1 Korintobi 6
6
Munyu nɛ a kɛ nyɛmimɛ yeɔ
1Tse ke nyɛ ti nɔ ko kɛ e nyɛmi na sane ko ɔ, e jee blɔ nɛ e kɛ lɛ ya yeɔ ngɛ nihi nɛ ja we Mawu ɔ a ngɔ, se e kɛ lɛ yɛ ni klɔuklɔu ɔmɛ a ngɔ lo? 2Anɛ nyɛ li kaa ni klɔuklɔu ɔmɛ ji ninɛmɛ nɛ maa kojo je ɔ lo? Nɛ ke nyɛ maa piɛ he nɛ a kojo je ɔ, anɛ nyɛ sɛ́ nihi nɛ kojoɔ munyu tsɔ wi lo? 3Anɛ nyɛ li kaa wa maa kojo hiɔwe bɔfohi tete po hluu nɛ e ba slɔ je nɛ ɔ mi munyuhi? 4Jehanɛ, ke nyɛ ngɛ je nɛ ɔ mi munyuhi komɛ a yemi ɔ, mɛ he je nyɛ haa nihi nɛ a bui mɛ ngɛ asafo ɔ mi yeɔ mɔ? 5Zo gbi nyɛ piɔ? Anɛ ni lelɔ kaketoo po be nyɛ kpɛti, nɔ nɛ ma nyɛ e nyɛmimɛ a kpɛti munyu nɛ e tu lo? 6Se mohu nɔ kɛ e nyɛmi yaa kojomi ngɛ nihi nɛ he we yi ɔmɛ po a ngɔ!
7Enɛ ɔ lɛɛ nyɛ gbee si mo, akɛnɛ nyɛɛ kɛ nyɛ he yeɔ munyu ɔ. Mɛ he je nyɛ ha we nɛ a ye nyɛ amim mohu? Mɛni he je nyɛ ha we nɛ a sisi nyɛ mohu? 8Se nyɛ mohu nyɛ peɔ nihi nɛ dɛ, nɛ nyɛ sisiɔ nihi nɛ ji nyɛ nyɛmimɛ tete. 9Anɛ nyɛ li kaa yayami peeli a nine be Mawu matsɛ yemi ɔ nɔ sue lo? Nyɛ ko ha nɛ a mlɔɔ nyɛ! Ajuama bɔli loo wɔ jali loo gba puɛli loo nyumuhi nɛ kɛ nyumuhi peɔ yakayakani, 10loo juɔhi loo hɛ dooli loo da deli loo nɔ jɛli loo amim yeli a nine be Mawu matsɛ yemi ɔ nɔ sue kulaa. 11Sa a, nyɛ ti ni komɛ ngɛ kikɛ; se jahanɛ a du nyɛ he, nɛ a kpale tsukɔ nyɛ he, nɛ a wo nyɛ nguɔ hulɔ ngɛ Nyɔmtsɛ Yesu Kristo biɛ kɛ wa Mawu ɔ Mumi ɔ mi.
Nyɛɛ ngɔ nyɛ nɔmlɔ tso ɔmɛ kɛ wo Mawu hɛ mi nyami
12I ngɛ nihi kulaa he blɔ mohu, se kɛ ɔ pi nihi kulaa nɛ hi. I ngɛ nihi kulaa he blɔ mohu, se i be hae nɛ nɔ́ ko nɛ ye ye nɔ. 13Ngma ngɛ ha muklii, nɛ muklii hu ngɛ ha ngma, se Mawu ma ha enyɔ ɔ kulaa se maa po. Nɔmlɔ tso ɔ, pi ajuama bɔmi he nɛ e ngɛ ngɛ, se mohu Nyɔmtsɛ ɔ he e ngɛ ngɛ, nɛ Nyɔmtsɛ ɔ hu ngɛ ha nɔmlc tso ɔ. 14Nɛ bɔ nɛ Mawu tle Nyɔmtsɛ ɔ si kɛ je gbeje ɔ, ja e ma tle wɔ hu si ngɛ e he wami nya.
15Anɛ nyɛ li kaa nyɛ nɔmlɔ tso ɔmɛ ɔ Kristo he nihi ji mɛ lo? Lɛɛ ma ngɔ Kristo he ni ɔmɛ ngɔ pee ajuama he nihi lo? Dɛbi! 16Aloo nyɛ li kaa nɔ nɛ kɛ e he ya bɔɔ ajuama he ɔ, e kɛ lɛ plɛ nɔmlɔ tso kɛke lo? Ejakaa ngmami ɔ ke: “Mɛ ni enyɔ ɔ kulaa a ma plɛ he lo kake.” 17Se nɔ nɛ kɛ e he bɔɔ Nyɔmtsɛ ɔ he ɔ, e kɛ lɛ peɔ mumi kake.
18Nyɛɛ tu ajuama bɔmi nya fo! Yayami tsuaa yayami nɛ nɔmlɔ peɔ ɔ, pi e nɔmlɔ tso ɔ mi nɛ e ngɛ; se nɔ nɛ bɔɔ ajuama a, e peɔ yayami siɔ lɛ nitsɛ e nɔmlɔ tso ɔ. 19Anɛ nyɛ li kaa nyɛ nɔmlɔ tso ɔ Mumi Klɔuklɔu nɛ ngɛ nyɛ mi nɛ nyɛ na kɛ je Mawu ngɔ ɔ sɔlemi tsu ʼi, nɛ nyɛ pi nyɛ nitsɛmɛ nyɛ nɔ lo? 20Ejakaa a he nyɛ kɛ jua wawɛ. Lɔ ɔ he ɔ, nyɛɛ kɛ nyɛ nɔmlɔ tso ɔ nɛ wo Mawu hɛ mi nyami.
Currently Selected:
1 Korintobi 6: DAN77
Highlight
Copy
Compare
Share
Want to have your highlights saved across all your devices? Sign up or sign in
Dangme New Testament © United Bible Societies, 1977.
