TITO 3
3
Eyéméxchexa etnehek énxet'ák apteme nak melya'áseyam
1Eltennés énxet'ák yakwayam enxoho etnehek apkelyaheykekxoho m'a kelwese'e apkeláneykha nak yókxexma, yána sat cha'a elyahakxohok kéltemésesakxa enxoho, yána nahan etnahagkok cha'a apmayheykegkoho elanagkok ma'a nentamheykha ektakmela nak. 2Neygyána aksa exének ekmaso pók énxet, yána sat keytek meyke ektahakxa apheykha, tén han etnehek ektakmeleykha apwáxok, yána nahan etnahagkok megkaleymáxkoho apwáxók nepyeseksa apyókxoho énxet'ák.
3Hakte sẽlyéháxma axta anhan negko'o xa nano' axta, axta antemék nelyaheykekxoho Dios, axta agakhémok negko'o nentémakxa, kelmomchek axta egwáxok ekyókxoho aksok negyespagkamakxa nak, nentemegkek axta ekmaso nentémakxa, tén han nelyásekáseykha, neltaknómaxchék axta negko'o, nelenmexamaxchekxeyk axta anhan negko'o xa. 4Ẽlwagkasek axta negko'o teyp Dios, cham'a senxekmósa axta m'a ektémakxa nak segméso naksa segemleykekxoho, tén han ma'a ektémakxa nak apkelásekhayo énxet. 5Háwe axta eñama sẽlwagkaso teyp eñama nenlané m'a aksok ektakmela nak, axta eyke keñamak ma'a nelmayóseka axta senlányo.#Dn 9.18. Entemésásekxeyk axta eghaxnagcha'ák eñama m'a segyakpasáseyak axta yegmen,#Ef 5.26. nenxakak axta anhan axnagkok ekyennakte egnenyek eñama Espíritu Santo. 6Jesucristo segwagkasamo teyp axta nahan keñamak nenxaka negko'o Espíritu Santo, meyke kélmeyagweykekxa. 7yakwayam enxoho anxawak ma'a ekyennakte egnenyek megkatnegwayam enéxa nelhaxanma nak anxawa', cham'a senxéna enxoho Dios nentaha nelpéwomo eñama m'a segméso naksa nak segemleykekxoho.
8Ekmámnaksoho agko' xa, emenyék ko'o elenxanmohok apxeyenma exchep xa, yakwayam enxoho elanagkok apkeltamheykha ektakmela m'a énxet'ák apteme nak melya'áseyam Dios. Cháxa ektaha nak nentamheykha ektakmela xa, awanchek nahan hempasmok negyókxoho nak. 9Wánxa agkok, néwhánekxoho aksa exchep ektémakxa nak elenmexamaxche apkelpakmeyesma énxet'ák ektaha nak amya'a ekyéháxma, nágyeyxho nahan ma'a amya'a kéltenneykha naksal'a apkelxénamap ẽlyepmeyp nano', tén han ma'a ektémakxa nak apkexpanchásamap énxet'ák, tén han ma'a ektémakxa nak elenmexamaxche apkelpakmeyesma énxet exének ektémakxa m'a Moisés segánamakxa apagkok nak. Cháxa aksok ektaha nak mékoho xa, méko nahan negásenneykxexa.
10Apkexpánchesek agkok apnámokkok xama énxet kélakneykekxexa, xama sat etnehek apméso appeywa ekyennakte, ánet esenhan, wánxa agkok, sat agkok elyahakxohok aptemésesakxa, etekkes sat ma'a apchakneykekxexa nak énxet. 11hakte kéméxchek ey'asagkohok xép apyensakmo ámay ektakmela xa énxet nak, mey'asáxma apagko' nahan eksexnenagko.
Pablo appekkencháseykekxa appeywa Tito
12Eyáphásek sat agkok Artemas esenhan Tíquico#Hch 20.4; Ef 6.21-22; Col 4.7-8; 2 Ti 4.12. aphakxa exchep, elenxánem sat emyenták se'e tegma apwányam Nicópolis yakwayam enxoho hetyanegwatámhok ko'o, hakte ekmokók axta ko'o axek apketsamágexal'a m'a tegma apwányam nak. 13Epásem sat cha'a Zenas aptaha nak negásenneykekxexa negko'o, tén han ma'a Apolos,#Hch 18.24; 1 Co 16.12. egkés sat aksok eyéméxchexa xa énxet'ák nak, yakwayam enxoho elenxanmohok apkelxega, yakwayam enxoho anhan megkeytek eyéméxchexa xama aksok. 14Yána sat nahan kaltámeyagkok apkeláneyak nentamheykha ektakmela m'a énxet'ák nentémo xamo' nak magya'áseyam, yakwayam enxoho kaltámeyagkok appasmo m'a énxet ekyetnakxa enxoho eyéméxchexa aksok, yakwayam enxoho kapasmok énxet ma'a apkeltémakxa nak.
Pablo ekxeyenma apwáxok tén han néxa apxeyenma aksok eltakmela
15Apcháphásesek ekxeyenma apwáxók xép apyókxoho énxet'ák apheyncha'a nak se'e sekhakxa nak ko'o. Eltennés sat negaphásesa negko'o ekxeyenma egwáxok ennámokkok nentémo xamo' nak magya'áseyam. Dios sat etnehek apméso naksa kélyókxoho kéxegke m'a ektémakxa nak segemleykekxoho.
Currently Selected:
TITO 3: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
