2 Tiér 3
3
Ne Wahrahrátston Tsi Tontáre Ne Roiá꞉ner
1Tekanóron tewatenrosónhas, ónen ne kí꞉ken ne tekeníhaton ienkwaiátonse. Tetsáron kí꞉ken kahiatónseras wahkatheniénten ne kwáh onikonróskon tsi akwanikonkénsko tsi kwehiarakwenʼnis kí꞉ken nahorihoténsons. 2Tewahkatonwentióni naisewahteriéntarake nowennasónhas tsi nihonatatíʼon ne rotihiatatokentísons ne iehatiriwákenskwe, tánon ne karihonniennítsera tsi nitsawénon rahonháke ne Roiá꞉ner ó꞉ni ne Sonkwahiátakwen neh tsi nitsitʼtsiʼiáwi neh ietʼtsihiateriwahnótanis. 3Ne tiotserentákwen, kwáh teiontonwentióʼon naisewahnikonraiéntaʼne nonàken tewenniseráthes ótiakes enhontotashiónko ne tsi ronnónhne ne tiakoniarótaron ne kariwahétken ahskanéktshera. Kwáh ténʼiet tsi ieron 4tánon enhatiriwahnónton, “Rohrahrátston tsi tèntre, iáh kén tehorahrátston? Kaʼnón꞉we ní꞉res? Ietʼthisotʼthonkonkén꞉en knaronenhéion, nók kíʼ kwá sékon akwéʼkon thóh ní꞉ioht kwáh tsi ní꞉ioht tsi shontonthonhontiónni!” 5Kwák tahónnethe wahontarónti ne kwáh wahónnise tsi náhe Rawenni꞉io thóh tenʼnáhon, ó꞉ni neh tsi karonhiáte ó꞉ni ne tsi ionwentsiáte onthé꞉sa. Tsi ionthonwentionʼníʼon awènke nón nitsawénon tánon onékanos nahóten ionniáton, 6tánon onékanos áhre, ne nonékanos wahkawennótonste, néhtho nowentsiakáʼion ontonwentsiá꞉ton. 7Tánon nónwa nikaháwis ne tsi karonhiáte ó꞉ni ne tsi ionwentsiáte kwáh kanónstaton tánon ó꞉ni ne sáka tsi ní꞉ioht tsi rotennáʼon ne Rawenni꞉io, neh tsi ótsire enkariwátonte. Neh aoríhwa kanónstaton neh tewenniserónte nónen ne iáh teiakoniʼioseráien teiontatiatórete ó꞉ni enhiontatháthonte.
8Nók tioríwa thósa sewanikónren, tekanórons tewatenrosónhas! Kwáh iáh thènen tatʼtetsatʼtí꞉en ne rahonháke ne Roiá꞉ner tsi nókwah ne sewenníhsera tóhka ó꞉ni ne énskat tewenniawehetserásen niʼioseráke; neh rahónha kwáh ne tetsáron ne sathèhiot. 9Ne Roiá꞉ner iáh tehohiatakenhéion ne thóh naháiere tsi nihorahrátston, tsi ní꞉ienre nótiakes. Kék, iárare, tsioríhwa tsi iáh tatehotonwentióni nónka aiehiatáton, nók neh tehotonwentióni ne tahonsahiontkaraténi tsi nihiakoriwáneren.
10Nók nentewenniseráteke ne Roiá꞉ner thóh ní꞉ioht tsi tètre tsi ní꞉ioht ne ranénskwas. Ne thóh entewenniseráteke ne tsi karonhiáte enwáton tsi nenwatáti ne iowennothí꞉ie, tsi nahoténsons ne tsi karonhiáte enwákʼtsa ó꞉ni enkariwatónthon, tanon ne tsi ionwenhtsate oni nahoiotenhsera ne thóh nonwe nikaiotenhen, tsi enwenene. 11Tsi kwáh oriwakwékon kíʼ thóh ní꞉ioht tsi enkariwathónton, onhníse nashonkwetoténhake? Ne tsi tiónnhe teiothonwentióʼon naisathonkwetaʼkwaríshion tánon nahontatienikonraiérite ne Rawenni꞉io, 12tsi sárahre ne thóh nónwe tewenníserate ne Rawenni꞉io rawenniserahrákwen tánon iatesatátʼtiahat ne iosthóre thóh naiáwen꞉ne—neh thóh nónwe entewenniseráteke nónen ne tsi karonhiátes enhióteke ó꞉ni enkariwathónton, tánon tsi nihioteriwatséren ne tsi karonhiáte enkawistanáwen tsi nihiotarí꞉en. 13Nók ne kíʼ ionkwaráhre tsi nahóten ne Rawenni꞉io rohrahrátston: áse enskaronhiáteke ó꞉ni áse enskénhake ne tsi ionwentsiáte, tsi nónwe ne kariwakwarishióntsera enkenteróntake.
14Tánon káti, tewatenrosónhas, tsi nisárahre nètho tewenniseráte, iatesatátʼtiahat naisariwathokénhake ó꞉ni tóhsa thènen aisaníkon rahohénton ne Rawenni꞉io tánon skénnon ahkénhake tsi natetiátere. 15Neh thesatʼkáneren tsi nihonikonkátsthe ne Sonkwaiáner tsi nihiatesennáwis nahonsaseniáken꞉ne, kwáh tsi ní꞉ioht nonkwaterohseraʼnóron Kór ietsisewahiatónni, ne rótston natʼthokhátseta ne Rawenni꞉io thóhʼwi. 16Kén nahoténsons ráton kwáh tsi níkon ne rahohiatonserasónhas nónen thènen enhahiáton noriwasónhas. Kwáh thóh tsi niwateriwentórens ne rahohiatónseras neh iáh teieriwaientéris ó꞉ni thonatotʼtani óia ní꞉ioht tsi enhatinikonraiéntathe, tsi nihatiʼiérah naktéson nateriwanothátsheras ne oriwatokéntis. Káti ronónhak khók rontatonniénnis ne kariwaiesátsheras.
17Nók níse, tewatenrosónhas, ónenk sewateriéntare kí꞉ken. Sewatatenikonrárat, nekáti, netósa rohnónha aietʼtsihiasárine tsi natehonterientawéries ne iáh thènen karíhwa tèken tsi nókwah ne kaianerénsera tánon ahontesewahiáthen꞉ne tsi nónwe nisewahtienawáston. 18Nók iasewatasónteren sewatehiáron thóh nónwe ne rahotenretserákon ó꞉ni ne rahotʼthokhatserákon ne Sonkwaiáner ó꞉ni Sonkwaiatákwen Ié꞉sos Kerístos. Rahónha ne kahiatanerakwátsera, nónwa ó꞉ni tsi nénwe! Éhʼtho naiáwenʼne.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.