Leeweta 10
10
Naadabanne Abiyooda Hayquwa
1Aarona adde nayti, Naadabinne Abyoodi, banta ixaane cuyisiya miishe ekidi iya bolla tama wothidosona; iya bolla ixaane gujidosona. Goday enta kiittiboona coo tama Godaa sinthan shiishidosona. 2Hessa gaason Godaa matape tami yidi enta min, enti Godaa sinthan hayqidosona. 3Musey Aaronako, Goday,
“Taani asaa giddofe taako shiiqeyisata,
ta geeshshatetha bessaana.
Qassi asa ubbaa sinthan
ta bonchetana”
gidi odidaysa haysa be7a.
Aaroni zaaro immonna si77i gis.
4Musey Aarona aawa ishaa Uzi7eela adde nayta Misa7eelanne Elzafaana xeegidi, “Haa yidi hinte aawa ishaa nayta aha Geeshsha Dunkaaniya sinthafe denthidi, gutaape gaxa kessite” yaagis. 5Enti yidi, Musey kiitidaysada enta kahinetetha ma7uwara enta aha tookidi, gutaape gaxa kessidosona.
6Musey Aaronanne iya adde nayta, Alaazaranne Itamaara haysada yaagis; “Hinte hayqonna melanne Goday ba asaa bolla hanqetonna mela hinte huuphiya meedopite; hinte ma7uwaka daakofite. Shin hinte ishati, Isra7eele asay, Goday ba taman wodhidaysatas yeeko. 7Godaa tiyo zaytey hinte bolla di7iya gisho Dunkaaniya pengefe kare keyopite; keyiko hinte hayqana” yaagis. Enti Musey gidaysada oothidosona.
8Goday Aaronako haysada yaagis; 9Hinte hayqonna mela Dunkaaniya gido geliya wode nenne ne nayti woyne ushshi woyko hara mathoyiya ushshi uyopite; hessi sinthafe yaana yeletethaas merinaw eqidi de7iya woga gidana. 10Hinte geeshshabanne geeshshi gidonaba qassi tunabaanne tuna gidonaba shaakidi erite. 11Goday Muse baggara odida woga ubbaa Isra7eele asaa tamaarsite.
12Musey Aaronanne attida iya adde nayta Alaazaranne Itamaara haysada yaagis; Godaas xuussa yarshuwafe attida katha yarshuwa ekidi irsho yeggonna uukite. I ubbaafe geeshshi gidiya gisho yarsho bessaa matan miite. 13Godaas xuussa yarshuwafe hessi nenanne ne adde nayta gakiya gisho gidiya gisho, hessa hinte geeshsha bessan miite; Haysa hinte oothana mela Goday tana kiittis. 14Shin yuusho yarshos shiiqida angaaysuwanne gedaa neeni, ne adde naytinne ne macca nayti geeshsha bessan miite. Hessi Isra7eele asay shiishiya issifetetha yarshuwafe nenanne ne adde nayta gakiya hinte gisho. 15Godaas yarshida gedaanne yuusho yarshos shiiqida angaasuwa modhuwara issife gathidi Godaa sinthan yuusho yarsho oothidi yarshanaw shiiqo. Goday kiitidaysada, hessi newunne ne adde naytas merinaw hintena gakiya gisho gidana.
16Musey nagara yarshos shiiqida deesha enti waatidaako eranaw koyidi oychis; I xuugetidaysa erida wode attida Aarona adde nayta, Alaazaranne Itamaara bolla hanqetis. 17“Nagaraa yarshos shiiqida ashuwa ayis geeshsha bessan mibeeketii? I ubbaafe geeshshi. Godaa sinthan asaa nagaraa diggidi asaas atotethi immana mela hessi hintew imetis. 18He mehiya suuthay geeshsha Dunkaaniya giddo geliboonna gisho, taani hintena kiitidaysada, hinte iya geeshsha bessan maanaw bessees, shin aggideta” yaagis.
19Aaroni Museko, “Heko, ha asati hachi banta nagaraa yarshuwanne xuussa yarshuwa Godaa sinthe ehidosona. Gidoshin, hessa melabay ta bolla gakis. Taani nagaraa yarshuwa hachi midaba gidiyako, Goday ufaytanashin attidee?” yaagis. 20Musey hessa si7ida wode iya zaaruwan ufaytis.
Currently Selected:
Leeweta 10: GFBLVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
