Taybo 3
3
Aarona Adde Nayta
1Goday Siina zuma bolla Musera odetiya wode de7iya Aaronanne Muse soo asay haysafe kaallidi xaafetidaysa. 2Aarona adde nayta sunthay, bayray Nadaaba, kaalley Abyooda, Alaazaranne Itamaara. 3He Aarona adde nayti ubbay, kahine gididi oothanaw tiyetidi shuumetidosona. 4Shin enta giddofe Naadabeynne Abyoodi Siina mela biittan Godaa sinthan geeshshi gidonna taman yarsho yarshidi hayqidosona. Entaw na7i baawa. Hessa gisho, enta aaway Aaroni paxa de7ida laytha ubban Alaazarinne Itamaara xalaali kahine gididi oothidosona.
Leeweta Ooso
5Goday Museko, 6“Leewe kochata ehada kahiniya Aarona maaddana mela enta iya sinthe shiisha. 7Enti Aaronanne Isra7eele maabara ubbaa Geeshsha Dunkaaniya sinthan dumma dumma ooso oothidi maaddo. 8Enti Geeshsha Dunkaaniya giddon de7iya miishe ubbaa aawatethan ayso. Isra7eele asaa gisho Geeshsha Dunkaaniya giddon ooso ubbaa enti oothonna. 9Aaronanne iya adde nayta maadana mela Leeweta shuuma. Enti Isra7eele asaa giddofe shaaketidi Aarona maaddana mela imetidosona. 10Aaronanne iya adde nayta kahine oothada shuuma. Entafe hara asi oonika Geeshsha dunkaaniyako shiiqiko hayqo” yaagis.
11Qassi Goday Museko, 12“Taani Isra7eelen yeletiya bayra adde nayta gisho Leeweta ekas. Leeweti tabaa. 13Ayis giiko, bayra yeletida ubbay tabaa. Ta Gibxe biittan bayra yeletida ubbaa wodhida gallasan, Isra7eelen bayra yeletidaba ubbaa ase gidin, mehe gidin, taw dummayas. Enti tabaa gidana. Taani Godaa” yaagis.
Leeweta Taybuwa
14Qassika Goday Museko Siina mela biittan, 15“Leeweta enta kochan, qassi enta soo asan asan tayba. Yeletin issi ageenanne iyape bolla gidida adde nayta ubbaa tayba” yaagis. 16Yaatin Goday kiitidaysada Musey enta taybis.
17Leewe adde nayti Gedisoona, Qahatanne Maraara. 18Gedisoona adde nayti Libinanne Same7a geetetoosona. 19Qahaata adde nayti Amraama, Yizihaara, Kebroonanne Uzi7eela. 20Meraara adde nayti Mahilanne Musa geetetoosona. Leeweta mayzati haysata.
21Nam7u Gedisoona kochati Libinanne Sim7a. 22Yeletin issi ageenanne iyape bolla gidida adde nayta tayboy 7,500. 23Gedisoona kochati Geeshsha Dunkaaniyape guyen wuloha baggan dunkaanidosona. 24Gedisoona kochaa soo asaa halaqay La7eela na7aa Eliyasaafa. 25Gedisoona kochaas Geeshsha Dunkaaniya bolla de7iya aawatethay, Dunkaaniya, gaatha kamaa, kare kamaa, wula magarajuwa, 26Dunkaaniya yuushon de7iya dabaaba magarajuwa, yarsho bessa magarajuwa, dabaaba wula magarajuwa, wodorotanne iyan go7etiya miisheta ubbaa aawatethan aysoosona.
27Qahaata kochati Amraama, Yizihaara, Kebroonanne Uzi7eela. 28Yeletin issi ageenanne iyape bolla gidida adde nayta tayboy 8,600. Qahaata kochati Geeshsha Dunkaaniya aawatethan naagoosona. 29Qahaata kochati Geeshsha Dunkaaniyape dugeha baggara dunkaanidosona. 30Qahaata kochaa kaalethey Uzi7eela na7aa Elzafaana. 31Enti Taabotiya, xarpheeza, xompe wothiya kocaa, yarshsho bessaa, kahineti go7etiya Geeshsha Dunkaaniya miisheta, Ubbaafe Geeshsha Bessaa geliya wula bolla de7iya magarajuwa aawatethan ayso. 32Leeweta halaqay kahiniya Aarona na7aa Alaazara. I Geeshsha Bessan ootheysatas shuuma.
33Meraara kochati Mahilanne Musa. 34Yeletin issi ageenanne iyape bolla gidida adde nayta tayboy 6,200. 35Meraara kochaa kaalethey Abikaala na7aa Zur7eela. Meraara kochay Geeshsha Dunkaaniyape pudeha baggara dunkaanidosona. 36Meraara kochay Dunkaaniya tuuqeta, liyoota, tuussatanne tuussati eqiya gedata, hessadaka giddon koshshiya miisheta ubbaa enti aawatethan aysoosona. 37Gujidika, Dunkaaniya yuushon de7iya dabaaba tuussatanne enta gedata, dhishetanne wodorota aawatethan aysoosona.
38Geeshsha Dunkaaniya sinthan doloha baggara Musey, Aaroninne iya adde nayti dunkaanidosona. Geeshsha Dunkaaniya giddon Isra7eela asaa gisho oosetiya ooso ubbaa enti aawatethan aysoosona. Hara asi Geeshsha Dunkaaniyako shiiqiko hayqo.
39Goday, Musenne Aarona Kiittidaysa mela issi ageenanne iyape bolla gidida Leeweta adde nayta tayboy 22,000.
Bayra Adde Nayta Wozo
40Goday Museko, “Yeletin issi ageenanne iyape bolla gidida Isra7eele bayra adde nayta taybada enta suntha xaafa. 41Isra7eele bayra adde nayta bessan Leeweta, qassi Isra7eele bayra mehiya bessan Leeweta bayra mehiya taw eka. Taani Godaa” yaagis. 42Goday Muse kiitidaysada Isra7eelen bayra yeletida ubbaa taybis. 43Yeletin issi ageenanne iyape bolla gidida bayra adde nayta tayboy 22,273.
44Goday Museko, 45“Isra7eele bayra adde nayta bessan Leeweta taw dummaya. Qassi Isra7eele bayra meheta bessan Leeweta bayra mehiya taw dummaya; taani Godaa. 46Isra7eele bayra adde nayta tayboy Leeweta bayra adde nayta taybuwape 273 aadhiya gisho he attidaysata taw woza. 47Issuwas issuwas geeshsha dunkaanen eretida mizaanen ichashu bira santimen woza. 48He wozo miishiya Aaronasinne iya adde naytas imma” yaagis. 49Palahidaysata wozo miishiya Musey shiishis. 50Geeshsha Dunkaaniya mizaaniya liken Isra7eele bayra adde nayta wozo miishiya 1,365 bira santime ekis. 51Goday kiitidaysada Musey wozo miishiya Aaronasinne iya adde naytas immis.
Currently Selected:
Taybo 3: GFBLVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
