Kessa 36
36
1“Hessa gisho, Basili7eeli, Eliyaabinne Geeshsha Dunkaaniya keexana mela Goday hiillanne eratethi immida asa ubbay, Goday kiitidaysada ubbaba oothana” yaagis.
Imuwa Darotethaa
2Musey Basili7eela, Eliyaaba, Goday dumma eratethi immidaysatanne ooso oothanaw koyiya ubbaa xeegidi, oosuwa doomana mela kiittis. 3Enti, Isra7eele asay Geeshsha Dunkaaniya oothanaw ehida imo ubbaa Muse kushepe ekidosona. Qassi asay ba dosan immiya imota wonta wonta ehuwa aggibokona. 4Yaatin, Geeshsha Dunkaaniya oothiya hiillanchoti banta oosuwa essidi, museko bidi, 5“Asay, Goday kiitida oosuwas koshsheysafe aathidi eho bolla de7oosona” yaagidosona.
6Musey, “Geeshsha Dunkaaniya keexanaw oonika immiyaba ehopo” yaagidi kiittin, asay eheysa aggaagidosona. 7Enti ehida imotay ooso ubbaa oothi polanaw gididi palahees.
Geeshsha Dunkaane Oosuwa
(Kessa 26:1-37)
8Oosuwa ootheysatape hiillan aadheysati Geeshsha Dunkaaniya oothidosona. Enti iya al7o liinope, kaalosen ocha teera daaneysaninne zo7o qacinan alleeqisidi daddida tammu gesheta giigisidi, iya bolla kiruubeta misiliya sikidosona. 9Magarajoti ubbay issi gina gididi, adussatethay laatamanne oyddu wadha, gompay oyddu wadha. 10Ichashu gesheta issife gathidi sikidosona; qassi hanko attida ichashu geshetaka hessada oothidosona. 11Issife gathidi sikida geshetape issi magarajuwas wursetha gaxan kaalose afilape oosetida sagaayota medhidosona. Qassi issife gathidi sikida hanko geshetape issuwa gaxanka hessada oothidosona. 12Enti issife siketida koyro magarajuwa bolla koyro maaran kaalose afilape oosetida ishatamu sagaayota, hessadaka nam7antho magarajuwa bolla wursetha maaran, hanko sagaayota ginan, ishatamu sagaayota oothidosona. 13Enti nam7u baggan de7iya gesheta gasethidi issino oothanaw worqafe ishatamu oykiya bessata medhidosona.
14Geeshsha Dunkaaniya bollara kammanaw tammanne issi gesheta deesha ikisepe daddidosona. 15Tammanne issi gesheta adussatethaa laatamanne usupun wadha, gompaa oyddu wadha oothidi medhidosona. 16Ichashu gesheta issi baggara, qassi usupun gesheta hanko baggara gathidi sikidosona. 17Woli gathidi sikida geshetape wursetha magarajuwa macaran ishatamu sagaayota, qassi woli gathidi sikida hanko geshetape wursetha magarajuwa macaran ishatamu sagaayota medhidosona. 18Nam7u baggara de7iya gesheta gasethidi issi kama oothanaw naase biratape ishatamu oykiya bessata medhidosona. 19Dunkaaniya kammanaw zo7o qalamen yeggi kessida dorsa ite, qassi iya bollara kammanaw lo77o do7a ite giigisidosona.
20Geeshsha Dunkaaniya tuuqeta soqala mithafe kessidosona. 21Issi issi tuuqiya adussatethay tammu wadha, gompay issi wadhanne takadho. 22Issi tuuqiya issuwara gasethanaw nam7u luhoti de7oosona. Geeshsha Dunkaaniya tuuqeta ubbaa hessada oothidosona. 23Geeshsha Dunkaaniyas dugeha baggara laatamu tuuqeta medhidosona. 24Issi issi tuuqetas nam7u toho medhidi, he tohota oythanaw oytamu luhota biratape giigisidosona. 25Geeshsha Dunkaaniyas pudeha baggara laatamu tuuqeta medhidosona. 26Issi issi tuuqetas nam7u toho medhidi, he tohota oythanaw oytamu luhota biratape giigisidosona. 27Geeshsha Dunkaaniyas guye baggan, wuloha baggara usupun tuuqeta medhidosona. 28Geeshsha Dunkaaniya guye baggan de7iya maazanetas nam7u tuuqeta giigisidosona. 29He nam7u maazane tuuqeti xaphope xeera gakanaw oyketi bidosona. Nam7u maazaniyan de7iya nam7u tuuqeti hessada hanidi oosetidosona. 30Hessa gisho, issi issi tuuqiyas garsan nam7u nam7u tohoti de7oosona. Hospun tuuqetas biratape oosetida tammanne usupun tohoti de7oosona.
31Qassi enti soqala mithafe tammanne ichashu liyoota kessidosona. Ichashu liyooti Geeshsha Dunkaaniya issi bagga miyen, 32qassi ichashu liyoota hanko bagga miyen, hessadaka ichashu liyoota guye baggara wuloha baggan wothidosona. 33Tuuqetas miye baggara giddon de7iya liyoy, ha gaxape ya gaxa gakanaw kanthi keyana mela oothidosona. 34Tuuqetanne liyoota worqan lanxidosona. Liyooti enta giddora kanthi aadhana mela worqa sagaayota tuuqetara oysethidosona.
35Magarajuwa al7o liinope kaalosen, ocha teera daaneysaninne, zo7o qacinan alleeqisidi oothidosona. He magarajuwa bolla kiruube misileta sikidosona. 36Magarajuwa kaqanaw oyddu tuussata soqala mithafe giigisidi, worqan lanxidosona. Yaatidi worqa sagaayota entas giigisidosona. Qassi tuussata essiya oyddu tohota bira biratape medhidosona. 37Geeshsha Dunkaaniya pengiyas al7o liinope kaalosen, ocha teera daaneysafenne zo7o qacinan alleeqisid magarajo giigisidosona. 38Qassi iyaw kocati de7iya ichashu tuussata medhidi, entaw xeeranne tohuwa worqan lanxidosona. Tuussatas naase biratappe oosetidi ichashu tohota giigisidosona.
Currently Selected:
Kessa 36: GFBLVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
