kovb zob 21

pau-lo mivb ye-lu-saa-lem

1Zauj zwavj myenb kxvq liud leib Yaav waag, Ravq pcv za'g Eei mivb Tauj Kotg Kxib Rru. ta'Eeig Nxi yia Bua mivb Tauj lo-De Kxib Rru cvj mivb paa-Taa-laa muvq. 2yem uaq pwatg maaib Pruj Ravq xij mivb fi-ni-sia teib puv, yia Bua zyrug pia'g Ravq mivb a'q. 3mivb kau, mavg pwatg sai-patg Kxib Rru zyrug Jiaj ninb Eei naamb puv mivb si-lia teib puv. Tauj Tai-la'q zivb, Ravq xij puvj huaj Fiag, yia Bua zyrug Zwrtq uaq a'q.

4yem uaq yia Bua lxd pwatg syenj ye-su Eei myenb zyrug Zauj ninb Bua yem yetg nxm leib paaij. sivj livb lovg ninb Bua Buaj pau-lo maiq tuvq mivb ye-lu-saa-lem zivb. 5mq paag yem yetg nxm leib paaij liud, yia Bua Zwrtq Jauq mivb a'q. yetg zuvq syenj ye-su Eei myenb, lyemb ninb Bua Eei aub Jweiq, Zauj Jyenq fuvj yia Bua Zwrtq zi'g zivb mivb Kxib Len, yem uaq Byenj kweig Fiag tauj kauj. tauj kauj liud, kxvq liud leib Yaav waag, 6yia Bua pia'g Ravq. uaq teij yaag Rwrnj pyauq mig a'q.

7yia Bua yem Tai-la'q yavb Ravq mivb Tauj Tx-le-mi Zauj yem uaq Eei kxb yrud kxvq wig pwavb waag cvj Zauj ninb Bua yem Nxi uaq. 8ta'Eeig Nxi yia Bua cvj mivb si-saa-li-yaa muvq. Tauj uaq yia Bua hitq zunb Kuq fyenj uaq taub fi-lipq Eei pyauq. naaiq taub fi-lipq tovb zinb Daavg yem ye-lu-saa-lem Jiub paav kinq taaib Eei uaq teij siag taub Eei yetg taub.#kovb zob 6:5; 8:5 9ninb maaib pyei taub sia'q maiq kcvb lovg Goj. ninb Bua yaag tu'q zivb Eeig trug Tinb huvb Eei waag.

10yem ziaj Nxi uaq, maaib taub trug waag myenb, Buaj heug aa-kaa-Batg, yem yu-Dia scvq taaib.#kovb zob 11:28 11ninb taaib lxd yia Bua, zx'q pau-lo Eei hrub Laav Dob Jyenq ninb kanb Eei puab zauj yaag kxvq, “sivj livb Navq naaiq nx kxvq, ‘yem ye-lu-saa-lem zivb Eei yiu-Tai myenb xij Navq naaiq nx Dob Jyenq naaiq tiub hrub Laav Eei zyruq yaag Jiu pun yem Janj Eei puab Diaq.’+”

12haid liud naaiq teij waag yia Bua Zauj yem uaq Eei myenb Qa'q Toq pau-lo maiq tuvq mivb ye-lu-saa-lem zivb. 13pau-lo tau, “meib Bua weig haiq tiug Navq naaiq nx Eyemq pun yia Eei Ba'Riu yu'g Revg? yia zunq tivg Hruq maiq taan Eung pun myenb Dob Navq, mq paag weig zyruq ye-su Eei Buaj Eung yem ye-lu-saa-lem zivb pun myenb taij.”

14Dovg haaij kxvq pau-lo yaag maiq mwavj. yia Bua zyrug maiq kxvq a'q. Kuvj kxvq, “Toq zyruq ei Jyenq ninb Eei za'eij zruj.”

15Ga'haaq yia Bua Beng zyavj ka'naaiq mivb ye-lu-saa-lem. 16maaib teij yem si-saa-li-yaa Eei saib kxj kan Jyenq yia Bua mivb yaag txb yia Bua mivb yia Bua xij zu'g hitq uaq taub maa-naa-sanj Eei pyauq. maa-naa-sanj se yem sai-patg Kxib Rru taaib Eei myenb yaag zruj taub syenj Daavg Jiaj uaq paan saib kxj.

pau-lo mivb yaa-kxpg uaq

17mivb Tauj ye-lu-saa-lem, syenj ye-su Eei myenb a'Neiq zipq yia Bua. 18ta'Eeig Nxi pau-lo Zauj yia Bua mivb yaa-kxpg uaq. Jiub paav Eei myenb koj yetg zuvq yaag yem uaq Eei. 19pau-lo kxvq liud wig pwavb waag, ninb zweib yetq zweib Eeig Eei kxvq Revg Tinb huvb Navq haiq nx lovg ninb yem Janj Eei txvj zruj Eei yetg zuvq sig.

20yem uaq Eei myenb haid ninb kxvq liud naaiq teij sig zyrug Zev Tinb huvb, cvj Buaj pau-lo, “tomb kxj aag, meib hiuq Eei. maaib ziaj waang yiu-Tai myenb syenj ye-su. yetg zuvq yaag Jxm Hruq kan leib latg. 21ninb Bua haid kxvq meib yem Janj Eei teib puv Faauj zwavj yiu-Tai myenb kwavg mo-se Eei leib latg.#21:21 faan za'g Kuvj kxvq kwavg mo-se. meib yaag Buaj ninb Bua maiq zu'g Tevj fu'Jweiq Jiaj kaatq Eei leid yaag maiq zu'g ei Bua yiu-Tai myenb Eei leib fivj. 22uaq Euvg, Bua xij zu'g Navq haiq nx zruj? ninb Bua zuvq haid kxvq meib taaib Tauj naaiq taaib a'q. 23meib xij zu'g ei yia Bua Eei waag zruj. yem yia Bua naaiq maaib pyei laanb myenb Zauj Tinb huvb lcvd Jiaj vcvg waag.#saauq myenb 6:13-21 24meib xij zu'g kan Jyenq ninb Bua mivb yaag Zauj Jyenq ninb Bua saaj wij, Tevj ninb Bua Zwrtq saaj wij Eaanb, ninb Bua zyrug haib Teij Ba'pyei a'q. Navq naaiq zruj, zwavj myenb zyrug hiuq tu'q ninb Bua haid uaq teij waag se maiq zyen. meib kanb yaag ei Jyenq leib latg zruj. 25mq paag syenj ye-su Eei Janj c'q, zinb Daavg Bua fiaq fyenj ei Bua tivg taaib Eei waag Buaj ninb Bua, ‘xij zu'g keg maiq tuvq Eang ziag Jiaj miub favj Eei haiq Euvg ka'naaiq, maiq tuvq Eang Ryaamq, maiq tuvq Eang nc'g Jaav taig Eei scvb Kuq xq, yaag maiq tuvq zruj maiq lwrnj hxvg Eei sig.’+”#kovb zob 15:29

26ta'Eeig Nxi pau-lo zyrug txb uaq teij myenb yaag Zauj Jyenq ninb Bua saaj wij. ninb cvj pia'g zavg Tinb huvb Eei pyauq Buaj sai myenb cvj maaib Bu'ziaj Nxi Zivj pwavq saaj wij Eei Nxi. Tauj uaq Nxi sai myenb xij zu'g weig ninb Bua taub taub lovg ka'naaiq ziag pun Tinb huvb.

pau-lo zu'g myenb zx'q

27uaq teij siag Nxi aaq lamb pwavq, maaib teij e-sia scvq taaib Eei yiu-Tai myenb pwatg pau-lo yem zavg Tinb huvb Eei pyauq. ninb Bua Zo'q zwavj myenb yaag zx'q pau-lo, 28naub naug Eei heug Jyenq kxvq, “i-saa-laa-en myenb aa'b! Tevj yia Bua maa'b! tovb naaiq laanb myenb mivb nxmb nxm txvj Faauj myenb mavg Piaj Bua yiu-Tai myenb Zauj Bua Eei leib latg Zauj naaiq zavg Tinb huvb Eei pyauq. maiq taan uaq Euvg Navq, ninb yaag txb Janb kikg pia'g zavg Tinb huvb Eei pyauq ka'Euad, pun naaiq nxm Zivb Revg txvj maaib wij.” 29(ninb Bua Navq naaiq nx kxvq weig zu'g ninb Bua pwatg yem e-fe-so zivb taaib uaq taub to-fi-matq Zauj pau-lo yem zivb ka'Euad zyrug laaig pau-lo txb ninb pia'g zavg Tinb huvb Eei pyauq.)#kovb zob 20:4

30zyavb nxm zivb Eei myenb zyrug lung Revg, Dutg Dutg Eei Tiuj taaib zx'q pau-lo Tx Zwrtq zi'g zavg Tinb huvb Eei pyauq. zavg Tinb huvb Eei pyauq Eei kcvb zyrug lyemb zeib kwrn Jyenq a'q. 31zyavb kwanb myenb xij taij pau-lo uaq zang, lo-maa tomb pcvb pyeiq haid fyenj kxvq ye-lu-saa-lem myenb lung Revg. 32ninb zyrug txb teij pcvb pyeiq#21:32 pcvb pyeiq yem naaiq kovb zob sru lovg tomb pcvb pyeiq uaq Jruj waag kxvq kunq yetg Zin taub pcv faauj mcvj. Kuvj kxvq pcvb pyeiq uaq Euvg pcv kunq yetg pc'q taub. Zauj pcv, Tiuj Jyenq mivb ninb Bua uaq. zwavj myenb pwatg tomb pcvb pyeiq Zauj pcv, ninb Bua zyrug tivb, maiq Bx'q pau-lo a'q.

33tomb pcvb pyeiq mivb Tauj zyrug zx'q pau-lo cvj heug pcv lovg i tiub Lia'g limg Dob Jyenq. ninb naaig kaaj, “naaiq haiq taub? ninb zruj haiq Euvg?” 34zwavj myenb maaib teij Navq naaiq kxvq, maaib teij Navq uaq kxvq. tomb pcvb pyeiq zx'q maiq zu'g zyen kxnb pcvj weig zu'g myenb lung haig. ninb zyrug heug pcv txb pau-lo mivb pcv yem Eei txvj uaq.

35Tauj uaq Teib kxn zwavj myenb Zyruq haig, pcv zyrug Lxpq pau-lo faauj kub vwaaig. 36zwavj myenb kan Jyenq Ga'haaq mivb Kib Kuvj Kaatq Eei kxvq, “taij ninb kwavg a'q.”

pau-lo xij Jaiq sin

37pcv xij txb pau-lo pia'g ninb Bua yem Eei txvj ka'Euad uaq zang ninb kxvq Buaj taub pcvb pyeiq, “Toq pun yia Zauj meib kxvq Jruj waag, tu'q Eei fai?”

tomb pcvb pyeiq kxvq, “meib haib kxvq kikg waag Eei? 38uaq Euvg meib maiq zeid zinb Daavg Zeuj lung txb pyei Zin za'g pcv mivb teib puvb Waav uaq taub i-yipq myenb fai?”

39pau-lo tau, “yia se yiu-Tai myenb, Zwrtq seij yem si-li-sia scvq, Taa-satq zivb, tovb maaib mevb hog uaq nxm tomb zivb Eei pc'g fivj. Toq pun yia Zauj naaiq teij zwavj myenb kxvq waag og.”

40tomb pcvb pyeiq Gxi Rwib pun ninb kxvq. pau-lo sruq Jyenq Teib taaub Wavj puad Buaj myenb sekq. zwavj myenb sekq mivb, pau-lo zyrug lovg hipq-lu waag Zauj ninb Bua kxvq.

Currently Selected:

kovb zob 21: IuMiNOR

Highlight

Copy