APOCALIPSIS 9
9
1Cinco axta apwokmok Dios apchásenneykha appawaso apchakkahaso, ekwet'ak axta ko'o apteyekmo xama yaw'a keso náxop apkeñama néten; apxakak axta nahan ketchesama átog agkok ma'a máxek ekmatawóneg agko' nak. 2Apmeykesek axta átog xa máxek ekmatawóneg nak, néten axta mahágkok éten eñama xa máxek nak ektémol'a elánamáxchexa átex;#Gn 19.28. chapchek axta anhan ekhem xa máxek éten agkok nak, chapchek axta anhan exchahayam. 3Neyseksa éten axta nahan apkelantépak sawa', appayhekxeyk axta keso náxop;#Ex 10.12-15. kélmések axta anhan apmopwána, cham'a ektémakxa nak yettaha'. 4Apkeláneyákpek axta menaktawasha pa'at, tén han ma'a ekyókxoho elyapakmaté nak áwa', tén han ma'a ekyókxoho yenta'a nak, wánxa axta aksa apkeláneyákpo enaktawasha m'a énxet ektahakxa enxoho meyke kélkahaso ekpayhakxa nápakta'a, cham'a kélkahaso eñama nak Dios.#Ez 9.4. 5Wánxa agkok axta eyke kól'awok elnápok énxet'ák, wánxa axta aksa apkeláneyákpo ellegásesagkohok ekmáske ekweykmoho cinco pelten; axta hawok ekmáske m'a ektémakxal'a hegmaktak yettaha'.
6Etegyaha sat eykhe apkeletsapma énxet'ák ma'a ekhem sat, wánxa agkok melwetyehek sat eyke apkeletsapma; emawhok sat eykhe eletsapok, kamaskok sat eyke ekyetna nepyeseksa nétsapma xa énxet'ák nak.#Job 3.21; Jer 8.3.
7Máxa axta aptahak sawa' m'a yatnáxeg apkelaneykekxal'a aptahakxa yakwayam emhagkok kempakhakma;#Jl 2.4. máxa axta anhan nétcheso empátek elyenma ekhágko m'a apkatkók, keñe axta máxa énxet ma'a nápakta'a. 8Máxa axta kelán'a áwa' m'a apwa', máxa axta eyke méwa am'ák ma'a apma'ák.#Jl 1.6. 9Máxa axta sawo ekyentaxno m'a eyapmáxche apyempe'ék, máxa axta anhan elletnaheykha apxempenák ma'a ektémol'a amagkok weyke takaxchók yatnáxegla'a apyenyawaso apkelmahágko enxoho empakháxchexa.#Jl 2.5. 10Ahamtakcha'ak axta anhan apyapakyek, máxa axta m'a ektémol'a yettaha', xakak axta anhan ekmowána xa apyapakyek nak yakwayam kallegásesagkohok énxet'ák ekweykmoho cinco pelten. 11Abadón apkelteme hebreos xa apkemha apmonye sawa' nak, aptaha nak wese' m'a máxek ekmatawóneg nak, keñe griegos apkeltéma Apolión.
12Yeyk'ak ma'a émha amonye aksok ekmaso nak; wánxa agkok, ánet akke makham keléméxche'.
13Seis axta apwokmok Dios apchásenneykha appawaso apchakkahaso, ekleg'ak axta ko'o kélpeywa eñama neyseksa hawók nekha aksok egkepet'ák, cham'a ekyetnama axta néten sawo ekyátekto elyenma ekwatnamáxchexa axta cha'a aksok,#Ex 30.1-3. cham'a ekyetnama nak nápakto' Dios. 14Entahak axta amya'a apcháneyákpo Dios apchásenneykha apwokmo axta seis apyókxoho s'e, cham'a apmeyncha'a axta apchakkahaso: “kólchexeykxa hawók nápakha kelyekhama' elásenneykha kélpextetma nak xamo' wátsam ekwányam ekwesey nak Éufrates.” 15Keñe axta kélchexeykxo m'a hawók nápakha nak kelyekhama' elásenneykha, yakwayam enxoho elnápok nápakha énxet apwokmo enxoho cha'a apkántanxo apyókxoho, hakte kélakhásásók axta yakwánxa katnehek xa, chakhawók axta ekhem, chakhawók axta nahan ma'a pelten, chakhawók axta nahan ma'a yeyam. 16Ekleg'ak axta nahan ekwánxa apxámokma sẽlpextétamo apkelchánte yatnáxeg: doscientos millones axta apxámokma m'a.
17Axta entahak sekweté ko'o yatnáxeg se'e. Ekwet'ak axta ko'o yatnáxeg yetlo apchahakkaso apnenyek ma'a ektaha axta apchánte, máxa axta eyke táxa m'a, ekyapakmaté axta, máxa axta m'a pánakte exnók ekyapakmatél'a, ekyátekto axta nahan ekyepetche, máxa axta m'a xóp ánek ektawáseykencha'awol'a egyempehek ekmanyása ekpakneyam. Keñe axta m'a yatnáxeg, máxa axta méwa akkátek ma'a akkátek, keñe axta nahan ektepa táxa m'a apátog, éten axta nahan tépak, keñe axta nahan ektepa m'a aksok ekmanyásal'a ekpakneyam. 18Apkeletsekkek axta nahan nápakha énxet apwokmo enxoho apkántanxo apyókxoho eñama xa antanxo aksok elmaso nak, cham'a ekteyapma axta apátog xa yatnáxeg nak: táxa axta m'a, éten axta nahan, axta nahan ma'a aksok ekmanyásal'a ekpakneyam. 19Apátog axta yetnók apmopwána xa yatnáxeg nak, tén han ma'a apyapakyek, máxa axta yéwa m'a apyapakyek, akkátek axta nahan apchásenneykxak apnaktawásencha'a énxet'ák.
20Wánxa agkok, axta eyke elwáteságkok makham apkeláneyak aksok ekmaso m'a énxet'ák ektaha axta apkeleymomap, cham'a ektaha axta meletsapma neyseksa aksok elmaso, axta nahan elwáteságkok apkelpeykesamo m'a kelyekhama', tén han ma'a apkelpeykesamo nak kéleykmáseso elánamáxche nak sawo ekyátekto elyenma, tén han ma'a sawo ekmopé nak elyenma, tén han ma'a sawo ekyátekto agko' nak elyenma, tén han ma'a meteymog nak, tén han ma'a yántéseksek nak, yawanchek kótak aksok xa kéleykmáseso nak, yawanchek nahan kaña', yawanchek nahan kaxog.#Sal 115.4-7; 135.15-17; Dn 5.23. 21Axta anhan elwáteságkok apchakhe pók xa énxet'ák nak, tén han ma'a aptamheyak nak kelyohóxma'a, tén han ma'a kalmopsexta'a nak, axta anhan elwáteságkok apkelmeñexma.#Ex 8.15,19.
Currently Selected:
APOCALIPSIS 9: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
