- उत्पत्ति 29

याकूब की लाबान सें मुलाकात

1फिन याकूब ने अपनी गैल लई, और पूर्वियों के देस में आओ। 2ऊने नजर डालकें का हेरो कि मैंदना में एक कुआं आय, और ऊके लिगां गाड़र-छिरियां के तीन झुण्‍ड बैठे भए आंय; कायसे जो पथरा ऊ कुआं के मों पै रखो रैत हतो, जीमें सें झुण्‍ड़ों हों पानूं पिलाओ जात हतो, ऊ बेजा भारी हतो। 3जब सबरे झुण्‍ड इकट्ठे हो जात तब चराबेवारे ऊ पथरा हों कुआं के मों पै सें लुढ़काकें गाड़र-छिरियों हों पानूं पिलात, और फिन पथरा हों कुआं के मों पै जईं कौ तईं रख देत हते। 4सो याकूब ने चराबेवारों सें पूंछी, “हे मोरे भईया हरौ, तुम कितै के आव?” उनोंरन ने कई, “हम हारान के आंय।” 5तब ऊने उनसें पूंछी, “का तुम नाहोर के पोते लाबान हों चीनत आव?” उनोंरन ने कई, “हओ, हम ऊहों चीनत आंय।” 6फिन ऊने उनसें पूंछी, “का ऊ भलो-चंगो आय?” उनोंरन ने कई, “हओ भलो-चंगो आय और ऊ हेर, ऊकी मोंड़ी राहेल गाड़र-छिरियों हों लएं भए चली आत आय।” 7ऊने कई, “हेरो, अबै तौ दिन बहुत आय, पसुओं के इकट्ठे होबे की बेरा नईंया; ई लाने गाड़र-छिरियों हों पानूं पिलाकें फिन लै जाकें चराओ।” 8उनोंरन ने कई, “हम अबै एैसो नईं कर सकत; जब सबरे झुंड इकट्ठे होत आंय तब पथरा कुआं के मों पै सें लुढ़काओ जात आय, और तब हम गाड़र-छिरियों हों पानूं पिलात आंय।”

9उनकी जा बातचीत होई रई हती कि राहेल, जो पसु चरात हती, अपने बाप की गाड़र-छिरियों हों लैकें उतै आ गई। 10याकूब ने अपने मामा लाबान की मोंड़ी राहेल हों, और ऊकी गाड़र-छिरियों हों हेरो तौ लिगां जाकें कुआं के मों पै सें पथरा हों लुढ़काओ और अपने मामा लाबान की गाड़र-छिरियों हों पानूं पिलाओ। 11तब याकूब ने राहेल हों चूमो, और जोर सें रौन लगो। 12याकूब ने राहेल हों बता दओ, कि मैं तोरो फुफेरो भईया आंव, मतलब रिबका कौ मोंड़ा आंव। तब राहेल ने दौड़कें अपने बाप सें कै दई। 13अपने भानजे याकूब कौ संदेसो पातई लाबान ऊसें मिलबे के लाने दौड़ो, और ऊहों गले लगाकें चूमो, फिन अपने घर ल्‍याओ। याकूब ने लाबान हों अपनो सबरो हाल सुनाओ। 14तब लाबान ने याकूब सें कई, “तें तौ सांचऊं में मोरो हाड़ और मांस आय।” याकूब एक मईना भर ऊके संगै रओ।

राहेल और लिआ के लाने सेवा

15तब लाबान ने याकूब सें कई, “कुटुम्‍बी होबे के कारन तोए सें मुफत में सेवा कराबो मोरे लाने ठीक नईंया; ई लाने मैं तोरे काम के बदले का देओं?” 16लाबान की दो मोंड़ियां हतीं, जीमें सें जेठी कौ नाओं लिआ और लौरी कौ राहेल हतो। 17लिआ की तौ धुंधली आंखें हतीं, परन्‍त राहेल रूपवती और सुन्‍दर हती। 18ई लाने याकूब ने, जो राहेल सें प्रीत रखत हतो, कई, “मैं तोरी लौरी मोंड़ी राहेल के लाने सात साल लौ तोरी सेवा करहों।” 19लाबान ने कई, “ऊहों गैर मान्‍स हों दैबे सें तोए हों दैबो अच्‍छो हुईये; ई लाने मोरे लिगां रै।” 20सो याकूब ने राहेल के लाने सात साल लौ सेवा करी; और बे ऊहों राहेल सें प्रेम करबे के कारन थोड़ेई दिना के बरोबर जान पड़े।

21तब याकूब ने लाबान सें कई, “मोरी बईयर मोहों दे, और मैं ऊके लिगां जैहों, कायसे मोरी बेरा पूरी हो गई आय।” 22सो लाबान ने ऊ जागां के सबरे मान्‍सन हों टेरकें इकट्ठो करो, और एक जेवनार करी। 23संझा की बेरा ऊ अपनी मोंड़ी लिआ हों याकूब के लिगां लै गओ, और ऊ ऊके लिगां गओ। 24लाबान ने अपनी मोंड़ी लिआ हों ऊकी दासी होबे के लाने अपनी दासी जिल्‍पा दई। 25भुन्‍सारे हों पता चलो कि जा तौ लिआ आय, ई लाने ऊने लाबान सें कई, “जौ तेंने मोरे संगै का करो आय? मैंने तोरे संगै रैकें जो तोरी सेवा करी, तौ का राहेल के लाने नईं करी? फिन तेंने मोए सें एैसो छल काए करो आय?” 26लाबान ने कई, “हमाए इतै एैसी रीत नईंया कि जेठी मोंड़ी के पैलां दूसरी कौ ब्‍याव कर दें। 27ईकौ हफता तौ पूरो कर; फिन दूसरी भी तोहों ऊ सेवा के लाने मिलहै जो तें मोरे संगै रहकें और सात साल लौ करहै।” 28याकूब ने एैसई करो, और लिआ के हफता हों पूरो करो; तब लाबान ने ऊहों अपनी मोंड़ी राहेल भी दई कि बा ऊकी बईयर होए। 29लाबान ने अपनी मोंड़ी राहेल की दासी होबे के लाने अपनी दासी बिल्‍हा हों दओ। 30तब याकूब राहेल के लिगां भी गओ, और ऊकौ प्रेम लिआ सें ज्‍यादा ओई पै भओ; और ऊने लाबान के संगै रहकें सात साल लौ और ऊकी सेवा करी।

याकूब का परिवार

31जब यहोवा परमेसुर ने हेरो, कि लिआ अप्रिय जानी गई, तब ऊने ऊकी कोख खोली, परन्‍त राहेल बांझ रई। 32सो लिआ गरभवती भई और ऊहों एक मोंड़ा पैदा भओ, और ऊने जौ कहकें ऊकौ नाओं रूबेन#29:32 मतलब देखो एक मोंड़ा रखो, “यहोवा परमेसुर ने मोरे दुख पै नजर करी आय, अब मोरो घरवारो मोए सें प्रीत रखहै।” 33फिन बा गरभवती भई और ऊहों एक मोंड़ा पैदा भओ; तब ऊने जा कई, “जौ सुनकें कि मैं अप्रिय आंव, यहोवा परमेसुर ने मोहों जौ भी मोंड़ा दओ।” ई लाने ऊने ऊकौ नाओं शिमौन#29:33 मतलब सुननेवाला रखो। 34फिन बा गरभवती भई और ऊहों एक मोंड़ा पैदा भओ; और ऊने कई, “अबकी बेर तौ मोरो घरवारो मोए सें मिल जैहै, कायसे ऊसें मोरे तीन मोंड़ा पैदा भए।” ई लाने ऊकौ नाओं लेवी#29:34 मतलब जुड़ो भओ रखो गओ। 35फिन बा गरभवती भई और ऊहों एक और मोंड़ा पैदा भओ; और ऊने कई, “अबकी बेर तौ मैं यहोवा परमेसुर हों धन्‍यवाद करहों।” ई लाने ऊने ऊकौ नाओं यहूदा#29:35 मतलब स्‍तुति रखो; तब ऊकी कोख बन्‍द हो गई।

Currently Selected:

- उत्पत्ति 29: BHB

Highlight

Copy

Compare