- यहोशू 1
1
यहोशू हों यहोवा परमेसुर कौ हुकम
1यहोवा परमेसुर के दास मूसा के मरबे के बाद यहोवा परमेसुर ने ऊके सेवक यहोशू सें जौन नून कौ मोंड़ा हतो, कई, 2“मोरो दास मूसा मर गओ आय; ई लाने अब तें उठ, ई पूरी परजा समेंत यरदन के ऊ पार होकें ऊ देस हों जा जीहों मैं ऊहों मतलब इस्राएलियन हों देत आंव। 3ऊ बचन के अनसार जौन मैंने मूसा सें कई, मतलब कि जौन-जौन जागां पै तुम गोड़े धरहौ ऊ पूरी मैं तुमहों दे देत आंव। 4जंगल और ऊ लबानोन सें लैकें फरात महानद लौ, और पच्छिम कुदाऊं महासमंदर लौ हित्तियों कौ पूरो देस तुमाओ भाग ठैरहै। 5तोरे जीवन भर कोऊ तोरे सामूं ठैर नें पाहै; जैसे मैं मूसा के संगै रओ बैसई तोरे संगै भी रैहों; और नें तौ मैं तोए छोड़हों, और नें तोए हों त्यागहों। 6ई लाने हिम्मत बांधकें पक्को हो जा; कायसे जौन देस के देबे की कौल मैंने इन मान्सन के पुरखों सें करी हती ऊकौ अधकार तें इनहों दिलाहै। 7इतनों होए कि तें हिम्मत बांधकें और बेजा पक्को होकें जौन ब्यवस्था मोरे दास मूसा ने तोहों दई आय उन सबके अनसार करबे में चौकसी करियो; और ऊसें नें तौ दायने मुड़ियो और नें बांए, तब जितै-जितै तें जैहै उतै-उतै तोरो काम सफल हुईये। 8ब्यवस्था की जा पोथी तोरी जीभ सें कभऊं नें उतरने पाए, ऐई में दिन-रात ध्यान दए रईयो, ई लाने कि जो कछु ऊमें लिखो आय ऊके अनसार करबे की तें चौकसी करे; कायसे एैसई करबे सें तोरे सबरे काम सफल हुईयें, और तें प्रभावसाली हुईये। 9का मैंने तोए हुकम नईं दओ? हिम्मत बांधकें पक्को हो जा; डरियो नें, और तोरो मन कच्चो नें होए; कायसे जितै-जितै तें जैहै, उतै-उतै तोरो यहोवा परमेसुर तोरे संगै रैहै।”
यहोशू कौ मान्सन हों हुकम दैबो
10तब यहोशू ने परजा के सरदारों हों जौ हुकम दओ, 11“छावनी में इतै-उतै जाकें परजा के मान्सन हों जौ हुकम देओ, कि अपने-अपने लाने भोजन तईयार करके रखौ; कायसे तीन दिना के भीतर तुमहों ई यरदन के पार उतरकें ऊ देस हों अपने अधकार में लैबे के लाने जाने आय जीहों तुमाओ यहोवा परमेसुर तुमाए अधकार में दैबेवारो आय।”
12फिन यहोशू ने रूबेनियों, गादियों और मनश्शे के आधे गोत्र के मान्सन सें कई, 13“जौन बात यहोवा परमेसुर के दास मूसा ने तुम सें कई हती कि ‘तुमाओ यहोवा परमेसुर तुमहों आराम देत आय, और जौई देस तुमहों दैहै, ऊकी सुध करो।’ 14तुमाई बईयरें, बाल-बच्चे, और पसु तौ ई देस में रएं जौन मूसा ने तुमहों यरदन के ऐई पार दओ, परन्त तुम जौन सूरवीर आव पांति बांधे भए अपने भईयों के आंगू-आंगू पार उतर चलो, और उनकी मदद करो; 15और जब यहोवा परमेसुर उनहों एैसो आराम दैहै जैसो ऊ तुमहों दै चुको आय, और बे सोई तुमाए यहोवा परमेसुर के दए भए देस के अधकारी हो जैहें; तब तुम अपने अधकार के देस में, जौन यहोवा परमेसुर के दास मूसा ने यरदन के ई पार पूरब कोद तुमहों दओ आय, लौटकें ईके अधकारी हुईयो।” 16तब उनोंरन ने यहोशू हों जवाब दओ, “जो कछु तेंने हमें करबे कौ हुकम दओ आय ऊ हम करहें, और जितै कऊं तें हमें पठैय उतै हम जैहें। 17जैसे हम पूरी बातों में मूसा की मानत हते बैसई तोरी सोई मानहें; इतनौ होए कि तोरो यहोवा परमेसुर जैसो मूसा के संगै रैत हतो बैसई तोरे संगै भी रए। 18कोऊ काए नें होए जौन तोरे बिरुद्ध बलवा करे, और जितेक हुकम तें दैबे उनहों नें मानें, तौ ऊ मार डालो जैहै। परन्त तें पक्को और हिम्मत बांधे रै।”
Currently Selected:
- यहोशू 1: BHB
Highlight
Copy
Compare
Share
Want to have your highlights saved across all your devices? Sign up or sign in
New Testament books: © 2018 Central India Christian Mission.
Old Testament books: © 2018 Central India Christian Mission and Pioneer Bible Translators
