- एस्तेर 4
4
मोर्दकै कौ एस्तेर सें मदद मांगबो
1जब मोर्दकै ने जान लओ कि का का करो गओ आय तब मोर्दकै अपने उन्ना फाड़ कें, टाट पैरें, राख डालकें, नगर के मजारें जाकें ऊंचे और दुखभरे सब्द सें चिल्यान लगो; 2और ऊ राजभवन के फाटक के सामूं पोंचो, परन्त टाट पैरें भए राजभवन के फाटक के भीतर तौ पिड़बे की कोनऊं हों आज्ञा नें हती। 3एक एक प्रान्त में, जितै जितै राजा कौ हुकम और नियम पोंचो, उतै उतै यहूदी बड़ो बिलाप करबे और उपास करबे और रोबे पीटबे लगे; बल्कि बिलात जनें टाट पैरें और राख डालें भए पड़े रए।
4एस्तेर रानी की सखियन और खोजों ने जाकें ऊहों मोर्दकै के बारे में बता दओ, तब रानी दुख सें भर गई; और मोर्दकै के लिगां उन्ना भेजकें जौ कहलाओ कि टाट उतारकें इनहों पहन ले, परन्त ऊने उनें नईं लओ। 5तब एस्तेर ने राजा के खोजों में सें हताक हों जीहों राजा ने ऊके लिगां रैबे हों ठैराओ हतो, बुलवाकें हुकम दओ कि मोर्दकै के लिगां जाकें पता काड़ ले कि का बात आय, और ईकौ का कारन आय। 6तब हताक नगर के ऊ चौक में, जौन राजभवन के फाटक के सामूंं हतो, मोर्दकै के लिगां कड़ गओ। 7मोर्दकै ने ऊहों सब कछु बता दओ कि मोरे ऊपर का का बीतो आय, और हामान ने यहूदियन हों नास करबे की अनुमति पाबे के लाने राजभण्डार में कितेक चांदी भर देबे कौ बचन दओ आय, जौ सोई ठीक ठाक बता दओ। 8फिन यहूदियन कौ बिनास करबे कौ जौन हुकम शूशन में दओ गओ हतो, ऊकी एक नकल सोई ऊने हताक के हाथ में, एस्तेर हों दिखाबे के लाने दई, और उए सब हाल बताबे, और जौ हुकम देबे हों कई, कि भीतर राजा के लिगां जाकें अपने मान्सन के लाने गिड़गिड़ा के बिनती करै।
9तब हताक ने एस्तेर के लिगां जाकें मोर्दकै की बातें कै सुनाईं। 10तब एस्तेर ने हताक हों मोर्दकै सें जा कैबे की आज्ञा दई, 11“राजा के सब कर्मचारियन, बल्कि राजा के प्रान्तन के सब मान्सन हों सोई मालूम आय, कि का मान्स का बईयर, कौनऊं काय नें होबै, जौ हुकम बिना पाए भीतरी आंगन में राजा के लिगां जैहै ऊहों मार डालबे कौ हुकम आय; अकेले जीकी कोद राजा सोने कौ राजदण्ड बढ़ाए ओई बचत आय। परन्त मैं अब तीस दिना सें राजा के लिगां नईं बुलाई गई आंव।”
12एस्तेर की जे बातें मोर्दकै हों सुनाई गईं। 13तब मोर्दकै ने एस्तेर के लिगां जौ कहला पठैव, “तें हिया में जौ बिचार नें कर, कि मैंई राजभवन में रैबे के कारन और सब यहूदियन में सें बची रैहों। 14कायसे जो तें ई बेरा चिमानी रई, तौ और कौनऊं उपाय सें यहूदियन कौ छुटकारा और तरनतारन हो जैहै, परन्त तें अपने और अपने बाप के घराने समेंत नास हुईयै। का जाने तोहों एैसई कठन बेरा के लाने राजपद मिल गओ होए?” 15तब एस्तेर ने मोर्दकै के लिगां जौ कहला पठैव, 16“तें जाकें शूशन के सब यहूदियन हों इकट्ठो कर, और तुमोंरें मिलकें मोरे लाने उपास करौ, तीन दिन रात नें तौ कछु खाओ, और नें कछु पीओ। मैं सोई अपनी सखियन समेंत ऐई तरहां उपास करहों; और एैसई दसा में मैं नियम के बिरूद्ध राजा के लिगां भीतर जैहों; और जदि नास हो गई तौ हो गई।” 17तब मोर्दकै चलो गओ और एस्तेर की आज्ञा के अनसार ऊने करो।
Currently Selected:
- एस्तेर 4: BHB
Highlight
Copy
Compare
Share
Want to have your highlights saved across all your devices? Sign up or sign in
New Testament books: © 2018 Central India Christian Mission.
Old Testament books: © 2018 Central India Christian Mission and Pioneer Bible Translators
