatʼróri tsi nahóten sakohiotenseráwi ne Rawenni꞉io. 5Nók tóhka niháti ne thoʼnetákwens nehne Pharisees raotiʼtiókwakon non nihatihiátare wahtathítaʼne tánon wahonníron, “Ne iáh tehatiʼsitaeʼró꞉nons ónenk tsi enhonthewarakwétaron tánon enkaroríhake nahontewénnarakwe ne Mahís raoianerénsera.”

6Ne ronteriwanótʼtha ó꞉ni ne rathiretsárons wahontʼkennísa nahatikenʼénʼion kí꞉ken oríhwa. 7Ónen kwáh thóh tsi nikaríwes satehothiriwahwénron Tiér wahthátaʼne tánon wahénron, “Tewatenrohshónhas, sewahtheriéntare ónen kwáh wahónnise tsi náhe ne Rawenni꞉io thaʼtsiatarákwen ne sewentiókwakon nakhehiateriwanótʼthase ne kariwí꞉ios ne iáh tehatiʼsitaeʼró꞉nons, nahónton nahónronke tánon nahontahonʼnétakwe. 8Kíʼ ne Rawenni꞉io tsi nikáien ne kwáh niaʼtehionkwétake sakonikonraientéri, wahréneste tsi ahónton ne iáh tehatiʼsitaeʼronons nahontahonnéthaʼkwe neh tsi tasakáwen ne Ronikonratokénti, kwáh tsi ní꞉i nisonkwatsérase. 9Iáh thènen tatehotí꞉en tsi nahthetewátere; sahsakonikónrense ne rahotiriwanerahákʼtseras neh tsi tahonnéthakwe. 10Onhʼkáti, nontiéren tsi ónen ísewehre ahisewátʼkense tóhka kén enhonákwen ne Rawenni꞉io tsi enʼietʼtsihiátsʼten ne iontientaniákstha ne ratikweʼkónʼne, tsi ní꞉i nihionkwahiatawé꞉en ó꞉ni ne ietʼthisotʼthonkonkén꞉en iáh tehionkwakwénion nahionkwá꞉ha? 11Iáh! Tionkwetákwen ó꞉ni neh tsionkwaniakénton ne rahoténrat ne Roia꞉ner Ié꞉sos, kwáh tsi ní꞉ioht ne ronnónha.”

12Kwáh kanenrakwékon sakʼtahontatónni tsi wahonwanatahónsathaʼte ne Barnabas tánon ne Kór wahhiatʼroriánion ne ioriwanerakwathénions ó꞉ni ne ionerákwas ne Rawenni꞉io tsi nahaieránion tsi wasakoiénawaʼse nahonateriwaténtsiaʼse tsi nónwe nihathinákere ne iáh tehatiʼsitaeʼró꞉nons. 13Nónen sanísa tsi iatretiáronskwe, Sák tahatáti: “Takwatahónsatat, tewatenrosónhas! 14Simon kwáh ónkwak wahanikonraiénthate tsi niʼiawén꞉en ne kwáh tsiotierénton ne Rawenni꞉io tsi wahsakótenre ne iáh tehatiʼsitaeʼró꞉nons neh nasakohiataráko ne raónha raotiókwa ahónton. 15Neh rahotiwennaʼsónhas ne iehatiriwákenskwe kwáh tahiotokéntaʼne tsi nikéntons kí꞉ken. Tsi niwáton noriwatokénti,

16‘Tsi nenwatóhetste kí꞉ken, thóʼne tént꞉ke, ráthon ne Roiá꞉ner,

tánon ensekʼkwatáko tsi ronontihiotseráien ne Táwit.

Ensekʼkwatakwenháton neh ioriwentáserons

tánon séhkon enskesatsʼténseron.

17Tánon akwékon ne thiʼhiakotiokwaténion nonkwesónhas akonháke nentʼthónne,

rathikwékon ne iáh tehatiʼsitaeʼró꞉nons neh iekhenáton I꞉i akonkwéta enhónton.

18Tsi niháton ne Roiá꞉ner, tsi nihawenéston ne wahónnise tsi náhe tkènne.’

19“Ni꞉i tsi ní꞉ioht tsi kenhénʼhions,” ne Sak iahatasóntehren tsi róhthare, “tóhsa teietʼtinikonráren ne iáh tehatiʼsitaeʼró꞉nons tsi Rawenní꞉ioke nókwa niahónne. 20Khék, tehiotonwentióʼon ne iahietʼthihiátonse naietʼthiróri tóhsa thènen rónʼnek ne iáh tehiotʼkwéniens tsioríhwa tsi kahiatónni konhiohesténni; 21Asèken ne Mahís raoianerénsera wahónnise shiʼiotewennanóte nononsatokentíke kwáh niaʼtewéntake nawentathokentíke, tánon ne raowennaókons kwáh tsi niaʼtekanátake tsi wateriwanóte.”

Ne Iáh Tehatiʼsitaeʼrónons Ne Thoʼnethákwen Iahonwathihiátonse

22Ethò꞉ne ne ronteriwanót꞉thas ó꞉ni ne rathiretiárons, kwáh kanenrakwékon, tsi hiathotiriwaiéntase nónkak ronnónkwe ahonwathihiataráko tsi nihotitiókwa tánon Antioch iahonwanatóri skátke ne Kór tánon ne Barnabas. Tenihiáse wahonwathihiataráko nehne kwáh éhneken tsi nihonwathikweniénstha ne thonnetákwen, Judas, neh ronwanathónkwa ne Barsabbas, tánon ne Silas, 23Tánon ken nikawennóten tsi iahonwathihiátonse:

“Í꞉i ne iakwateriwanótʼtha ó꞉ni ne rathiretiárons, sewatatekenokónhas, kwáh shewakwékon nonkwatatekénseras ne iáh tehatiʼsitaeʼró꞉nons tsi ronahnakeráton tehiakhiʼnonwerátons tsi niháti neh thoʼnónwe nihatinákere ne Antioch ó꞉ni ne Syria ó꞉ni ne Cilicia. 24Wahakwariwáronke ónkak tsi niháti nonkwentiókwakon thóh niehonéhnon tánon watsiʼtsinikonráren ó꞉ni wahitsinikonrakaréwaʼte tsi nahóten wahonníron; kwáh iáh thènen tehiakiriwáwi neh thóh nahatíʼiere. 25Kwáh káti wahakwatʼkennísa tánon iakwakwékon iationkwariwaiéntaʼse nónkak ahiakihiataráko ó꞉ni ne iahiatʼkhihiaténieʼte ne iahathiriwénhawe. Neh enhonterósen neh kwáh onkwaterohseranórons Barnabas tánon ne Kór, 26thóh nonnáhrakwe tsi ronwahiótense ne Sonkwaiá꞉ner Ié꞉sos Kerístos. 27Iahakihiaténieʼthe, ne Judas ó꞉ni ne Silas, kwáh ronnónha enʼietʼtsiróri tsi nahóten ne ionkwahiáton. 28Ne Ronikonratokénti tánon nonkwátiake kwáh neh sahonkwanikónra neh tóhsa sénha thènen ahonsakwátsʼthen neh óhia nahorihoténsons nek khók: 29tóhsa thènen isewak tsi nahóten ne kahiatonni konhiohestenni; tóhsa ísewak nonekwénsa; tóhsa thènen sewahwárak ne wathoriohthákwen; tánon sewahtatenónstat tsi nòkwa ne kentétsera. Kwáh ensewahianerásten tóhka iáh kentsiaʼisewáiere kinahorihoténsons. Kwáh teraswiʼiosténnis.”

30Neh rathiriwénhawe iahonwanaténiethe Antioch niahónne, thóh nónwe kwáh rathikwékon ne thonetákwen skátʼke wahontiataróhroke tánon tahonwénnon ne kahiatónsera. 31Nónen nonkwesónhas sahatiwennanotáko, kwáh wahatihiatánaʼne tsi nahontsennónni tánon tsi nikarihóten wahotinikonranírate. 32Judas tánon ne Silas, rohnónha ó꞉ni ne ieniriwákens, kwáh karíhwes tsi skátʼne wahathitsiénhaien, wasakotinikonraníraʼte ó꞉ni wasakothisatsténseron. 33Ónen kwáh kenʼnikaríwes thóh shénes, neh thonetákwens hionsahonwanathéniete tsi tatíterons ne thonwanatheniéton. 34Nók ne Silas hiathoriwaiéntase ne thóh nónwe naréseke.

35Kór tánon ne Barnabas kwáh thóh tsi nikaríwes ehʼniteróntakwe ne Antioch, tánon skátʼke ne ronatsiakhésons wahsakotirihónʼnien ó꞉ni wahonteriwanóten ne Roiá꞉ner rahowennahókons.

Kór Tánon Ne Barnabas Wahthiatekháshion

36Kwáh kenʼnáhe onakénke ne Kór wahawénhase ne Barnabas, “Ánion thóh ietsítene tseʼthinatharénsera ne thonetákwens kwáh tsi niaʼtekanátakes iehiontiateriwanóthe ne Roiá꞉ner rahowennahókons, tánon enteniriwatʼtsénri onihioʼthonhátie ne ronónha.” 37Ne Barnabas réhrakwe Sawátis Mark iahohiaténhawe, 38nók ne Kór iáh neh tehawéron tkariwaiéri ne iahonwahiaténhawe, tsioríhwa tsi iáh tehathikwekonhátieskwe sanísa ne rahothihioténsera, nók sókʼthon tánon iathesakohiátiste ne Pamphylia nónwe. 39Kwáh thóh tsi nathiriwaké꞉nha, tánon wahthiatekháshion: Barnabas wahiateróhsen ne Mark tánon wahiatʼtsiróhten Cyprus niaháne, 40nók ne Kór, Silas nenne wahiateróhsen tánon wahiaténti Antioch nionsáne, tsi nónwe thon wathiríhonte tánon ó꞉ni neh wahotinónstaʼne ne Roiá꞉ner raoténrat. 41Syria tánon Cilicia iahiathóhetste, sakothisatstenserawiháties ne onkwesónhas.

Currently Selected:

Acts 15: MHK

Highlight

Compare

Copy

Want to have your highlights saved across all your devices? Sign up or sign in

Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.

The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).

Learn More About Ohiatonhseratokénti