2 Samuel 6
6
Ne Táwit Iahanorokwénhawe Nateriwaseronniátshera Thóh Jerusalem
1Ne Táwit shé꞉kon sahshakoiatahróhroke ne ronwatiʼiatarákwen ronnón꞉kwe NÍsraerʼronónke, áhsenʼniwáhsen tewenhniawehehtserásen niháti. 2Ne Táwit tánon ratiʼkwé꞉kon ne raotiʼtsió꞉kwah ronterí꞉ios ne ratikweʼkonhátsies iahón꞉ne tánon thóh tahonténhti Baale-judah, ne ne thóh nón꞉we nontahatíhawe ne raoneró꞉kwah nateriwasheronhniátsera ne Ní꞉io, tsi neh konwanatón꞉kwah ne Sakoiá꞉ner ne tsi ronónha thóh ratitskwahrón꞉nions éhʼneken ne niʼnikonhrare iotokentis#6.2 niʼnikonhrare iotokentis: cherubim. 3Iahatíhawe ne raoneró꞉kwah nateriwaseronniátshera ne Ní꞉io thóh wahonnètha ne oserétahse ne tékeni teiokakwénhtonhte wenhnísereske, tánon thóh tahatiʼiákenhwe tsi ronónshote ne Abinadab, thóh ronhnonshóthakwe tsi ionhniá꞉here. Uzzah tánon Ahio, tánon ne iathatekénha ne ne sakohiohokón꞉ahs ne Abinadab, ronónha konwatorihátsie noserehtá꞉se ne tekeniteiokakwénhtonhte wenhníseres 4ne ne Ahio ahohénton í꞉reh. 5Táwit tánon ratikwé꞉kon NʼIsraeró꞉nons teotinonniakwenhátsie ó꞉ni teotirihwakwenhátsie raohén꞉ton ne Roiá꞉ner kwáh tsi nihotishaststénhsera, ratiʼrenhnotáhtsie ó꞉ni rotinakwahehátsie ó꞉ni ronaterenhnotátsie ne onowakówah ó꞉ni ne kén nikanakwáhas ó꞉ni ne ionterakarehrasthákwah ó꞉ni ne teiotwasakweʼnón꞉ni. 6Nó꞉nen shiaʼhónhnewe ne tsi iewahét꞉ta kaswenhkaraʼkwenhtaron ne Nacon nón꞉we, ne Uzzah iathatsá꞉neste tsi kanorokwáhere ne raoteriwaseronniátshera ne Ní꞉io tánon wahaiéna, asèken ne teotiná꞉kares tsi nihón꞉ne iahowakonhá꞉tsie. 7Kwáh ók꞉saʼok ne Roiá꞉ner wahonhákwase ne Uzzah; tánon ne Ní꞉io kwáh thonónhwe wahononwarhiákhon tsioríwa tsi iathatsáneste tsi kanorokwáhere nateriwaseronniátshera; tánon thóh warénheie ákta tsi kanorokwáhere ne raoteriwaseronniátshera ne Ní꞉io. 8Ne Táwit wahonhákwen tsioríhwa ne Roiá꞉ner tsi wahoréhwate ne Uzzah; káti neh nón꞉we ne skonwanatónkwah Perez Uzzah, shé꞉kon nón꞉wa nikaháwis neh ne kéntons karehwathátshera. 9Ne Táwit wahotsánike ne Roiá꞉ner nètho wenhniserátekwe; wahén꞉ron, “Ónhní꞉ioht ne raoneró꞉kwah nateriwaseronniátshera ne Roiá꞉ner ne í꞉i akatenhnikonrá꞉ren?” 10Káti ne Táwit iáh tehothontáton niahóhake noneró꞉kwah ne raoteriwaseronniátshera ne Roiá꞉ner ne raón꞉ha ahatenhnikonrá꞉ren thóh tsi kanatowaʼʼnénhke ne Táwit; khèkhok ne Táwit thóh niahá꞉hawe tsi thohnónshoʼte ne Obed-edom ne ne Gitró꞉non. 11Nateriwaʼseronniátshera oneró꞉kwah thóh kaiéntakwe raonóns꞉kon ne Obed-edom neh náhsen niwenhnítahke nikaríweskwe; tánon ne Roiá꞉ner wahoiatahtériste ne Obed-edom tánon ratikwé꞉kon tsi nihawatsíra.
12Tsi niwatró꞉ri ne Ronnontí꞉io Táwit, “Ne Roiá꞉ner tsi sakoiathaʼteríston tsi nihawatsíra ne Obed-edom tánon akwé꞉kon tsi nahó꞉ten ahoién꞉take ne raón꞉ha, ne iorión꞉nion ne raoneró꞉kwah nateriwaseronniátshera ne Ní꞉io.” Káti ne Táwit iahá꞉re tánon tahá꞉hawe ne raoneró꞉kwah ne raoteriwaʼseronniátshera ne Ní꞉io ne tsi thohnónshaʼte ne Obed-edom thóh niahá꞉hawe kanatowanénhke ne Táwit tsi nihotonhnáhereh; 13tánon nó꞉nen tsi nihá꞉ti ne ratinhorokwenháwine ne raoʼteriwaseronniátshera ne Roiá꞉ner tewáhsen-wísk (mile) niió꞉re shieʼoné꞉non, ne Táwit wateshakótaste tsi nikarí꞉wes wahó꞉tenaskwatsahaten ne Roiá꞉ner ne ne teoná꞉kares tánon ne ró꞉rehsen tionhnónskwaron rátsinn. 14Ne Táwit wathanónhniakwe raohén꞉ton ne Roiá꞉ner kwáh tsi nioshaststénhsera; ne Táwit neh teotsiakwaráhnen ne waniatarí꞉io ateniióntha. 15Káti ne Táwit tánon ratikwé꞉kon NʼIsraeró꞉nons tahatíhawe ne raoneró꞉kwah ne raoteriwaseronniátshera ne Roiá꞉ner tsi nateotihenré꞉tha, tánon tsi nikawénhnhote ne ieonrawátstha. 16Ne raoneró꞉kwah ne raoteriwaseronniátshera ne Roiá꞉ner tsi ónh꞉we ne kanatowanénhken ne Táwit, Michal ne ne sakoién꞉ha ne Saul thontketóten tsi iononstonkwahkáronhte, tánon wahó꞉ken ne Táwit tehanitionkwahkwánions tánon teononniákwen rahohénton ne Roiá꞉ner; tánon nahón꞉ha wahokénron nawerhiá꞉ne.
17Tahatiʼiónte ne raoneró꞉kwah nateriwasehronniátshera ne Roiá꞉ner, tánon thóh wahá꞉tien tsi nón꞉we niionát꞉te, atohsehrákon nètho Táwit rotohsehró꞉te ne ne aorihwáke; tánon ne Táwit wateskónten tánon neh washakotátʼtse ne otsiokwahtokénti raohén꞉ton ne Roiá꞉ner. 18Nó꞉nenh ne Táwit sahá꞉sa tsi roteskón꞉tahkwe tánon tsi washakótatʼtse ne otsiokwahtokénti, washakoiathatériste nonkweʼókons thóh raosénhnakon ne Sakoiá꞉ner ne ratironhiakerónons, 19tánon wateshakorehniáten ne káhkhwa tsi ratinakeréhnion onkweʼtakwé꞉kon, ne ne kwáh kentsiokwakwékon NÍsraerʼronónke, thaʼtetsarónhkwen ronʼnón꞉kwe tánon ne konnón꞉kwe, satiʼiatátʼtions tasaká꞉wen énska teiotenatarakweʼnón꞉ni, kén nikawahrá꞉ha, tánon énska ne tkanén꞉hara watenátaronte. Ehʼthóhʼne ratikwé꞉kon nonkweʼókons tsi thotiʼnonshó꞉tons nionsaón꞉ne.
20Ne Táwit ionsáhreh ne tahonsahontátʼken ne raowá꞉tsireh. Ók ne Michal ne ne sakoién꞉ha ne Saul takaiá꞉kenʼne ne tahiatátken Táwit, tánon wakén꞉ron, “Kwáh ne ronnontí꞉io NÍsraerʼronónke wahatatʼtsenówanate nón꞉wa wennhniseráte, tsi wahathatenotstón꞉ni ahotihénton ne raonhatserashón꞉ʼahs konnón꞉kwe, tsi ní꞉ioht ne kwáh tsikhónkak ne teotenonwahroʼrítonhte rónkwe nontiérenk ahathatenhostónhni!” 21Táwit wahrénhase ne Michal, “Kwáh raohén꞉ton ne Roiá꞉ner, raón꞉ha ratiataráhkwen tsi ní꞉ioht ne ianí꞉ha tánon ratikwé꞉kon tsi nihawatsíra, ne nahatiataráko nahonkenontí꞉ioke tsi niwatenáskwah NʼIsraerʼronónke, ne raonkwetaʼshón꞉ahs ne Roiá꞉ner, nètho tsi watkenónhniakwe raohén꞉ton ne Roiá꞉ner. 22Kwáh kíʼ shé꞉kon sén꞉ha enskathatéhate tsi nón꞉wa ní꞉ioht, ní꞉i aón꞉ton nakanontón꞉nionhwe iáh othènon tekeriwástha, ók kíʼ thí꞉ken konhnón꞉kwe tsi kwáh éhʼneken tsi enionkanontónhnionhse!”
23Tánon ne Michal ne sakoién꞉ha ne Saul iáh teiowiraientáʼon tsik tsakénheʼie.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.