1 Thessalonians 2
2
Ne Kór Rahohioténsera Ne Thessalonica Nónwe
1Onhkwaténros, iatesewahiáti sewateriéntare tsi iakwanatarénase iáh ne thènen ne iáh thènen tahiorihontákwen. 2Sewahteriéntare ónenk ionkihiatʼkontáʼon ó꞉ni ionkinikonratsáton ne Philippi nónwe nohénton niséke niaiákwe né꞉ne Thessalonica nónwe. Tánon kíʼ-ó꞉ni iawerohátsien tsi wéso totiriwahrékwen, nonkwaNí꞉io tashóntion ne kanikonranirátʼtshera naiakwatʼróri ne kariwí꞉ios tsi nitewétha ne rahonháke. 3Tsi kwahʼretsiárons iáh ne tekakenserákwen naʼterientawenrétshera tóhkaʼ ó꞉ni ne iáh aóskon takénhake, tánon iáh teiakwatheniéntha nónkak ahiakinikonráh꞉ten. 4Kék, tiókonte thóh ní꞉ioht tsi ionkwátare tsi naʼtehotonwentió꞉ni ne Rawenni꞉io, tioríh꞉wa tsi tesonkwaiatoréton tsi ionkwaríhonte nashonkwaniáhese tsi nòkwa ne kariwí꞉io. Iáh teiakwateniéntha nónkwe ahontaiatʼkhinikonraiérite, ónk Rawenni꞉io ahontasakwanikonraiérite, tsi nikáien ne shonkwátʼkense tsi nihiakwaweiennótens. 5Kwáh íken tsi sewahteriéntare tsi iáh thóh iséke tiehionkwénon ne karensarontsherákon tsi ní꞉ioht tsi ahionkwataráke, iáh ó꞉ni owennasónhas tehionkwáston naiakwaróhroke ne ahskenátshera—Rawenni꞉io ne sonkwariwaniráti! 6Iáh tehionkwateniénten nónka ahionkihiatanerákwathe, iáh niséke iáh ó꞉ni notiakhésons, 7éhʼtho sáhne tsi Kerístos sakwateriwahnótanis ahiontónʼon ne iatékon akwariwahnontónni. Ónk tionkwariwaiérikwe ne skát꞉ke sítewes, kwá tsi ní꞉ioht ne kanisténsera iakonikónrare nakohiohokónha. 8Tioríwa ne tsi nikwahnorónkwah ionkwahtateweienʼnentahónk taitewahiéna iáh nek tèken ne kariwí꞉ios tsi nitsiawenón ne Ni꞉ióʼne ónk tsi iatiónnhe ó꞉ni. Tsi nióʼre tsi kwahnorónkwahkwe! 9Orihwiʼioʼónwe sewahteriéntare, tewahtenrosónhas, tsi ní꞉ioht tsi ionkwahiotén꞉en tánon ioioʼtenhserahní꞉ron! Kontahsésons tánon asontakwékʼkons wahonkwaióten né꞉ne tóh꞉sa thènen takwahnikonráhren tsi enkwahteriwahnótʼthase ne karíhwí꞉ios tsi nitsawénon ne Ni꞉ióʼne.
10Í꞉se nonkwahrihwahnirátʼtsheras, tánon ó꞉ni ne Rawenni꞉io, tsi ní꞉ioht tsi wahakwahtoriáneron ne tionháke tsi tisewetákwen kwáh iáh thènen tewahétʼken, kwáh thóh ní꞉ioht tsi ahionkwahterihwahtentiáton, tánon kwáh tóhsa thènen ahkénhake ne Í꞉i ahontahionkwáhterahse. 11Sewahteriéntare kwáh thóh ní꞉ioht tsi watkwahriwásniese tsi ní꞉ioht ne rohtiwirahiénton tsi tesakotirihwásniese ne sakotiʼioʼokónhas. 12Wahʼkwáhʼnikonráhreke, wahkwáhʼnikonrahnirate, tánon iahakwahkóntakwe wakwahʼretsiáron thóh ní꞉ioht tsi tsiónnhek tsi nitanón꞉wes ne Rawenni꞉io, tsi nikáien ne iehianátons nashatiátaren ne Raonakerahserákon ó꞉ni ne raohiatanerahkwatsherákon.
13Tánon séhkon óia nahorihóten nontiéren tsi tehtsitewahnonweráhtons ne Rawenni꞉io. Shontakwahawíh꞉ten ne Rawenni꞉io raoterihwahnothátshera, wesewáhronke tánon wesewahtiénawaste, naterihwahnotátshera iáh onkwé꞉ne tetsiawénon ónk ne tsi Rawenni꞉io raoterihwahnotátshera, ne tsi kwáh neh íken. Aséhken ne Rawenni꞉io tionháke nón nihohʼiotáties tsi níh꞉tion ne tisewetákwen. 14Tewatenroʼshón꞉a, kwáh ne saoríhwa tsi nesewahiátawen tsi nihotihiatawén꞉en ne thonwetákwen ne Rawenni꞉io ne Judea, nonkweshonhas neh nonwe tsi niháti ne Keristos rahonkwetashonhas. Tsi nesewaronhiaken kwahn ne saoriwak tsi naitsisronhiakente ne akatne sewanakere tsi ne nahonwatironhiakente ne Sitaeró꞉nons. 15Ónhka ronwahnonwahriákon ne Roiá꞉ner Ié꞉sos tánon ne rotitokenséhakwe, tánon wahonkhironiákente. Tóh nihonwahnikonrakʼsátha ne Rawenni꞉io! Kwáh onhkwetaʼkwékon tsi sakonateniakatstʼsténnis! 16Kwáh ó꞉ni wahontheniénten ne tahionkhítaste nahiakhiiateriwahnótʼtase ne iáh-tahatiʼsitaerónons nahontahotíhawe ne kahiatakenátshera. Thóh káti kí꞉ken ní꞉ioht tsi tahontatʼtawíten niahontésa akwékon tsi níkon rotirihwáhneren. Tánon káti ónen ne Rawenni꞉io rahonakwáhtshera wahthonatasénten!
Kór Raskáneks Ne Séhkon Iahonshasakonatarénase
17Nók ne iatehiakwahiáti, tewatenroʼshón꞉a, nónen kén nikaríwes shatetionkwahtetʼkháshion—iáh tsi nòkwah ne onkwahnonthonʼniontsherákon, iáhʼse nekʼkhók nonkwahierónta—tsi nakwahiatisáh꞉ke tánon tsi nahakwahkwísron ne shékon ahonsakwáhʼken! 18Tehionkwahtonwenʼtiónihne niséke niahonsahiákwe. Hiatetiáti wahkateniénten ne thóh niahonsáh꞉ke iáh nénskat khók tshieioteráts꞉ton, nók ranesonrónon iáh teshonkwahriwáh꞉wi. 19Aséken naoten nónkwahrahrátʼtshera, ó꞉ni nonkwatʼtsennonniátshera, tánon neh hiationniátha tsi tehionkwahtaterensaron nonkwahtesenniéntshera tsi tho꞉ires ne Sonkwaiáner Ié꞉sos nóh꞉nen tsi nahténtʼre? Í꞉se! 20Kwáh꞉se, í꞉se nonkwarensaróntsera ó꞉ni nonkwatʼtsennonniáh꞉tshera!
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.