Leeweta 6

1Goday Museko haysada yaagis; 2Issi asi hara asi hadara wothidaba woyko tal7idaba lahiko woyko bonqiko woyko cimmiko, 3woyko dhayidabaa demmidi ta be7abike gidi wordon caaqikonne asi oothiya haysa melabaape issuwa oothiko, 4hessan nagarancho gididi bentiko, kaysidaba woyko bonqidaba woyko hadara ekidaba woyko dhayin demmidaba, 5woyko wordon caaqidi ekida kumetha shaluwa godaas zaaro. Qassi ba naaqo yarshuwa yarshiya gallas ba ekidaba bolla xeetape laatamu kushe gujidi shaluwa godaas immo. 6Qassi ba naaquwa gisho Godaas yarsho yarshiya wode ba mehiya giddofe borey bayna issi maraze kahiniyako eho. He dorsay naaqo yarshos gate kuntheysa gido. 7Kahiney he dorsaa yarshidi he uraa naaquwa qushisees; he uraa naaqoy atto geetetana.

Xuussa Yarsho

8Goday Museko haysada yaagis; 9Aaronanne iya adde nayta haysada yaagada kiitta; xuussa yarshuwas de7iya wogay haysa; xuussa yarshoy sa7i wontana gakanaw yarsho bessan de7o. Tamay yarsho bessan qamma kumethi eexishe aqo. 10Kahiney liinope dadetida qamise ma7idi, sure dancidi, xuussa yarshuwa tamay mida biduwa kaashidi yarsho bessa miyen laallo. 11Yaatidi ma7uwa qaari wothidi hara ma7o ma7idi he biduwa gutaape gaxa efidi wogaada geeshsha bessan qolo. 12Yarsho bessaa bolla de7iya tamay to7onna ubba wode eexishe de7o. Kahiney wonta wonta mithi iya bolla gujo. Xoossa yarshuwa mitha bolla maaran wothidi, issifetetha yarshuwa modhuwa iya bolla xuuggo. 13Tamay yarsho bessa bolla ubba wode eexishe de7o; to7anaw koshshenna.

Katha Yarsho

14Katha yarshos imetida wogay haysa; kahine gidida Aarona nayti yarsho bessaafe sintha baggara Godaa sinthan yarsho. 15Kahiney issi kuuca lo77o dhiillenne zayte ekidi katha yarshuwa bolla de7iya ixaaniyara yarsho bessan Godaas sawo tonku giya qofiso yarsho oothidi xuuggo. 16Iyape attidaysa Aaroninne iya adde nayti uythi uukidi Dunkaaniya dabaaban de7iya geeshsha bessan mo. 17He uythay irshoy bayna uuketo. Taman xuussa yarshuwafe hessa taani entaw gisho oothada immas. Nagara yarshuwa melanne naaqo yarshuwa mela I ubbaafe geeshshi. 18Godaas taman xuussa yarshuwafe enta gakiya gisho gidiya gisho yaa yeletethan Aarona koche gidida addeti ubbay hessa mo. He yarshuwa, geeshshi gidonna oonika bochofo.

19Goday Museko haysada yaagis; 20Aaroninne iya adde nayti kahinetethan tiyetiya wode issi kilo giraame gidiya lo77o dhiille katha yarsho oothidi Godaas eho. Iyape baggaa wonta, baggaa omarsi yarsho. 21He dhiilley zaytera walaketidi loythi munuqetidi bashen uuketo; iya menthada yarsho bessan sawo tonku giya katha yarsho oothada Godaas yarsha. 22Qassi Aarona adde naytape iya kahinetetha laattanaw tiyetiya oonika he wogaa giigisees. Hessi Godaas ubba wode yarshetiya yarsho gidiya gisho kumethi xuugeto. 23Kahiney katha yarshuwa guye ashshona xuugganaw koshshees; I meetetanaw bessenna.

Nagara Yarsho

24Goday Museko haysada yaagis; 25Aaronasinne iya adde naytas haysada yaaga; “Nagara yarsho wogay haysa; nagaras shuketiya yarshoy xuussa yarshoy shuketiya bessan Godaa sinthan shuketto. He yarshoy ubbaafe geeshsha yarsho. 26He yarshuwa yarshiya kahiney Dunkaaniya dabaaban de7iya geeshsha bessan mo. 27He ashuwa bochiya oonika geeshshi gido; qassi shukishin suuthi ma7uwa bochiko he ma7oy geeshsha bessan meeceto. 28Ashoy kaxida otoy meqo; birata disten kaxidaba gidiko he miishiya qaacidi haathan meeccanaw koshshees. 29Kahine kochaafe adde gidida oonika he ashuwa mo; he yarshoy ubbaafe geeshshi. 30Shin Geeshsha bessan nagara atotethas suuthaa ekidi Dunkaaniya giddo gelidaba gidiko he mehiya ashoy meetetanaw koshshenna; I taman xuugetanaw bessees.”

Currently Selected:

Leeweta 6: GFBLVF

Highlight

Copy

Compare