Leeweta 20
20
Kiitetetha Ixoy Ehiya Seera
1Goday Museko haysada yaagis. 2Isra7eele asaas haysada yaagada oda; “Isra7eele asaape gidin, woyko hinte giddon de7iya allaga asaape gidin, oonika ba na7a moloka geetetiya eeqas aathidi immiko, I hayqo; Isra7eele asay iya shuchan caddidi wodho. 3Ba na7aa moloka geetetiya eeqas immidi ta Dunkaaniya tuniseynne ta geeshsha sunthaa kawushey ta sinthan ixetidaba gidana. Ta asaa giddofe shaakada taani iya dhaysana. 4Shin he uraa Isra7eele asay be7ishe qelli gidi aadhikonne wodhonna ixiko, 5taani he addiyanne iya soo asaa morkana; iyanne Moloka kaallidaysata enta deriya giddofe shaakada dhaysana.
6“Oonika tana ammanetona ixidi moytille xeegikonne maro soo biiko, taani iyaw morke gidana; asaa giddofe iya dhaysana.
7“Taani, Goday, hinte Xoossaa gidiya gisho, hinte hintena dummayite; geeshshi gidite. 8Ta wogaa naagite; iya polite. Taani hintena geeshshiya, hinte Godaa.
9“Oonika ba aawa woyko ba aayiw cayiko hayqo. I ba aawa woyko ba aayiw cayida gisho, iya suutha acoy iya bolla gido.
10“Issi asi ba shooruwa machiw xaalliko, enti nam7ay hayqo. 11Issi asi ba aawa machiw xaalliko, I ba aawa kawushis; enti nam7ay hayqo. Enta suuthaa acoy enta bolla gido. 12Issi asi ba na7aa machiw xaalliko, enti nam7ay hayqo. Enti tunabaa oothidosona; enta suuthaa acoy enta bolla gido.
13“Issi addey maccasara gaheteysada addera gahetiko, enti nam7ay ixetidaba oothida gisho hayqo. Enta suuthaa acoy enta bolla gido. 14Issi asi na7iwunne aayiw macho ekiko, hessi tunabaa. Hinte giddon tunatethi doonna mela inne enti taman xuugeto.
15“Issi asi mehera gahetiko, I hayqo; he miiziw wodhite. 16Issi maccasi mehera gahetiko he maccasiyanne he mehey nam7ay hayqo; enta suuthaa acoy enta bolla gido.
17“Issi asi ba aawa na7iw woyko ba aaye na7iw macho ekiko, hessi tunabaa. Enti banta asaa giddofe shaaketidi hayqo. I ba michiw kawushida gisho, ba nagaran baw oysheto. 18Issi asi kushe metora de7iya maccasara aqiko, I qetha qaarida gisho, enti nam7ay banta asaa giddofe kuretto.
19“Ne aaye michiw woyko ne aawa michiw xaallofa; hessa oothey ba mata dabbotetha kawushshees. Enti nam7ay banta nagaran oysheto. 20Issi asi ba aawa ishaa machiw xaalliko, I ba aawa ishaa kawushis. Enti banta nagaran bantaw oysheto; enti nam7ay na7a yelonna hayqana. 21Issi asi ba ishaa machiw ekiko, hessi tuna. I ba ishaa kawushis; enti nam7ay yelo dhayana.
22“Hinte daana mela ta hintena gelsiya biittay hintena cuttonna mela hinte ta higgiyanne ta kiitaa naagite. 23Taani hinte sinthafe dhaysiya asaa de7uwa wogaa kaallopite. Enti hessa ubbaa oothida gisho, ta enta ixas. 24Hinte enta biitta laatana; maathinne eessi goggey biitta hintew immana. Taani hintena hara asaape dummayada kessida, Godaa hinte Xoossaa.
25“Hessa gisho, hinte tunanne tuna gidonna mehetanne kafota shaakidi erite. Taani hessati hintew tuna gada wothida meheta, kafotanne biittan qaaxiyabata ubban hintena tunisopite. 26Taani Goday geeshshi gidiya gishonne hinte tabaa gidana mela hintena hara asaape dummayida gisho, hinteka taw geeshshi gidite.
27“Addey woyko macci moytillera haasayiko woyko marotiko, enti hayqanaw bessees. Enti shuchan cadetidi hayqo; enta suuthaa acoy enta bolla gido.”
Currently Selected:
Leeweta 20: GFBLVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
