Taybo 31
31
Midiyaame Bolla Dendida Ola
1Goday Museko, 2“Isra7eele asaa qohida gisho Midiyaame asaa olada halo keya; hessafe guye, neeni hayqada ne mayzata gakana” yaagis.
3Hessa gisho, Musey asaako, “Midiyaame asaa olidi Godaa halo keyana mela hinte giddofe guutha asaa olas dancisite. 4Issi issi Isra7eele kochaafe issi mukulu adde asaa olas yeddite” yaagis.
5Hessa gisho, issi issi Isra7eele kochaafe issi issi mukulu asay keyidi, tammanne nam7u mukulu olanchoti olas giigidosona. 6Musey kahiniya Alaazara na7aa Pinihaasa aawatethan, issi issi kochaafe issi issi mukulu asi dooridi olas yeddis; Pinihaasi bishe geeshsha miishetanne mallas punniya zaye ekidi bis. 7Goday Muse kiitidaysada, enti Midiyaame asaa olidi adde ubbaa wodhidosona. 8Ichashu Midiyaame kawota, Ewa, Reqeema, Zura, Huranne Reeba geetetiya asata wodhidosona; qassi Bi7oora na7aa Balaamaka mashshan wodhidosona. 9Isra7eele asay Midiyaame maccasaanne nayta di7idosona; enta mehiya, dorsaanne deesha wudiyanne enta miishe ubbaa di7idosona. 10Enti de7iya katamatanne enta gutata ubbaa xuuggidosona. 11Asaa mehiyanne de7idaba ubbaa ekidi bidosona. 12Enti di7ida asaa, mehiyanne shalo ubbaa Iyaarkofe hefinthan, Yordaanose shaafa matan de7iya Moo7abe denban dunkaanida Museko, kahiniya Alaazarakonne Isra7eele maabaraako ehidosona.
13Musey, kahiniya Alaazarinne maabara halaqati ubbay dunkaanida gutaape gaxa keyidi entana mokidosona. 14Musey olape simmida tora moconata, shaalaqatanne mato halaqata bolla hanqetis. 15Musey entako, “Maccasa ubbaa ayis wodhibeeketii? 16Enti Balaama zoriya si7idi, Pe7oora geetetiya bessan Isra7eele asay Godaa aggidi, boshan hayqanaada oothiday maccasa gideysa dogidetii? 17Hessa gisho, ha77i adde naytanne addera aqida maccas ubbaa wodhite. 18Shin addera aqiboona macca nayta ubbaa hintew ashshite. 19Hinte giddofe ase wodhida asi woyko aha bochida oonika gutaape gaxan laapun gallas utto; heedzantho gallasaninne laapuntha gallasan hintenanne hinte di77ida asaa geeshshite. 20Hessadaka ma7o ubbaa, galbafe, deesha ikisepenne mithafe oosetidabata ubbaa geeshshite” yaagis.
21Kahiney Alaazari olape simmida olanchotako, “Goday Muses immida higgiya maaray haysa; 22Worqa, bira, naase, birata, qorqoro, irsaase, 23taman meetetonnabati ubbay taman geeyanaw bessees. Shin taman meetetiyabati geeshsho haathan geeyanaw bessees. 24Laapuntha gallasan hinte ma7uwa meeccite; hintena geeshshite. Hessafe guye, gutaa gelite” yaagis.
Di77idabaa Shaaketidosona
25Goday Museko, 26“Neera, kahiniya Alaazararanne Isra7eele maabara halaqati di7etida asaanne mehiya taybite. 27Ola bidaysatasinne boonnaysatas nam7u kessidi shaakite. 28Ola bidaysata gishuwape ase gidin miizi gidin hare gidin dorse woyko deeshe gidin ichashu xeetape issino Godaas immite. 29Enta gishuwape ekida Godaa imota kahiniya Alaazaras immite. 30Hanko Isra7eeleta gakida gishuwape, ase gidin miizi gidin hare gidin dorse woyko deeshe gidin ishatammaafe issino ekidi Godaa Dunkaaniya aawatethan aysiya Leewetas immite” yaagis. 31Museynne kahiney Alaazari Goday kiitidaysada oothidosona.
32-35Olanchoti bantaw ekin attida di7oy 675,000 dorsata, 72,000 miizata, 61,000 haretanne 32,000 geela7o macca nayta. 36Ola bidaysata gakida gishoy 337,500 dorsata; 37entafe Godaas imetiday 675. 38Miizati 36,000; entafe Godaas imetiday 72. 39Hareti 30,500; entafe Godaas imetiday 61. 40Maccasati 16,000; entafe Godaas imetiday 32. 41Goday Muse kiitidaysada Godaa imota kahiniya Alaazaras immis.
42-46Ola boonna Isra7eele maabara gakida gishoy ola bida asaa gishuwara issi gina; ika 337,500 dorsata, 36,000 miizata, 30,500 haretanne 16,000 geela7o macca nayta. 47Isra7eele maabara gakida gishuwape ishatamu asaapenne mehiyape isso isso kessidi Goday iya kiitidaysada geeshsha Dunkaaniya aawatethan aysiya Leewetas immis.
48Hessafe guye, tora moconati, shaalaqatinne mato halaqati Museko shiiqidi, 49“Nuuni ne aylleti nu aawatetha garsan de7iya olanchota taybin issoyka pacibeenna. 50Goday nu shempuwa ashshida gisho, nu issoy issoy ekida worqa alleeqota, sagaayota, toho albota, migiddota, haytha worqatanne qoodhe worqata Godaas immanaw ekidi yida” yaagidosona. 51Museynne kahiney Alaazari worqa alleeqota ubbaa entafe ekidosona. 52Shaalaqatinne mato halaqati Godaas immida worqay nam7u xeetu kilo giraame gidis. 53Hanko olanchoti ehida di7uwa bantaw ekidosona. 54Museynne kahiney Alaazari shalaqatapenne mato halaqatape ekida worqa Godaa sinthan Isra7eele asaa hassayisiyaba oothidi geeshsha dunkaaniya giddo ehidosona.
Currently Selected:
Taybo 31: GFBLVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
