APOCALIPSIS 7
7
Apkelkahásamap énxet'ák Israel
1Keñe axta sekwet'a ko'o hawók nápakha Dios apkelásenneykha natámen xa. Xama axta apkenmáha nexcheyha, keñe axta pók apkenmeyncha'a nepyeyam, ekteyapmakxa ekhem axta anhan apkenmáha pók, keñe axta pók apkenmeyncha'a m'a taxnegwánxa ekhem.#Jer 49.36; Dn 7.2; Zac 6.5. Apchaknáha axta m'a, yakwayam enxoho emagkok exchahayam, yakwayam enxoho megkaxchahámhek keso náxop, tén han ma'a neyseksa nak wátsam ekwányam, yakwayam enxoho anhan megkawátekhápek xama yámet enxoho. 2Ekwet'ak axta anhan pók Dios apchásenneykha apkeñama m'a ekteyapmakxa ekhem, apmeykha axta kélkahaso eñama nak Dios memassegwayam. Apyennaktések axta appeywa xa Dios apchásenneykha nak, apkelpakhetchesa m'a hawók nápakha Dios apkelásenneykha apkelxaka axta apmopwancha'a yakwayam etwasha keso náxop, tén han ma'a wátsam ekwányam nak. Aptahak axta apkeláneya s'e: 3“¡Nágkóltawasha sekxo' náxop, nágkóltawasha nahan wátsam ekwányam, nágkóltawasha nahan yenta'a mampekkena nak makham sekxo' kélkahaso ekpayhakxa nápát ma'a Dios egagkok apkelásenneykha nak!”#Ez 9.4,6.
4Ekleg'ak axta nahan ko'o ekwánxa apxámokma ektaha axta ekha kélkahaso, ciento cuarenta y cuatro mil axta apyókxoho énxet'ák Israel. 5Doce mil axta apyókxoho énxet kélkahasa apkeleñama nak nepyeseksa Judá enxet'ák apagkok, doce mil axta nahan apyókxoho kélkahasa m'a apkeleñama nak nepyeseksa Rubén énxet'ák apagkok, doce mil axta anhan apyókxoho kélkahasa m'a apkeleñama nak nepyeseksa Gad énxet'ák apagkok, 6doce mil axta anhan apyókxoho kélkahasa m'a apkeleñama nak nepyeseksa Aser énxet'ák apagkok, doce mil axta anhan apyókxoho kélkahasa m'a apkeleñama nak nepyeseksa Neftalí énxet'ák apagkok, doce mil axta anhan apyókxoho kélkahasa m'a énxet'ák apkeleñama nak nepyeseksa Manasés énxet'ák apagkok, 7doce mil axta anhan apyókxoho kélkahasa m'a apkeleñama nak nepyeseksa Simeón énxet'ák apagkok, doce mil axta anhan apyókxoho kélkahasa m'a apkeleñama nak nepyeseksa Leví énxet'ák apagkok, doce mil axta anhan apyókxoho kélkahasa m'a apkeleñama nak nepyeseksa Isacar énxet'ák apagkok, 8doce mil axta anhan apyókxoho kélkahasa m'a apkeleñama nak nepyeseksa Zabulón énxet'ák apagkok, doce mil axta anhan apyókxoho kélkahasa m'a apkeleñama nak nepyeseksa José énxet'ák apagkok, doce mil axta anhan apyókxoho kélkahasa m'a apkeleñama nak nepyeseksa Benjamín énxet'ák apagkok.
Apxámokma énxet apkelmopé apkelántaxno
9Enmexawok axta ko'o natámen xa, ekwet'ak axta ko'o énxet apxámokma apyókxoho pók aptémakxa énxet nak, tén han ma'a móktémakxa nak apkelpakmeyesma. Amonye taháno ektakmalma axta apchakneykha m'a, nápakto' ma'a Nekkések Apketkok. Apxámok apagko' axta m'a, megkólwanchek axta kólyetsetek. Apkelmopé axta nahan apkelántaxno, áxa áwa' axta anhan apkelmeykha. 10Axta etnehek cha'a elyennaktéshok apkelpeywa s'e:
“¡Dios apha nak néten aptaháno ektakmalma
apteme sẽlwagkaso teyp
tén han ma'a Nekkések Apketkok!”
11Apyókxoho Dios apkelásenneykha axta nahan apchakneykha neyáwa xa taháno ektakmalma nak, tén han ma'a énxet'ák apkelámha apmonye'e nak, axta anhan apchakneykha neyáwa taháno ektakmalma m'a hawók nápakha énxet apkeleñama nak néten; apkelháxahánteyk axta ekwokmoho apkeltekxeyágko nápakta'a xóp ekyetnakxa m'a taháno ektakmalma nak, apkelpeykásawók axta Dios. 12Aptahak axta apkelpakmeta s'e:
“¡Katnahagkok sat!
Kólpeykeshok sat cha'a Dios egagkok,
kóltemésesek sat nahan cha'a apcheymákpoho,
exénakpok sat nahan ekha apya'áseyak,
kólmések sat nahan cha'a ekxeyenma kélwáxok,
kóltehek sat nahan cha'a kéláyo,
exénakpok sat nahan cha'a ekha apmopwána,
tén han ekha apyennakte
megkatnegwayam enéxa.
¡Katnahagkok sat!”
13Elmaxneyáha axta ko'o xama xa énxet'ák apkelámha apmonye'e nak. Aptahak axta seyáneya s'e: “¿Yaksak xa énxet'ák apkelmopé nak apkelántaxno, háxko nahan apkeleñamakxa?” 14“Wese', xép apya'ásegko'”, axta ektahak seyátegmowágko ko'o. Keñe axta aptaha seyáneya s'e: “Cháxa énxet'ák ektaha axta apkelyeykhé ekyawe apkellegeykegkoho xa,#Dn 12.1; Mt 24.21; Mr 13.19. apkelyenyések axta apkelántaxno Nekkések Apketkok éma apagkok xa, kelmopeyásekxók axta anhan.#Jn 1.29; 1 Jn 1.7.
15“Ekeso eñamakxa apheyncha'a nak
ma'a aphamakxa nak Dios,
apkeltamheykha nahan cha'a ekyókxoho ekhem
tén han ekyókxoho axta'a m'a
Dios tegma appagkanamap apagkok nak.
Elmeyok sat nahan cha'a m'a apha nak
néten aptaháno ektakmalma,
cham'a appaxkeyncha'a sat.
16Kamaskok sat apkellegágkoho meyk elnapma
kamaskok sat nahan elnapa ekhem,
kamaskok sat nahan ekwatna apyempe'ék
ekmexanma nak ekhem,
kamaskok sat nahan elpekhésa
ekmexanmaxma;#Sal 121.6; Is 49.10.
17hakte eltakmelchesek sat ma'a
Nekkések Apketkok apha nak ma'a
néten aptaháno ektakmalma nak,
ekhawo aptemésesamakxa nak
apkeltakmelchesama m'a nekkések.#Sal 23.1; Ez 34.23; Jn 10.1-16.
Enaklók sat nahan ma'a ekteyapmakxa nak yegmen
ekyennaktésamo nak egnenyek.#Sal 23.2; Is 49.10; Jn 4.10; 7.37.
Dios sat nahan emasésesek
apaktek égmenek xa énxet'ák nak.”#Is 25.8; Ap 21.4.
Currently Selected:
APOCALIPSIS 7: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
