1 Samuel 2
2
Hannah Aoʼterennaientáhtshera
1Hannah onterénnaien tánon wakén꞉ron,
“Nakerhiá꞉ne iotonnáhere raonʼháke ne Roiá꞉ner;
nakeshatsʼténsera iehiothaʼratáton rahonháke nakeʼNí꞉io
Ne tsiksakáronʼte iakosterístha ne iónkswenhs,
tsioríhwa tsi wakatonnáhere thóh akateshennietserákon.
2“Iáh ónka teiakoiatatokénti tsi ní꞉iot ne Roiá꞉ner,
iáh ónka téiete ne tsaʼtákʼta;
iáh nóiah tekensténhraien thóh nahiotónhake tsi ní꞉iot nonkwahʼNí꞉io.
3Tó꞉sa isiʼnónwe nonsashatáti shó꞉tsi kwáh ashenáieʼke,
tó꞉sa serí꞉hon natatʼkowahnátshera thóh nahontáwe tsiʼtsakáronʼte;
asèken ne Roiá꞉ner ne ne Ní꞉io nakwé꞉kon tseoteriéntare,
tánon rahón꞉a tsi niʼieweiennótens nónkwe rakontieríhara.
4Ne raoʼnahén꞉nas ne ratiʼshástsʼtes teiotsiá꞉kon,
ók ne rothitsiʼióhas ne ne ronatsiaʼtanák꞉tons ne kashastsʼténsera.
5Tsi nihá꞉ti ne ronáton wahontenhatserónhni ne ne tahonténhtsa tsi nihatíkhwa,
ók tsi nihá꞉ti ne rontonhkárhiaksʼkwe ne wahonrehsénhsthaʼkwe ne kanénhskwen.
Neh iáh tewátonskwe aiakowiraién꞉taʼne tsá꞉ta nahakowiraién꞉taʼne,
ók tsi niʼiákon neh wé꞉so iakowiraién꞉taʼkwe iáh othènen tesʼkástha.
6Ne Roiá꞉ner thatá꞉safas natón꞉nhets tánon raón꞉ha ieshá꞉has;
ieshaʼkoiaténtha tsi tsohontsáien ne kenhé꞉ion tánon tethesakoiataratʼténhstha.
7Ne Roiá꞉ner shesakotesténhni ne iakokwátsene tánon ne iakoténhtonhne wahakokwáhtsene;
eʼtàke sakaónhnis, kwáh ó꞉ni sakosenhnakarátats.
8Teshesakotástha ne iakó꞉ten thóh okenrá꞉ke;
saʼkoiatakarátats ne tsiaʼkotokʼtáni thóh tsi iokenratstòkoto ne wakenrontákwen,
ensakahónhnien skát꞉ne róntsien ne niothinontiʼiotserása
tánon ne enhatiʼiéna ne anitskwára ne tekarénhsaron.
Asèken ne tsi kanawahatótons ne tsi ionwenhtsá꞉te ne raówenk ne Roiá꞉ner,
tánon ononháke renskwáhere ne tsi ionwenhtsá꞉te.
9“Raón꞉ha enhanónsthate ne ronsitàkes ne rotirihwatókens raonkwetaʼshónʼahs,
ók kiʼ ne iakonkwetahétken kwáh kiʼ nènhne ieniontathasárhiake tsi tetsió꞉karas;
asèken iáh tó꞉ka kén ne tsi naʼiesháststeke neh aiontkwéniesʼte.
10Ne Roiá꞉ner ronwáswenhs kwáh kiʼ enhionthatá꞉tonhte;
ne kwáh éhʼneken thót꞉te kwáh entʼtáwere thóh karonhiáke.
Ne Roiá꞉ner kwáh enharíwente tsehionhontsakwé꞉kon;
raón꞉ha enhoshaststénseron ne raonnontí꞉io,
tánon enhoshastsʼtenserowaʼnénhake ne rohiatarákwen.”
Ne Eliʼs Tenonkwetahét꞉kenskwa Raonekenterón꞉tserashón꞉ʼahs
11Eʼthóhʼne ne Elkanah sahaténti Ramah nionsá꞉re, eh nenhnéʼe ne raksá꞉ʼa thóh reterón꞉takwe ne ne taorihwásnieʼse ne Roiá꞉ner, thóh raohénton ne ratsihénstatsi Eli.
12Nón꞉wa ne raoʼnekenteronhtsheraʼsónhas ne Eli tenonkwetahétʼkens; iáh othènen tehoniónhni ne Roiá꞉ner 13khés tsi nihotiʼiotenseró꞉tens ne ratiʼtsihénstatsis tsi nó꞉kwah nonkweʼó꞉kons. Nó꞉nen nón꞉kak ne enhionteriwaténtsiaʼte nahionteskón꞉ten, ne ratiʼtsihénstatsis raotiʼnhá꞉tshera éntre, tsi nikaríhwes nowáhron teionekónties, ne ráhawe ne áhsen naʼteionatóken tserawestákwah, 14tánon thóh iathenhá꞉wesheʼte onták꞉ne, kháhs ne iohón꞉ronhte, khéhs teienekontsetá꞉kwahke ontákne, khéhs ionteskontá꞉kwahke; kwáh tsi níkon ne tserahwestá꞉kwah iatenkawáhrakwe ne ne ratsihénstatsi khók enrá꞉ke. Thóh kí꞉ken nihotiʼiéren ne Shiloh nón꞉we kwáh ratiʼkwé꞉kon ne Israerʼró꞉nons neh thóh nón꞉we nihó꞉ti. 15Senhá꞉ki, nohénton ne ióʼresen nahontsahʼáhtonhke, ne ratsihénstatsi raonhá꞉tshera éntre tánon enhawénhase tsi niká꞉ien ne roʼtéskonʼte, “Tatié꞉wahron ne ratsihénstatsi ne nahateskón꞉takwe; asèken iáh taʼhaiéna ne teionekontséon owá꞉ron ní꞉se aonthá꞉tion, nék khók ne owará꞉kate í꞉ken.” 16Tánon tó꞉ka ne rónkwe enhawénhase, “Áhnion ne tontiérek rontsá꞉hat ne iórehsen, tánon eʼthó꞉ne iahá꞉shaf tsi nenhtesaská꞉neke,” kwáh nénh ne enhén꞉ron, “Iáh, kwáh ó꞉nenk tsi entesát꞉kaʼwe ón꞉wa; tó꞉ka iáh, kwáh kiʼ tentkanónton tsi ienkhaʼwe.” 17Káti ne raotiʼrihwanerahák꞉tshera ne kén nithotiʼiónsa kwáh í꞉ken tsi iorihowá꞉nenh ne raohén꞉ton ne Roiá꞉ner; asèken tsi nitonwawis ne Roiá꞉ner iáh thahoten ne kakwenienstatsera tèken.
Ne Raksáʼa Samuel Shiloh Nón꞉we Nihénteron
18Samuel roʼiotá꞉tiesʼkwe raoʼhénton ne Roiá꞉ner, ne raksá꞉a ne roʼteniiónte ne kwáh waʼniatarí꞉io ateniʼión꞉ta. 19Ne roʼnisténha ne shés ronʼionhniénhni niwá꞉ha atewéiara tánon ienʼonwahawíten niaʼteioseráʼke, ne nó꞉nen enhiaʼteró꞉sen ró꞉ne ne nianítaʼte niaʼteioseráke iateskónt꞉tha thóh nón꞉we Shiloh. 20Eʼthóhʼne kiʼ ne Eli kwáh enhohiatatérisʼte ne Elkanah tánon ne ró꞉ne, tánon ratónhnions, “Aiá꞉wenhs ne Roiá꞉ner ó꞉ia ahonsahiawíron tsi nenhtsowiraiéntaʼne kí꞉ken iónkwe ne tahonsahionatʼtákwen tsi nikáien tsiaʼtonhnaráni ne rahonháke”; tánon eʼthó꞉ne ó꞉nen tsi thotinónhshoʼte nienhénsne.
21Tánon ne Roiá꞉ner wahaiatatérisʼte ne Hannah; onthá꞉wa nahiowiraʼiéntaʼne tánon wahakonákeratsʼte áhsen nihá꞉ti roʼtiskenrakéte tánon tekeniiá꞉se tionathonwísen. Tánon ne raksá꞉ʼa Samuel wahatehiáron raoʼhénton ne Roiá꞉ner.
Eli Tánon Ne Raoʼnekenteronhtsherashón꞉ʼahs
22Ó꞉nen ne Eli kwáh í꞉ken tsi roksténha. Waʼhariwáronhke tsi nishakotiʼiéraʼse ratiʼkwé꞉kon ne Israerʼró꞉nons, tánon tsi ní꞉iot tsi skát꞉ne rónhrats ne konhnón꞉kwe tsi niká꞉ien iotiʼióte tsi iehiontawehiatʼtákwah naʼtoserá꞉kon ne tsi iontkenhnisahákwah. 23Waʼsakawénhaʼse, “Onhnonhtiéren tsi thóh nisewaiéra? Asèken kerihwarónhkhas ne sewariwahetʼkénseras tsi niʼietsiiatiéraʼse tsi nó꞉kwah kiʼ onkweʼó꞉kons. 24Tó꞉sa, kwaʼiohokónhas; tsi iáh tekarihwí꞉io nètho tsi nikerihwarónhkhas ne raokwetaʼshón꞉ʼahs ne Roiá꞉ner tsi waʼtewaterihwaréhni. 25Tó꞉ka ónkak aiontateriwánerakse naʼkó꞉ren, Ní꞉io enhakwéni nenhteshá꞉kone tsi niká꞉ien waʼtionterenhtáwenhreh; ók ónka aiekwé꞉ni nahontaʼiontáteʼne nón꞉kak aieriwáneraʼke tsi nó꞉kwah ne Roiá꞉ner?” Ók iáh teiakotahonsatháton ne raowenhnaókons ne ronwaníha; asèken thóh nihotenikonrón꞉ni ne Roiá꞉ner naʼsakononwarhiá꞉khon.
26Nón꞉wa ne raksá꞉ʼa Samuel iokón꞉taʼtse tsi rotehiaróntie thaʼtetsarónhkwen ne niaʼhahiataiérihʼne tánon taʼonikonraierihtonhátie ne Roiá꞉ner ó꞉ni nonkweʼókons.
27Ne ne raʼonkwé꞉ta Ní꞉io iahoiatórenhne Eli tánon wahawénhase, “Tiakariwakénniaʼte ne Roiá꞉ner kwáh ráwenh, ‘Waʼkatotáshion thóh kawatsiráke ó꞉ni ne sheʼshothokonkén꞉en thóh nón꞉we Egypt nó꞉nen shishaʼkonaskónhniswe thóh tsi roʼnón꞉shoʼte ne Pharaoh. 28Í꞉ih waʼhiʼiataráko thóh nón꞉we ne tékeniʼiawénhre nihotiʼtarákes ne Israerʼró꞉nons neh natʼtsihénstatsi ahá꞉ton, thóh iaharatʼténstake tsi ietsienharákwahke, nahatʼtsaháhtaʼke wenhnekerá꞉khon, ahteniʼión꞉ta ahatʼtserónhniaʼte nakʼkhénton; tánon tekheiá꞉wi ne raoʼtiwá꞉tsire ne ietsishotʼthonkonkénha akwé꞉kon tsi aiontʼtátʼtie ne notsirá꞉ke nahontahatíhaʼwe ne Israerʼró꞉nons. 29Nontiéren kátiʼ tsi naihsatetʼtséntaʼke tsi taskanéraʼke ionkateskontáni ó꞉ni ne iontáti nètho waʼkatenhnhá꞉hon, tánon sénha ne ietsikweʼniénstha ne sewanekenteronhtieraʼshónhas tsi ní꞉ioht ní꞉ih ne tsi neh sewarehsentsthákwah neh kwáh tsiórehsens ne akwé꞉kon tionká꞉wis nakonkwetaʼshón꞉ʼahs Israerʼró꞉nons?’ 30Ne kiʼ aoríhwa ne Roiá꞉ner ne Sakoní꞉io Israerʼró꞉nons rorihowanáton: ‘Í꞉i wakará꞉ratsʼte nétho sawá꞉tsire tánon ne raotiwá꞉tsires ne seshotʼtonkonkénhen ienhontawehiá꞉thaʼke ó꞉ni thenthatiʼiakénhseʼke nakʼkhénton ne tsi nénhwe enkénhake’; ók nón꞉wa ne Roiá꞉ner waharihówahnate: ‘Ahí꞉non ít꞉ken tsi nó꞉kwah ní꞉i; asèken tsi niʼiá꞉kon nenhiontʼkwéniensʼte kwáh kiʼ ní꞉i enkekwéniensʼte, tánon tsi niʼiá꞉kon nenhiontʼkénron kwáh kiʼ thóh nenhotiʼiátawenh nahotiʼnontá꞉nake. 31Satkáhtho, ne kawistáheks tsi tá꞉we nó꞉nen kwáh enkóniatse ne saʼsahtsténhsera ó꞉ni ne raotiʼshatsténhsera ne seshothonkonkénʼen tsi ratiʼwatsiratá꞉tie, nèkati nétho iáh ón꞉ka ne sahwá꞉tsire thahonnónhnheke nahotiksténhaʼne. 32Eʼthó꞉ne tsi nisanikonraronhiáken ní꞉se kwáh ensatʼkátho tsi naʼtesakarinekénʼen thóh akwé꞉kon ne iókwats tsi nenhtesaʼká꞉wenh Israerʼró꞉nons; tánon iáh ón꞉ka ne saʼwá꞉tsire nonwénhton tahonsahotiksténhaʼne. 33Kwáh saʼiá꞉ta khók tsi nítsion raón꞉ha kwáh iáh taʼhí꞉iatʼse ne tsiktsienharákwah kwáh kiʼ enhiʼiatanónsthaʼte ne tahonsaʼhakaseréntaʼne ó꞉ni tsi nihotsiónhnion tsi rón꞉nhe; ratiʼkwé꞉kon ne saʼwáhtsires ne enhotírhiokte nasaʼrekó꞉wah. 34Tsi nenhotiʼiátawenh ne teniʼiáhse saʼnekenteronhtserashón꞉ʼahs, Hophni tánon Phinehas, kwáh kiʼ neh ensheʼnésten—tenitsá꞉ron tenhníheʼie neh saʼhennísera. 35Ní꞉i kwáh tenhí꞉taste iaʼtetiá꞉ti ne roʼrihwatóken ratsihenstá꞉tsi, raʼónha kwáh ne enhateriwathéntsiaʼte ne entsioianénhaʼwe tsi nahó꞉ten í꞉wa nakwerhiá꞉ne tánon naʼkenikonrákon. Ní꞉i kwáh enhiʼwatsirónhnien ne iorihwatóken kawátsire, tánon ne raón꞉ha kwáh ienhataweiátʼthake ó꞉ni nienhaiakénhseʼke raoʼhénton ne riʼiatarákwen ne ne tsi nénhwe enkénhaʼke. 36Nón꞉ka iatheniakotaténhronhke ne saʼwá꞉tsire kwáh éntsien neh nahonwanéken ostón꞉ha kawistaráken khóks ne kaná꞉taro, tánon kwáh eniaiéron, Asathónhtaʼte thóh takí꞉teron tsi nón꞉we ne ratsihénstatsi nihénteron, neh naʼhón꞉ton ostón꞉ha takatská꞉on.’”
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.