Luka 18
18
Yalɔyo ɔ kɛ kojolɔ ɔ he abɛ ɔ
1Nɛ Yesu bu mɛ abɛ ko kɛ tsɔɔ kaa e sa kaa a sɔlee daa nɛ e ko gbe nɔ nya. 2Nɛ e ke: “Kojolɔ ko ngɛ ma ko nɔ, nɛ e yi Mawu gbeye, nɛ jeha nɛ ɔ hu e bui nɔmlɔ ko. 3Yalɔyo ko ngɛ jamɛ a ma mi, nɛ e ba e ngɔ ba de ke: ‘Fã ye he kɛ je ye henyɛlɔ ɔ dɛ mi!’ 4Nɛ e kplɛɛ we hluu. Se pee se ɔ, e de ngɛ e yi mi ke: ‘Engɛ mi kaa i yi Mawu gbeye, nɛ i bui nɔmlɔ hulɔ; 5se akɛnɛ kikɛmɛ a yalɔyo nɛ ɔ ngɛ ye nya dooe he je ɔ, ma fã e he, konɛ nyagbe ɔ nɛ e ko ba pue ye hɛ mi si.’ ” 6Nɛ Nyɔmtsɛ ɔ ke: “Nyɛɛ bu nɔ́ nɛ kojolɔ yi si fialɔ ɔ de ɔ tue! 7Nɛ ke Mawu maa ku e hɛ ngɔ fɔ nihi nɛ e hla nɛ kpaa ngmla kɛ tsɛɛ lɛ nyɔ kɛ pia a nɔ hluu tete po ɔ, anɛ e ba be a he fae? 8I ngɛ nyɛ dee ke, e ma fa a he oya. Se benɛ Nɔmlɔ Bi ɔ maa ba a, anɛ e ma ba na hemi kɛ yemi ngɛ zugba a nɔ lo?”
Farisifono ɔ kɛ oniatsulɔ ɔ he abɛ ɔ
9Nɛ e bu ni komɛ nɛ ngɔɔ a hɛ ngɔ fɔɔ mɛ nitsɛmɛ a he nɔ kaa dali ji mɛ nɛ a gbee ni kpahi a he guɛ ɔ hu abɛ nɛ ɔ: 10“Ni enyɔ pue nɔ kɛ ho sɔlemi ya ngɛ sɔlemi we ɔ. Nɔ kake ɔ Farisifono ji lɛ, nɛ nɔ kpa a onia tsulɔ ʼi. 11Farisifono ɔ ya da lokoo, nɛ e sɔle kikɛ ngɛ e yi mi: ‘Mawu, i naa mo si kaa i be kaa ni kpa amɛ, jiklɔɔtsɛmɛ, kutupɔtsɛmɛ, gba puɛli, loo kaa kikɛmɛ a onia tsulɔ nɛ ɔ hulɔ. 12I haa hwɔ si enyɔ ngɛ otsi mi; si ngɔɔ ni hi tsuo nɛ i naa a mi dlami nyɔngma ngɔ haa.’ 13Se onia tsulɔ ɔ daa si ngɛ se lokoo, nɛ e mi nɛ e wo e hɛ nɔ kɛ ya hiɔwe tete; se mohu e ngɔ e nine ngɔ fɔ e tsui mi nɛ e ke: ‘Mawu, o kɛ mi nɛ ji yayami peelɔ ɔ nɛ kpata!’ 14I ngɛ nyɛ dee ke: Kikɛmɛ a nyumu nɛ ɔ pue nɔ kɛ ho e we mi ya nɛ a wo lɛ nguɔ pe nɔ kaketsɛ ɔ. Ejakaa nɔ tsuaa nɔ nɛ woɔ e he nɔ ɔ, a maa ba lɛ si; se nɔ nɛ baa e he si ɔ, a ma wo e nɔ.”
Yesu gbaa jokuɛwi tsɔwi
(Mateo 19.13-15; Marko 10.13-16)
15Nɛ ni komɛ hu kɛ bimwɔwi ba Yesu ngɔ konɛ e ta a he; nɛ benɛ e kaseli ɔmɛ na a, a gbɛ wo mɛ. 16Se Yesu tsɛ mɛ kɛ ba e ngɔ nɛ e ke: “Nyɛ ha jɔkuɛwi ɔmɛ nɛ a ba ye ngɔ, nɛ nyɛ ko tsi mɛ blɔ; ejakaa ni nɛ ɔmɛ a nɔ ji Mawu matsɛ yemi ɔ nɛ. 17Niinɛ, i ngɛ nyɛ dee ke: Nɔ tsuaa nɔ nɛ ngɔɛ Mawu matsɛ yemi ɔ kaa jokuɛ nyafii ko ɔ, e be mi sɛe kulaa.”
Nyumu niatsɛ ɔ
(Mateo 19.16-30; Marko 10.17-31)
18Nɛ nɔkɔtɔma ko ba bi lɛ ke: “Tsɔɔlɔ kpakpa, mɛni ma pee konɛ ma na neneene wami?” 19Nɛ Yesu de lɛ ke: “Mɛni he je o ngɛ mi tsɛe ke nɔ kpakpa? Nɔ kpakpa ko be kaa ja nɔ kake; lɛ ji Mawu. 20O le kita amɛ kaa: “Ko puɛ gba; koo gbe nɔmlɔ; koo ju; koo ye lakpa odase; buu o tsɛ kɛ o nyɛ.’ ” 21Se nyumu ɔ ke: “I ye enɛ ɔmɛ tsuo nɔ kɛ je ye jokuɛwi a si.” 22Nɛ benɛ Yesu nu enɛ ɔ ɔ, e de lɛ ke: “E piɛ mo nɔ́ kake. Yaa jua nihi kulaa nɛ o ngɛ ɔ nɛ o dla sika a ha ohiafohi, nɛ o ma na juetli ngɛ hiɔwe; nɛ o ba ba nyɛɛ ye se.” 23Se benɛ e nu enɛ ɔ ɔ, e ye kɔmɔ wawɛɛ ejakaa e ngɛ nihi babauu.
24Jeha nɛ ɔ benɛ Yesu na kaa e ngɛ kɔmɔ yee wawɛɛ ɔ, e ke: “Hyɛ bɔ nɛ e wa ha nihi nɛ ngɛ nihi kaa a maa sɛ Mawu matsɛ yemi ɔ mi! 25Ejakaa e wɛ hi afukpɔngɔ kaa e maa gu abui hɛngmɛ mi kaa bɔ nɛ e waa haa niatsɛ kaa e maa sɛ Mawu matsɛ yemi ɔ mi ɔ.” 26Se nihi nɛ nu ɔ ke: “Lɛɛ mɛnɔ yi wami a ma nyɛ ma he mɔ?” 27Yesu ke: “Nihi nɛ nimli nyɛ we nɛ a pee ɔ, Mawu lɛɛ e nyɛɔ peɔ.” 28Kɛkɛ nɛ Petro ke: “Oʼɛ, wɔɔ lɛɛ wa si wa nihi tsuo kulaa nɛ wa ba nyɛɛ o se.” 29Yesu de mɛ ke: “Niinɛ, i ngɛ nyɛ dee ke: Nɔ ko nɔ ko be nɛ e si we loo yo loo nyɛmimɛ nyumuhi loo fɔli loo bimɛ ngɛ Mawu matsɛ yemi ɔ he, 30nɛ e be nane mi tomi si abɔ nae ngɛ be nɛ ɔ mi, nɛ je nɛ maa ba a mi hu e be neneene wami nae.”
Yesu tu e gbenɔ he munyu nɔ nɛ ji si etɛ
(Mateo 20.17-19; Marko 10.32-34)
31Nɛ Yesu tsɛ ni nyɔngma kɛ enyɔ ɔ kɛ ba e kasa nya nɛ e de mɛ ke: “Oʼɛ, wa yaa Yerusalem, nɛ a maa gbe nihi kulaa nɛ gbali ɔmɛ ngma ngɛ Nɔmlɔ Bi ɔ he ɔ nya. 32Ejakaa a ma je lɛ ngɔ wo wɔ jali a dɛ mi, nɛ a maa ye e he fɛu, nɛ a maa wa lɛ yi mi, nɛ a maa la lada ngɔ pue e nɔ, 33nɛ a kɛ kplibi maa fia lɛ, nɛ a maa gbe lɛ, nɛ ligbi nɛ ji ligbi etɛ ɔ, e maa te si ekohu.” 34Se mɛɛ lɛɛ a nui ni nɛ ɔmɛ a ti kake po sisi, nɛ a ngɔ kikɛmɛ a munyu nɛ ɔ sisi numi ngɔ laa mɛ, nɛ a kɔ we munyuhi nɛ e tuɔ se.
Yesu tsa hɛyuyuilɔ nɔbalɔ ko
(Mateo 20.29-34; Marko 10.46-52)
35Nɛ e ba mi kaa benɛ Yesu su Yeriko haa a, hɛyuyuilɔ ko hii si ngɛ blɔ ɔ tue ngɛ nɔ bae. 36Nɛ benɛ e nu kaa nihi fuu bee ɔ, e bi nɔ́ nɛ ji. 37Nɛ a de lɛ ke Yesu Nazareno ɔ lɛ bee. 38Kɛkɛ nɛ e kpa ngmlaa ke: “Yesu, David bi, naa mi mɔbɔ!” 39Nɛ nihi nɛ nyɛɛ hɛ mi ɔ ke e yi ke e ma e nya; se kɔlɔ ɔ mohu ha e kpa ngmlaa pe kekle ɔ ke: “David bi, naa mi mɔbɔ!” 40Yesu da si, nɛ e fa ke a kɛ lɛ nɛ ba e ngɔ. Nɛ benɛ e su e he ɔ, e bi lɛ ke: 41“Mɛni o ngɛ hlae kaa ma pee ha mo?” Nɛ e ke: “Nyɔmtsɛ, kaa ma hyɛ nɔ ekohu.” 42Nɛ Yesu de lɛ ke: “Hyɛ nɔ, o hemi kɛ yemi tsa mo!” 43Nɛ amlɔ ɔ nɔuu ɔ, e hyɛ nɔ, nɛ e nyɛɛ e se nɛ e wo Mawu hɛ mi nyami; nɛ benɛ asafo ɔ tsuo na a, a je Mawu yi.
Currently Selected:
Luka 18: DAN77
Highlight
Copy
Compare
Share
Want to have your highlights saved across all your devices? Sign up or sign in
Dangme New Testament © United Bible Societies, 1977.
