- नहेम्याह 4
4
नहेम्याह द्वारा बिरोधियन कौ सामना
1जब सम्बल्लत ने सुनो कि यहूदी लोग सहरपनाह हों बना रए आंय, तब ऊने ईहों बुरओ मानो, और भौत रिसियाकें यहूदियन हों ठट्ठों में उड़ाऊन लगो। 2ऊ अपने भईयन के और शोमरोन की सेना के सामूं ऐसो कैन लगो, “बे कमजोर यहूदी का करबो चाहत आंय? का बे औरें जौ काम अपनी ताकत सें करहें? का बे अपनी जागां पक्की कर पाहें? का बे बलिदान चढ़ा पाहें? का बे सबरो काम आजई निपटा दैहें? का बे माटी के ढेरन में के जले पथरों हों फिन नए सिरे सें बनाहें?” 3ऊके लिगां तो अम्मोनी तोबियाह हतो, और ऊ कैन लगो, “जो कछु बे बना रए आंय, अगर कौनऊं लड़ईया भी ऊके ऊपर चढ़ै, तो बो उनकी बनाई भई पथरन की सहरपनाह हों तोड़ डालहै!” 4हे हमाए यहोवा परमेसुर, सुन ले कि हमाई कैसी बेज्जती हो रई आय; और उनको करो भओ अपमान उनईं की मूंड़ पै लौटा दे, और उनहों गुलामी के देस में लुटवा दे। 5उनकौ अधरम तें नें छिपा, और नें उनकौ पाप तोरे सामूं सें मिटाओ जाए; कायसें उनोंरन ने तोहों सहरपनाह बनाबेवारन के सामूं गुस्सा दिलाओ आय।
6हमोंरन ने सहरपनाह हों बनाओ; और सबरी सहरपनाह आधी ऊंचाई लौ जुड़ गई। कायसें लोगन कौ हिया ऊ काम में रोज लगो रओ।
7जब सम्बल्लत, तोबियाह, अरबियों, अम्मोनियों और अशदोदियों ने सुनो, कि यरूशलेम की सहरपनाह की मरम्मत होत जात आय, और ऊमें के नाके बन्द होन लगे आंय, तब उनोंरन ने भौतई बुरओ मानो; 8और सबई ने मिलकें ऐसी पंचयात करी कि जाकें यरूशलेम सें लड़ें, और उनके काम में गड़बड़ी करें। 9परन्त हमोंरन ने अपने यहोवा परमेसुर सें बिन्तवाई करी, और उनके बिरोद में दिन-रात के चौकीदार ठैरा दए।
10परन्त यहूदा के मान्सन कैन लगे, “ढोबेवारन की ताकत कम होन लगी आय, और मलबा तौ मुतकौ पड़ो आय, ई लाने सहरपनाह हमसें नईं बन सकत।” 11हमाए दुस्मन कैन लगे, “जब लौ हम उनके मजारें नें पोंचें, और उनहों मारकें काम बन्द नें करें, तब लौ उनहों नें कछु मालूम हुईयै, और नें कछु दिखाई पड़है।” 12फिन जो यहूदी उनके आस-पास रैत हते, उनोंरन ने सब जागां से दस बेर आ आकें, हमोंरों सें कई, “तुमोंरों हों हमाए लिगां लौट आओ चईये।” 13ई कारन मैंने लोगन हों तलवारें, बरछियां और धनुस देकें सहरपनाह के पाछेें सबसे नेंचें की खुली जागां में घराने घराने के अनसार बैठा दओ। 14तब मैं हेरकें उठो, और रईसन और हाकमन और दूसरे मान्सन सें कई, “उनसें नें डरौ; पिरभु जो महान और भयजोग आय, ओई हों याद करकें, अपने भईयन, बेटा, बिटियन, बईयरन और घरों के लाने लड़ाई करियो।”
15जब हमाए दुस्मनन ने सुनो कि जा बात हमोंरों हों मालूम हो गई आय, और यहोवा परमेसुर ने उनकी चाल निस्फल कर दई आय, तब हम सब सहरपनाह के लिगां अपने अपने काम पै लौट गए। 16ऊ दिना सें मोरे आधे सेवक तौ ऊ काम में लगे रए और आधे बरछियां, तलवारों, धनुषों और झिलम हों पैरें रैत हते; और यहूदा के सबरे घराने के पाछें हाकम रओ करत हते। 17सहरपनाह होें बनाबेवारे और बोझ ढोबेवारे दोई बोझ उठात हते, मतलब एक हाथ सें काम करत हते और दूसरे हाथ सें हथयार पकड़ें रैत हते। 18राजमिस्त्री अपनी अपनी जांघ पै तलवारें लटकाए भए काम करत जात हते। नरसिंगा फूंकबेवारो मोरे लिगां रैत हतो। 19ई लाने मैंने रईसों, हाकमन और सबरे मान्सन सें कई, “काम तौ बड़ो और फैलो भओ आय, और हम लोग सहरपनाह पै अलग अलग एक दूसरे सें दूर रैत आंय। 20ई लाने जितै सें नरसिंगा तुमें सुनाई दे, उतईं हमाए लिगां जमा हो जईयो। हमाओ यहोवा परमेसुर हमाई कोद सें लड़है।”
21सो ई तरहां हमोंरें काम में लगे रए, और उन में सें आधे, बड़े भुंसारे सें तारों कें कड़बे लौ बरछियां लएं रैत हते। 22फिन ओई बेरा मैंने लोगों सें जा सोई कई, “एक एक मान्स अपने सेवक समेंत यरूशलेम के भीतर रात बिताए करें, कि बे रात हों तौ हमाई रखनवारी करें, और दिन हों काम में लगे रएं।” 23और नें तौ मैं अपने उन्ना उतारत हतो, और नें मोरे भईया, नें मोरे सेवक और नें बे चौकीदार जो मोरे संगै रैत हते, बे सोई अपने उन्ना नईं उतारत हते; सब औरें पानू के लिगां सोई हथयार लेकें जात हते।
Currently Selected:
- नहेम्याह 4: BHB
Highlight
Copy
Compare
Share
Want to have your highlights saved across all your devices? Sign up or sign in
New Testament books: © 2018 Central India Christian Mission.
Old Testament books: © 2018 Central India Christian Mission and Pioneer Bible Translators
