Taybo 7
7
Geeshsha Dunkaaniya Anjiso Imotata
1Musey Geeshsha Dunkaaniya tokidi ongida wode he Dunkaaniyanne iya miishiya, yarsho bessaanne iya miishiya ubbaa zayten tiyidi geeshshis. 2Hessafe guye, Isra7eele asaa kochan kochan taybidi kaalethiya wode halaqa gidida ubbay, 3Godaas imota shiishidosona. Enti immida imotay nam7u halaqa sunthan issi para gaare, qassi issi issi halaqa sunthan issi issi booru oothidi, usupun gaaretanne tammanne nam7u boorata Geeshsha Dunkaaniya ehidosona.
4Goday Museko, 5“Geeshsha Dunkaaniya oosuwas go77ana mela neeni he imota entafe ekada, enta oosuwas oosuwas koshsheysada shaakada Leewetas imma” yaagis. 6Hessa gisho, Musey gaaretanne boorata ekidi Leewetas immis. 7Gedisoona kochaas koshsheysada shaakidi enta oosuwas nam7u gaaretanne oyddu boorata immis. 8Meraara kochaas koshsheysada shaakidi, enta oosuwas uyddu gaaretanne hospun boorata immis. Enta oosuwa aawatethan kaalethey kahiniya Aarona na7aa Itamaara. 9Shin Qahaata kochaa oosoy Dunkaaniya geeshsha miisheta hashen toho gidiya gisho Musey entaw para gaarenne booru immibeenna.
10Musey yarsho bessi Godaas dummayida gallas halaqati yarsho bessa sinthe banta imota ehidosona. 11Goday Museko, “Issi issi gallas issi issi halaqay yarsho bessi Godaas dummayanaw ba imota immo” yaagis.
12Koyro gallas ba imota ehiday Yihuda kochaafe Amnadaabe na7aa Na7asoona.
13Na7asooni ehida imotay geeshsha dunkaanen eretida mizaanen 1,500 giraame birape oosetida picca Saane, 800 giraame birape oosetida ollatiya saane, nam7aaka katha yarsho yarshanaw zaytera walaketida lo77o dhiille kumidaysa; 14qassi 110 giraame worqafe oosetida ixaaney kumida shaate; 15xuussa yarshos, issi wofaano, issi maraze, issi laytha urge dorsi; 16nagara yarshos issi kole; 17issifetetha yarshos nam7u boorata, ichashu marazeta, ichashu koletanne ichashu urge dorsata ehis.
Kaalliya hanko halaqatika Amnadaabe na7ay Na7asooni immidaysada banta imota ehidosona.
18-23Nam7antho gallasan Yisakoora kochaafe Zu7ara na7ay Natina7eeli ba imota ehis.
24-29Heedzantho gallasan Zabloona kochaafe Heloona na7ay Eli7aabi ba imota ehis.
30-35Oyddantho gallasan Robeela, kochaafe Shade7ura na7ay Elizuuri ba imota ehis.
36-40Ichashantho gallasan Simoona kochaafe Zurishadaya na7ay Salumi7eeli ba imota ehis.
41-47Usupuntho gallasan Gaade kochaafe Ragu7eela na7ay Eliyasaafi ba imota ehis.
48-53Laapuntha gallasan Efreema kochaafe Amhuda na7ay Elishama7i ba imota ehis.
54-59Hospuntha gallasan Minaase kochaafe Padazuura na7ay Gamali7eeli ba imota ehis.
60-65Uddufuntho gallasan Biniyaame kochaafe Gida7oona na7ay Abdaani ba imota ehis.
66-71Tammantho gallasan Daane kochaafe Amsadaya na7ay Aki7ezeri ba imota ehis.
72-77Tammanne issintho gallasan Aseera kochaafe Okraana na7ay Pagi7eeli ba imota ehis.
78-83Tammanne nam7antho gallasan Niftaaleme kochaafe Enaana na7ay Akira ba imota ehis.
84Yarsho bessay tiyetiya wode Godaas dummayanaw Isra7eele halaqati ehida imotay haysafe kaallidi de7eysa.
Birape oosetida tammanne nam7u picca saanetanne ollatiya saaneta; worqafe oosetida tammanne nam7u ixaaney kumida shaateta ehidosona. 85Issoy issoy 1,500 giraame birape oosetida picca Saane; qassi issoy issoy 800 giraame birape oosetida ollatiya saane, geeshsha dunkaanen eretida mizaanen he ubbaa 28 kilo giraame ehidosona. 86Ixaaney kumida tammanne nam7u worqa shaateta 1.4 kilo giraame geeshsha dunkaanen eretida mizaanen shiishidosona. 87Xuussa yarshos shiiqida mehey katha yarshuwara wolla tammanne nam7u wofaanota, tammanne nam7u maraze, tammanne nam7u issi laytha urge dorsinne, tammanne nam7u koleta nagara yarshos shiishidosona. 88Issifetetha yarshos laatamanne oyddu boorati, usupun tammu marazeta, usupun tammu koleta, usupun tammu issi laytha urge dorsata shiishidosona. Geeshsha Dunkaaniya dummayanaw tiya wode shiiqida yarshoti haysata.
89Musey Godaara odetanaw Geeshsha Dunkaaniya geliya wode caaqo taabotiya kamaa bolla de7iya nam7u kiruubetape giddon gididi Goday odishin si7is.
Currently Selected:
Taybo 7: GFBLVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
