Taybo 12

Aaroninne Mayraama Musera Eqetidosona

1Musey Tophe biitta maccas ekida gisho, Mayraamanne Aaroni Muse yaagidi boridosona. 2“Goday Muse baggara xalaala odetidee? I nu baggara odibeennee?” yaagidosona. Goday enti gidaysa si7is. 3Musey biittan de7iya asa ubbaafe aadhiya aada asi.

4Qoponna Goday Muse, Aaronanne Mayraamo, “Hinte heedzati Geeshsha Dunkaaniyako keyte” yaagis. Entika keyidosona. 5Goday shaara tuussara wodhidi Geeshsha Dunkaaniya pengen eqidi, Aarona! Mayraame! yaagidi xeegis. Enti nam7ay iya sinthe shiiqin, 6Goday, “Ta odeysa si7ite; hinte giddon nabey de7iko, ta iyaw qoncayis; qassi iyaw amuhon odayis. 7Shin ta aylley Muse hessada gidenna; I ta keetha ubban ammanetidaysa. 8Taani Musera som7on odetasipe attishin, leemison odike. I ta malaa be7ees. Yaatin, hinte ta aylliya Muse boranaw ayis yayyibeketii?” yaagis.

9Godaa hanqoy enta bolla eexin, I enta aggidi bis. 10Shaaray Geeshsha Dunkaaniya bollafe dendida wode Mayraama baro hargen milxi gada booxasu. Aaroni iiko simmidi xeelliya wode baro hargen oyketidaaro be7is. 11Aaroni Museko, “Hay ta godaw, nuuni eeyatethan oothida nagaraas nuna haysada seeropa. 12Iyo ba aaye ulope keyiya wode I asatethafe baggay meetetin, hayqidi yeletida na7a mela oothofa” yaagis.

13Yaatin, Musey, “Abeeti Godaw, iyo patharki” yaagidi Godaa woossis.

14Goday Museko, “I aaway I som7on cuttiyaba gidiyako, iya laapun gallas yeellara gam7awusu gidikee? Hessa gisho, laapun gallas dunkaaniya gutaape iyo gaxa kessada dumma bessan wotha; hessafe guye, simmada yo” yaagis. 15Yaatin, Mayraama dunkaaniya gutaape gaxa keyada laapun gallas uttasu. Iya simmana gakanaw asay gutaa aggidi baanaw dendibeenna. 16Hessafe guye, asay Haxeroota geetetiya bessaafe dendidi, Paarana mela biittan dunkaanidosona.

Currently Selected:

Taybo 12: GFBLVF

Highlight

Copy

Compare