2 Samuel 1
1
Ne Táwit Wahotiónhnionhse Ne Saul ó꞉ni Ne Jonathan
1Sarénheʼie ne Saul, nó꞉nen ne Táwit shís꞉roh tsi iesakoʼsénhnion ne Amalekró꞉nons, ne Táwit thóh iehenterónhtakwe tewenhniseráke ne Ziklag nón꞉we. 2Nasénhaton siwenhniseraʼkéhaton, rón꞉kwe wá꞉rawe thóh nontáre ne Saul tsi thotahtó꞉serote, neh raoʼtserón꞉nia ioteratiónkwen tánon rokenrá꞉reh ranontsíne. Nó꞉nen shiaoiatórenhne ne Táwit, ohontsáke iahaiatiénenhne tánon wathatentʼtsóten. 3Ne Táwit wahawénhase, “Kanón꞉we nontáhse?” Wahawénhase, “Tahkeniá꞉kenhne tsi tonathatoserótons NʼIsraerʼró꞉nons.” 4Ne Táwit wahawénhase, “Onhniʼiotonhátsie noriwashón꞉ahs? Takró꞉ri!” Watharihwaseráko, “Ne ronterí꞉ios ronatékwen ne tsi waterí꞉io, ók kíʼ ó꞉ni ronatsiokowánen ne ronterí꞉ios rotiʼiatsenénhen tánon ronenhé꞉ion; ó꞉ni ne Saul tánon ne roién꞉ha Jonathan ronenhé꞉ion nonhʼné꞉eh.” 5Eʼthóhʼne ne Táwit wahoriwanóntonhse ne kennithoiónha tsi rahón꞉ha roriorhiánions, “Onh ní꞉ioht tsi sateriénhtare nètho Saul ó꞉ni ne roién꞉ha Jonathan tsi ronenhé꞉ion?” 6Ne kennithoiónha ne rorioriánions wahén꞉ron, “Tsi nahá꞉wenhne thóh í꞉keskwe tsi Ionón꞉te ne Gilboa; tánon thóh nón꞉we ne Saul ne rotenhnitserotakwen ne raoshí꞉kwara, iáh tehiahonhnisèhon ne otsiónkwas káseres ó꞉ni ne rotisátens rahiatákʼta wahón꞉nehte. 7Nó꞉nen rashón꞉ne shionsahatkátho, wahák꞉ken, tánon tahakenáton. Watiriwasehrákwahse, ‘Kén꞉en shénʼshion.’ 8Tánon wahakénhase, ‘Ónka ní꞉se?’ Watiriwasehrákwase, ‘Í꞉i ne Amalekró꞉non natiatóten.’ 9Wahakénhase, ‘Káts, tahkerá꞉tan tánon takenonwariá꞉kon; asèken aiakosenakerhste iontsiéna, tánon nek kíʼ sá꞉ka shé꞉kon nikón꞉nhe.’ 10Káti wahirátahne tánon wahinonwarhiá꞉khon, asèken wakateriéntare tsi iáh tahrón꞉nheke tsi nihohiatsiénenhen. Wahiʼianonwarohrók꞉si tánon natenenhtsá꞉na ne rotenenhtshá꞉nenhne, tánon kén꞉en takhá꞉we raohén꞉ton natiá꞉ner.”
11Eʼthóhʼne ne Táwit wahoseronhniá꞉shion tánon waharatiónko; tánon ratikwé꞉kon ne ronnón꞉kwe ne ratikwekónhne thóh nahatíiere. 12Wahontiónhnion tánon wathonséntʼtho, tánon wahonenhtónhtsiete kwáh tsahokárawe ne ne Saul tánon ne roiénha Jonathan raotirihwáke, tánon ne ronwaterí꞉iose ne Roiá꞉ner ó꞉ni tsi ratiwatsiratátsie Israerʼró꞉nons, tsioríhwa tsi ne rotiʼiatsenénhton nasarehkó꞉wa. 13Tánon ne Táwit wahawénhase ne kén nithoiónha tsi niká꞉ien ne roróhri, “Kaʼnón꞉we ní꞉se nithiséhnon?” Tánon ne raón꞉ha watharihwaseráko, “Í꞉i ratién꞉ha ne rowahéston, ne ne Amalekró꞉non.” 14Ne Táwit wahawénhase, “Ní꞉se iáh kén tesáteronskwe naʼontahsatshanakaráthaʼte natsiá꞉tonte ne Roiá꞉ner roiatahrá꞉kwen?” 15Ehʼthóhʼne ne Táwit iahó꞉nonke saiá꞉ta ne kén nithoiónha tánon wahén꞉ron, “Káts kén꞉en tánon ehtsenonwahrhiákhon.” Káti wahokónrehke tsi wahohiatsénenhte tánon wahononwarhiákhon tánon warénheie. 16Ne Táwit wahawénhase, “Ní꞉se sanekwénhsareh senontsíne; asèken kwáh í꞉se tsi tsakáronhte wahkarihwanírate wesatkónten, satón꞉nions, ‘Wahinonwarhiákhon ne Roiá꞉ner roiatahrá꞉kwen.’”
17Ne Táwit watahrihwaʼkwáhnion kí꞉ken kanikonraksénhtshera ne ne Saul raorihwáke tánon ne roién꞉ha Jonathan. 18(Wahaténhnaʼne nètho Karénhna ne Ahén꞉na nahonwatiʼrihónhnien nonkweʼókons ne Judah nón꞉we; thóh nón꞉we nikaiá꞉ton Kaiatonhserákon ne Jashar.) Wahén꞉ron:
19Ne saiataneraʼkwáhtshera, Ó Israel, thóh káien iawenhé꞉ion thóh káhere éhʼneken ne sáwenk tsiotenáktahtes!
Tsi niʼiohtahtiténhrat ne ratisháststes rotiʼiatsenénhen!
20Tó꞉sa thóh nón꞉we iaserihhówahnat ne Gath nón꞉we,
tó꞉sa serihʼhówahnat ne tsi tekanatokénserons ne Ashkelon;
khéhs tó꞉sa sehrí꞉on nakoioʼokónʼahs ne Philistines nakontsenhnón꞉ni,
ne sakotiʼioʼó꞉kons ne iáh tehonaʼtewarakwátarons kwáh enhontsenhnakaráthaʼte.
21Í꞉se ne tsi ionontarónhnions ne Gilboa,
kwáh tó꞉sa othènon aioháweiaste khéhs nahisakénhnore,
khéhs nahonsahiokwátston ne kahentákes!
Asèken thóh nón꞉we ne ratrenostákwah ne roshaststenserowánen naʼtekentiónston,
ne ratrenostáhkwah ne Saul, iáh shé꞉kon tahonsawenhiená꞉ronke nonwénhton.
22Thóh nitsiawénon ne raoʼtinekwénhsa ne ronwanawénkʼton,
thóh nitsiawénhnon tsi nihonarésenskwe ne ratisháststeskwe,
ne raohén꞉na ne Jonathan iáh thaʼtetsiókton,
khéhs ne raosarehkó꞉wa ne Saul thaʼtetsiókton ne iáh othènen tahiorihontákwen.
23Ne Saul tánon ne Jonathan kwáh í꞉ken tsi ronwatinorónhkwahkwe ó꞉ni ronwahtikweniénstahkwe!
Tsi ninónnhekwe ó꞉ni ne kenheiát꞉ne iáh kiʼ tatehonwatikháshion;
ronhnón꞉ha sén꞉ha teotikhá꞉kwe tsi ní꞉ioht nakweskówa,
ronhnónha sén꞉ha tenishástekwe tsi ní꞉ioht ne kénreks.
24Ó naothonwisénhtseras NʼIsraerʼronónke, tetsisewasént꞉thos ne Saul,
raón꞉ha tsi sewasheronhniáton ne onekwénhtara sewatserón꞉nias, ne iókwats,
raón꞉ha tsi sewatsténhni ne atnió꞉tas ne owistanó꞉rons í꞉kens ne sewatʼtseronhniakwáhkes.
25Tsi nihotiʼiatsienénhʼen ne ratisháststes
thóh tsi waterí꞉io!
Ne Jonathan thóh raiátaien ronwanonwarhiákhon tsi nón꞉we ne éhʼnekens tsiotenatʼthates sewáwenk.
26Wakenikonráksens ne sarihwáke, tiaʼtatèken Jonathan;
kanoronkwahtserowánen kén ne ní꞉se nakerihwáke;
ne sanoronhkwáhtsera tsi nòkwah ní꞉i tsi niʼionerakwátonne,
sén꞉ha isiʼnónwe nikènʼne tsi ní꞉ioht ne konnón꞉kwe.
27Tsi nihotiʼiatsenénhen ne ratisháststekwe,
tánon ne ionteriʼiostákwa iotón꞉on!
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.