2 Samuel 8
8
Ne Ne Táwit Raoteriʼióseras
1Ó꞉nenh kwáh nenhná꞉he onakènhke, ne Táwit iashakotsatónhti ne Philistines tánon washakosénhni; tánon iahontótʼten tsi thotiniarotaronhne ne tsi ionhontsá꞉ièn.
2Ne raónha kwáh nonʼné꞉eh washakosénhni ne Moabites ó꞉ni, washakahónhnien nohontsáke ahontsiatahkwenhtáro, washakotenienténhnion áhsen níkon washeriʼietowáhnen wahasheriʼietakéron; tsi nihá꞉ti ne tsi natetsá꞉tereh ne tewasheriʼietakes washakononwarhiakhónhnion, ók tsi nihá꞉ti ne ahsénhaton iewasheriʼiétahien washakoríhon nenhné꞉eh nahonnónnheke. Tánon ne Moabites neh wahón꞉ton ne Táwit raonkwetashonhas ó꞉ni nahatíhawe nowísta nahonwakáriaksehake. 3Ne Táwit kwáh ó꞉ni nonʼné꞉eh waononwariákhon ne Ronnontí꞉io Hadadezer ne ne roní꞉ha ne Rehob ne Zobah nón꞉we nihanákerehkwe, ne raónha tsi niahá꞉reh nahonsahakwahtáko ne raoshaststénhsera ne tsitkaniatarathátsie ne Euphrates. 4Ne Táwit washakoienenháton énska tewenhniawehetsheráhsen tánon tsá꞉ta tehonhnienhniáwe nihá꞉ti ne rotisátens, tánon tewáhsen tehonhnienhniawehetsheráhsen niháti ne thakésons tsi ronterí꞉ios. Ne Táwit waharehniá꞉nion ne raotiʼtsinonhiátons ne ratiʼtsirahokwáhkes ratiʼkwékon ne kosátens ronwatiʼiatanihiónt꞉tha notsiónkwas, ók washakáwenhre iatekaiéri tsi nihá꞉ti nénska tewenhniáwe nikaseréhtakes notsiónkwas. 5Nó꞉nenh ne Aramró꞉nons ne Damascusró꞉nons wahón꞉newe nahonwasniénon ne Ronnontí꞉io Hadadezer ne Zobahró꞉non, ne Táwit wasakononwariakhónhnion tewáhsen-tékeni tewenhniawehetsheráhsen niháti ronónkwe ne ne Aramró꞉nons. 6Eʼthóhʼne ne Táwit wasakó꞉teron ne ronterí꞉ios tsi nón꞉we nihathiteróntons ne Aramró꞉nons ne Damascusró꞉nons; tánon ne Aramró꞉nons ne wahón꞉ton ratinhá꞉tshera raohén꞉ton ne Táwit tánon tahatihásheron nowístas. Ne Roiá꞉ner taháwen naʼtesenhniétsheras ne Táwit ne kwáh tsikʼnonwéson niénhʼhenreh. 7Ne Táwit washakokwenháton ne owistanórons í꞉kens ne teioniatasthákwa ne ne ratihawinóntsene ne raonhatsherashón꞉ʼahs ne Hadadezer, tánon thóh niahatíhawe Jerusalem. 8Thóh tontáhsawen ne Betah tánon ne Berothai, ne ne raonatahtón꞉has ne Hadadezer, Ne Ronnontí꞉io Táwit tahahá꞉seron iawetowáhnens ne teiotʼtsinokwáhronte nathésa karístahtsis.
9Nó꞉nenh ne Ronnontí꞉io ne Toi ne ne Hamathró꞉non waharihwáhronhke nètho Táwit tsi sakosénhnion ieshakosaháton ne Hadadezer raotsió꞉kwa ronterí꞉io, 10Ne Toi iahó꞉tori ne roién꞉ha Joram tsi thénteron ne Ronnontí꞉io Táwit, ne ne tahonónweron tánon tahorénhsaron tsioríhwa tsi ronaterí꞉io ne Hadadezer tánon rosénh꞉nion. Nón꞉wa ne Hadadezer iotkáte ronaterí꞉iokwe ne Toi. Joram tahohawíten niaʼtekonshón꞉ahs kawistará꞉kens, owistanó꞉rons, tánon ne athésa niwashokóten karístatsis; 11ne kí꞉ken ó꞉ni ne Ronnontí꞉io wahatonhnahérase raohénton ne Roiá꞉ner, tsi ne aónstonke nó꞉nen enonterénhnaien, skát꞉ne ne kawistaráken ó꞉ni nowistanó꞉ron ne sakhokwenháton ne thiononhontsaténions ne sakosén꞉nion. 12Thóh nithoháseron Edom, Moab, ne ne Ammonró꞉nons, ne ne Philistines, Amalek, tánon tsi nètho haséhron ne ronenhskwenháton ne Ronnontí꞉io Hadadezer ne ronikénʼen ne Zobah. 13Ne Táwit wahasenhnowanenah nó꞉nenh shonsárahwe, ne raón꞉ha wasakononwariakónhnion shatékon iawénhre tewenhniawehetsherásen niháti ne Edomites thóh ahonráhkwahkon ne tsioiótsis. 14Thóh washakóteron ne ronterí꞉ios thóh nón꞉we Edom; kwáh tsitnonwéhsons akwé꞉kon ne Edom tsi wasakóteron ne ronterí꞉ios, tánon ratikwé꞉kon ne Edomites ne wahón꞉ton ne Táwit raonhatsherashón꞉ahs. Tánon ne Roiá꞉ner tahá꞉wenh natesenhniétsheras ne Táwit ne kwáh tsikʼnonwéson nienhénreh.
Ne Táwit Raonkwetaʼshón꞉ahs
15Káti ne Táwit wahatenontí꞉ioste tsi niwatenáskwah ne Israerʼronónke; tánon ne Táwit ne wahateriwathéntsiate nateriwakwarishióntshera ó꞉ni tkarihwaiéri rononhá꞉ke ne raonkwetaʼshón꞉ahs. 16Ne Joab ne ne roní꞉ha ne Zeruiah neh sakoteriwatsterístase ronterí꞉ios; Jehoshaphat ne ne roní꞉ha ne Ahilud ne sakohiatónhniskwe; 17Ne Zadok ne ne roʼníha ne Ahitub tánon ne Ahimelech ne ne roʼníha ne Abiathar nitsihénstatsi í꞉ken; Seraiah neh sakohiatóniskwe; 18Ne Benaiah ne ne roʼníha ne Jehoiada neh sakohentenhséhakwe ne Cherethites tánon ne Pelethites; tánon ne Táwit roién꞉ha ne ratsihénstatsi kènhne.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.