Acts 12
12
Sénha Onteʼiáron Ne Karonhiakénsera
1Tóhka ki thosikaháwi ne Ronnonti꞉io Herod tahatásawen nasakoronhiákente nótsiakes nononsatokentíke non nihatihiátare. 2Wahaténʼnane ne Sák, nehne Sán hiatatekénha nahonwanonwariákhon asarekówa áhonste. 3Ne sahatʼkátho tsi nahonerientí꞉io ne Sitaeró꞉nons, iahatasónteren ó꞉ni Tiér wahonwaiéna. (Thóh ne kíʼ ehnihiawén꞉en tsi nihonatenʼnorónsta ne iáh tewatʼtenkwáton ne kanátaro.) 4Sahonwaiéna ne Tiér tsi tiontatenotónkwa iahonwanóton, nehne ranónne ne tiontateʼnotónkwa iahonwatsiakwarísiase nehne kaiéri nihothitiókwakes ne ronterí꞉ios tánon kaiéri niháti ne shotitiókwa. Ne Herod ratenikonronníhakwe tsi ionkwéne ienhohiaténhawe akohénton nónkwe tsi tenhohiatórete nónen Enhiotohétston ne wentanórons. 5Káti ne Tiér tsi tiontatenothónkwa tanóton, nók kí ne iakoriwiʼióstons tsiakokontákwen tsi ronwaterennaiénnis rahonháke ne Rawenni꞉io.
Tiér Sahonwanotónko
6Ne tsiokaratserátekwe nohénton ne Herod onkwéne nienhohiaténhawe, Ne Tiér rótaskwe tsi natenihiatóken ne ronwanónnahkwe. Tekaronkwásake tsi ni꞉íoht tsi ronwáneren, tánon ó꞉ni tathinónne ne tsi tiotenhenrakáronte tsi iontatenontónkwa. 7Thontaiawénstsi ne Roiá꞉ner rahoronhiakerónon thóh watáthane, tánon watsioswátʼthene tsi nonnihanóton. Ne raronhiakerónon ranensáke ne Tiér tsi wahothonthóriaʼte, wahoiète, tánon wahénron, “Tesasterí꞉hen! Téstann!” Kwáh óksak noronkwása thonʼsénne ne Tiér ranentsiawítakes. 8Ethò꞉ne wahénron ne raronhiakerónon, “Snírat tsi satsiatánen tánon ísast ne sarasithorókstha.” Thóh ki-naháiere ne Tiér, tánon wahénron ne raronhiakerónon, “Tesatewehiáren tánon í꞉tehne.” 9Ne Tiér wahósere tontanihiákenne ne tsi iontatenothónkwa, iáh tehoteriéntare tóhka ken ensathatewenni꞉ione ne tsi iontatenóthonkwa, nók kíʼ, Tóhka ne raronhiakerónon raónha thóh nihoierenhátie thóh kíʼ ni꞉iot; Wárehre tohʼkanónwa rotétʼtshens. 10Wahiatóhetste tsi rónnete ne tontsérente ratinónne thóhne ne tekeníhaton, nonakènkha sahiahónniate nehne karístatsi iotenhenrénton nehne kanátakon nókwati iaʼtewatenonhóntses. Kwák tsatewatenonhónnti ne ronónha rahotiriwáke, tánon hianihiákenʼne. Wahiatenathítha, tánon thon taiawénstsi ne raronhiakerónon sahotewénteʼthe ne Tiér.
11Ethò꞉ne ónen ne Tiér wahátʼthoke tsi nahohiátawen, tánon wahénron, “Ónen kíʼ onkateriéntaraʼne tsi kwáh oriwí꞉io í꞉ken! Ne Roiá꞉ner tahotóri ne rahoronhiakerónon nahonsahakeniákente tsi nókwa ne Herod rahosatsténsera ó꞉ni tsi nahoténsons ne Sitaeró꞉nons ronskánekskwe tsi naʼiawénseron.”
12Rotheriéntarakwe tsi nihothesenʼnótenskwe, Onwári tsi tiakonʼnónshote niaháre, nehne Sawátis Mark ronwaʼién꞉a, thóh nónwe iakotsiokowánen iakotiataróron ó꞉ni ronaterenʼnaiéntakwe. 13Tiér átste tahanóahiake, tánon neh ieʼnhátsera Rhoda iontátʼtias kanohákʼtha niahá꞉en. 14Wahonwawennaiénterene ne Tiér tánon tsi nahontʼtsennónni hionsahionkwísron akwékon iáh tsehiakononthónkwen, tánon wahontʼróri átste ít꞉rate Tiér. 15“Tesanonwarahwénrie!” wahontaténhase. Nók taieriwakóntakwe tsi thóʼkenske kwáh í꞉ken. Sók wahtatiriwaseráko, “Nehne rahoronhiakerónon thí꞉ken.”
16Thó꞉ne náhe ne Tiér thontahakóntakwe wahanoháhiake. Thóh nekíʼ ónen wahonwanotónkwase, tánon sahonwáken, kwáh íken tsi wahotineráko. 17Ratsianáke wáraste wataieronnionháton ne sakʼtahontatónni, tánon wasakonikonraientáten tsi ní꞉ioht ne Roiá꞉ner tsi sahohiatínekenwe tsi tiontatenothónkwa. “Neh kíʼ tsi sewaróri ne Sák tánon ó꞉ni ne ronátsiakes ne thoʼnethákwens,” wahénron; ehʼthóhʼne ahéren sárete tánon ákte non nionsáre.
18Sonsahiórenne, kwáh íken tsi tehonanithonniénni ne ratinónʼne—onhnenhohiátawen ne Tiér? 19Herod wahathénʼnane nahonwahiatísake, nók iáh kíʼ tehonwahiatatʼtsénrion. Sók kíʼ wahathénnane nahonwatiriwanonthonniónhase ne ratinónne tánon wahathénnaʼne nahonwanhawénkʼtho.
Shonthóhetste, Herod Judea niaháre tánon ó꞉ni ken nikaríwes Caesarea iéreskwe.
Herod Wahrénheie
20Ne Herod kwáh íken tsi sakonákwasene nonkwesónhas ne Tyre ó꞉ni ne Sidon, sók kíʼ wahonnitiokónni wahonwatʼkénsera. Tahontiérente Blastus wathonwanikonrakénni, nehne rónkwe roteriwatsteríston ne tsi kanontihiotseráʼien, neh nahónton nasakoiénawase. Ehʼthóhʼne Herod rahohénton niahónne wahonwariwanóntonse ne skénnen, tsioríhwa ne tsi thatinákere ne rahotítʼkhwa thó꞉non nitewétakwe ne ronhnontí꞉io rahonakeraserákon.
21Ne nónen wentanóron ne Herod énraste ne wakóses rahotiátawi, rahonitskwaratokentíke enhátsien, tánon ensakothárase nonkwesónhas. 22“Iáh rónkwe tehóthare, nók Rawenni꞉io!” sesʼwathotihénrete. 23Kwáh óksak ne Rawenni꞉io rahoronhiakerónon wahohiatsénente ne Herod, tsioríhwa tsi iáh tatehorénsaron ne Rawenni꞉io. Otsinonhwanhéta wahonwahwárake tánon warénheie.
24Ónen sénha nonkwesónha wahontahónsatate ne Rawenni꞉io rahowénna tánon tahiakétakwe.
25Ne Barnabas tánon ne Saul wahníhsa ne rahotihioténsera tánon Jerusalem nionsáne, rónʼnehne ne Sawátis Mark.
Currently Selected:
Acts 12: MHK
Highlight
Share
Compare
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
