2 Chronicles 2
2
Ratiʼweienénhtas Nahonsaʼkanonhsonhníhake Nononsatokentiʼkówa
(1 Kings 5.1-18)
1Né Ronnontí꞉ioʼkwe Solomon iathorihwaiénthaʼse nahanonhsónhni nononsatokentiʼkówa tsi nón꞉we ne Roiá꞉ner enhonwasenhnaʼientákwahke, tánon ó꞉ni enhathateʼnonsónhnien nonʼné꞉e ne rahónha. 270,000 niháti ronhnónkwe waʼshakóteron nahatikaréhni ne ionhtenonshonhniáthas, tánon 80,000 nihá꞉ti enhotihióten ne ahatinenhiakwétarons né tsi ionhnonhtarónhnions kanakerasehráiens. 3,600 né thihá꞉tiʼte ronaterihwaiénhniʼkwe nashakonaʼtenikonhrashón꞉teraʼse ne kahioténhseras.
3Né Solomon iahoterihwaniétaʼse ne Ronnontí꞉io Hiram né Tyre nón꞉we: “Tsi naʼtetsaterihwashontérahkwe ne Táwit rakenikén꞉en tetiateniethénhni nonenhtakwetétseras karontasónhas nahatenonshónhni ne kanonhtiʼiótshera kanón꞉sa. 4Wakatenonhsonhnihátie ononsatokentiʼkówa né nahikwéniensʼte ne Roiá꞉ner akeNí꞉io. Kwáh í꞉ken tsi enhiothokénhtiʼke tsi nón꞉we nakonhkwetaʼshón꞉as tánon ní꞉i nenhsakwahsenhnaʼientákwahke tsi enhiakwahtsaháthake ne kanetanórons tánon ne kanonkwahtsherákons ne rahohénton, tánon tsi enhiorihwatokénhake tsi entiakwahiésthaʼke ne ionatarahtokéntis, tánon tsi nón꞉we nenhiakihiateskónhthaʼke ne kontitshé꞉nens niaʼtehioronhkhetsheráke ó꞉ni niaʼtehiokarahtsherá꞉kes, tánon ó꞉ni niawenhthatokentíkes, tsi nenská꞉rahne noráhkwahse tsi naʼtehionhtenonwerátons, tánon ó꞉ni noiáshons ne wenhtanó꞉rons nahonwakweniénsthaʼke ne Roiá꞉ner onhkwahNí꞉io. Sakonáhon Nisraeʼró꞉nons thóh kíʼ nahatiʼiérahke né꞉ne tsi nénhwe enkénhake. 5Né wakeríhwaien né kanonhshowánen ononsatokentiʼkówa akatenonsónhni, tsioríhwa nonkwahʼNí꞉io tsi sénhha tehotenonhianíton tsi ní꞉ioht nakorénhsons niʼiohokónhas. 6Ethosáne iáh ónhka kwáh taiekwéni nahonwanonsónhnien nononsatokentiʼkówa ne Rawenni꞉io, tsioríhwa ské꞉kon né kwáh tsoterón꞉hiaʼte iáh kíʼ takakwéhni nahotiénawasʼte. Onhʼká꞉ti ní꞉ioht tsi akʼkwéni nakenonhsónhni nononsatokentiʼkówa né nék khók akénhake tsi nón꞉we nahonwatʼtsaháthaʼse ne kanetanóron ne Rawenni꞉io? 7Ónen ká꞉ti né tatiaténiet ne rónhkwe ne rorenhnáhon taharistahiatónhnion, tsi ahohióten nowistanoronsónhas, kawistaráhkens, notsínekwar nikaristhó꞉tens, tánon ne karístatsis, tánon ónhkak ne rorenhnáhon nahashónhnionhwe norón꞉hia, arihwakonhnéhas, tánon nonekwénhtaras niwaniataró꞉tens. Né skát꞉ke enhotihióten ne Judahró꞉nons tánon ne Jerusalemró꞉nons ne rotihiotenhserarenhnáhons né꞉ne tsi nikáien ne rakeníha Táwit sakohiataráhkwen. 8Waʼkateriéntare tsi nihotiʼhiotenhseraʼrenhnáhons né shonkweʼtashón꞉as ne ratirónh꞉tiasts, ká꞉ti taskateronhtahteietas nonenhthakwenhtétsheras, nonentaónwes, tánon ne nonénhtas okonhré꞉tsas ne Lebanon nón꞉we watónhnis. Waʼkatateweienhnenhtáhon niaʼkeiaténieʼte nakonkwetashón꞉as nahonwatisnié꞉non ne shonkwetaʼshón꞉as 9nahatiʼweienénhtaʼne ne karienowánenhs okonhré꞉tsas, tsioríhwa kí꞉ken ononsatokentiʼkówa né í꞉kereh akatenonhsónhni tsi enkanonhsohwánenhke tánon enhiononsanerahkwahtónhake. 10Tsi naʼtahonatonhontsoníhake ne shonhkweʼtaʼshónhas ne rahtirónhtsiasts, kwáh 100,000 nikawinotserákes nó꞉natsia, 100,000 nikawinotserákes ne tehiotikonstónhres, 110,000 nikaweró꞉kwahkes né ienekiráhtha otsítsia, tánon 110,000 nikaweró꞉kwahkes iakeniewátha kénʼie ienkonhiateniéthaʼse.”
11Né Ronnontí꞉io Hiram thontahohiatonhseraʼteniéthaʼse ne Solomon tsi watharihwaseráko. Wahaiáton, “Né aoríhwa ne Roiá꞉ner tsi nisakonerónhkwah ne rahonkweʼtaʼshón꞉as, í꞉se waianontí꞉iosʼte. 12Tehonwanonhweráton ne Roiá꞉ner Sakoní꞉io í꞉ken ne Israerʼró꞉nonke, Rahónha ró꞉sons tsi karonhiáte ó꞉ni tsi ionwenhtsáte! Thóhwi ne Ronnontí꞉iokwe Táwit né raoʼnekenterón꞉tshera naʼtenikonhratʼthokhátshera, ne rahónha ó꞉nenh né ratenikonhrón꞉nis nahononhsónhnien nononsatokentiʼkówa ne Roiá꞉ner tánon nahathatenonsónhnien nón꞉neʼe ne rahónha. 13Ienhkonhiateniénhten né rahtenikonratʼthókha tánon ne rohiotenhserarenhnáhons ne karístatsis ahohióten Huram ronwáiasts. 14Né ronistenkénʼen Dan raotiʼtsiokwáhkon nón꞉we niʼiehiátarahkwe tánon ne ronikénʼen Tyre né nón꞉we tanákereʼkwe. Roteriéntare onhní꞉ioht tsi aronhniánion ne owistanórons, kawistarákens, notsínekwar karístatsis, karístatsi, nonénhia, ó꞉ni nó꞉iente. Enhakwéni nahashón꞉nionhwe norónhia, narihwakonhné꞉ha, tánon nonekwéntara oniataráhas, ó꞉ni ne waniatarí꞉hios. Enhakwéni ne kwáh tsit nahoténsons ahoióten ne taharistahiatónhnion tánon enhakwéni nahásehre nahawenhnanóten ne karasthánions nahontahónhion. Tseríhon skát꞉ke rotihióten ne shonkweʼtashón꞉as ne rotiʼhiotenhseraʼrenhnáhons nahotihióten tánon tsi nihá꞉tiʼkwe ne ianikénʼen Ronnontí꞉ioʼkwe Táwit ronhwahiotenhséhakwe 15Ká꞉ti ó꞉nen taskwahteniétas nonátsias, tehiotikonstónres, notsítsa iehnekiráhtha, tánon ne iakenhiewátha kénies né tsi nisharahrátston. 16Né tsi ionontarónhnions ne Lebanon kwáh enhiakwahronhtsákons nonenhtakwenhtétsheras tsi natesatonhontsóni, enhiakiwanerénkʼkons tsi enhiakhinioserónhnien, tanon enhiakinawenhte thóh kaniatarakekowahne Joppa nón꞉we niahawenonhatse. Ehnonhwe enwaton ne Jerusalem niasawe.”
Tsi Akanonsonhníhake Nononsatokénti Tonhtásawen
(1 Kings 6.1-38)
17Né Ronnontí꞉ioʼkwe Solomon washakosenhnarónhnion ratikwé꞉kon ne tihononhontsátes ne tsi watonhontsáien Nisraeʼró꞉nonke ratinákerekwe, né sáka tsi nisakosenhnarónhnionkwe ne ronikénʼen Táwit. Né꞉ne 153,600 nihá꞉tiʼkwe ne tihononhontsátes ratiterónhtakwe. 1870,000 nihá꞉ti washakohioténhseron nahatikaréni ne ionhtenonsonhniatashónhas tánon 80,000 nihá꞉ti nahatinenhiakwétaron tsi iononhtarónhnions, tánon 3,600 nihá꞉ti washakónaʼne nahonwanaʼtenikonhrashón꞉terahse né norihwí꞉io ahonhnónhni ne kahioténhsera tsi enkahioténhʼen.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.