Ĩbũrãníyã 8

Átáló ãmbógó ãndânĩ tị icíma úꞌdí rĩ drị̂

1Ị́jọ́ ífí ãmaní ị́jọ́ jọjó drị̃ la gá rĩ ꞌdĩ: ãmã átáló ãmbógó ãndânĩ la cí rilépi úmvúke Ãdróŋá Ũkpó ꞌDị́pị drị̂ ꞌbã wókõ drị́ ãndá gá ꞌbụ̃ gâlé rĩ gá, 2ãzíla ãzị́ ngalépi ãngũ ãlápítí Ãdróŋá drị̂ agá ꞌdĩ hémã Ãdróŋá ị̃nzị̃jó mgbã Úpí ꞌbã sịlé nĩ adru ꞌbá ꞌbã sịlé nĩ ku rĩ ꞌi.

3Átáló ãmbógó ãndânĩ ꞌdĩ kí pírí ála kí pẽ ãko ãwãꞌdĩfô rú rĩ kí fẽlé ãzíla ãko ídétáŋá ru ꞌdĩ kí abe, ãzíla átáló ꞌdĩ ꞌbã adru vâ ãko ĩꞌdi ꞌbã fẽlé rĩ trũ cí. 4Drĩ tá uꞌá agá ụ̃nọ́kụ́ gá ꞌdâ la, icó tá adrulé átáló la rú ku, ãꞌdusĩku ꞌbá átáló ru ãko ãwãꞌdĩfô rú ãzị́táŋá ꞌbã lẽlé rĩ áni la kí cí. 5Ãtalo ꞌdĩ kí ãzị́ nga agá ãngũ ãlápítí Ãdróŋá drị̂ agá ícétáŋá ru ãzíla iꞌdá ꞌbụ̃ gá rĩ ꞌbadrị̂ kî. ꞌDĩ bãsĩ ị́jọ́ Mụ́sã bị́lẹ́ ị̃ndụ́ lijó ꞌbã sị jõ hémã Ãdróŋá ị̃nzị̃jó rĩ ꞌi. Ĩꞌdiní lẽ agá ãngũ Ãdróŋá ị̃nzị̃jó rĩ sị agá, Ãdróŋá jọ ĩꞌdiní, “Mí idé jõ ãko ꞌdĩ kí pírí gbíyã iꞌdalé míní ꞌbé drị̃ gâlé rĩ kí vú sĩ.” #Ãfũŋá 25:40 6Wó ãzị́ fẽlé Kúrísĩtõ ní rĩ ndẽ ãmbõgõ sĩ ãtalo ꞌdã ꞌbadrị̂ kí rá cécé tị icíma úꞌdí Yẹ́sụ̃ ꞌbã ꞌbá kí tị icíjó Ãdróŋá be rĩ la ĩꞌbadrị̂ kí ndẽjó rá rĩ áni, ãzíla tu pá ị́jọ́ azịlé múké rĩ kí sĩ.

7Ãꞌdusĩku ị́jọ́ ũnzí drĩ ájẹ́ adru agá tị icíma drị̃drị̃ rĩ agá yụ, tị icíma ị̃rị̃ rĩ icó ájẹ́ ãngũ ịsụ́lé ku. 8Wó Ãdróŋá ịsụ́ ị́jọ́ ũnzí ꞌbá ꞌba rụ́ ãzíla jọ,

“Ụ́ꞌdụ́ ãzí la amụ́ rá,

ma mụ tị icíma úꞌdí la icílé ꞌbá Ịsịrayị́lị̃ ꞌbadrị̂ abe,

ãzíla ꞌbá Yụ́dã drị̂ abe.

9Tị icíma úꞌdí ꞌdĩ icó adrulé ándrá mâ icílé ĩmĩ áyị́pịka abe

mâ kí rụjó drị́ gâ sĩ kí drị̃ acéjó ãfũjó ãmvé ãngũ Mị̃sị́rị̃ drị̂ gâlé rĩ áni ku,

ãꞌdusĩku ꞌbã kí ándrá ásị́ tị icíma mádrị̂ ĩꞌba abe rĩ drị̃ gá ku,

ị́jọ́ ꞌdĩ sĩ, má aꞌbe dó kí rá,

Úpí jọ rá.

10ꞌDĩ tị icíma mâ mụlé icílé ꞌbá Ịsịrayị́lị̃ drị̂ abe

ụ́ꞌdụ́ drị̃lẹ́ gá rĩ agá rĩ, Úpí jọ rá.

Ma ãzị́táŋá mádrị̂ kí ꞌbã kí ũrãtáŋá gá,

ãzíla kí sĩ kí ásị́ gá.

Ma adru Ãdróŋá ĩꞌbadrị̂ ꞌi,

ãzíla kí adru ꞌbá mádrị̂ kî.

11ꞌBá ãzí icó dó ĩꞌdi ꞌbã jĩránĩ imbálé

jõku ĩꞌdi ꞌbã ádrị́pị ꞌi, sĩ jọjó la ĩꞌdiní, lẽ ínị̃ Ãdróŋá ꞌi íni la ku;

ãꞌdusĩku kí pírí áma nị̃ cé,

iꞌdójó ꞌbá nírí kí sĩ cajó ꞌbá ãmbogo rĩ ꞌbã rụ́.

12Ãꞌdusĩku mâ mụjó ị́jọ́ ũnzí ĩꞌbadrị̂ kî trũjó rá rĩ sĩ,

ãzíla má icó ị́jọ́ ũnzí ĩꞌbadrị̂ kí ị́jọ́ agálé ị̃dị́ ku.” #Yẽrẽmíyã 31:31-34

13Ĩꞌdiní tị icíma ꞌdĩ umvelé úꞌdí rĩ sĩ, Ãdróŋá ꞌbã dó tị icíma drị̃drị̃ rĩ ụ̃kụ rú ꞌbo, ị́jọ́ ꞌdĩ sĩ, ãko delépi ꞌbo ãzíla acálépi ụ̃kụ rú ꞌbo rĩ ĩꞌdi mụ ãvĩlé mbẽlẽ rú rá.

Currently Selected:

Ĩbũrãníyã 8: LUC

Highlight

Copy

Compare