APOCALIPSIS 22
22
1Exekmósek axta ko'o xama Dios apchásenneykha wátsam eyáxñeyo yegmen, yegmen ekyennaktésamo egnenyek axta m'a.#Ez 47.1,12; Zac 14.8. Yagkáxawók axta yegmen, máxa axta m'a sokpeysyamla'a elyenma. Axta keñamak ektepa m'a aphamakxa nak néten aptaháno Dios tén han ma'a Nekkések Apketkok, 2kenyeyk axta yegmen ámay nepyeseksa tegma apwányam. Kenmeyk axta yámet ekyennaktésamo egnenyek#Gn 2.9. neyáwa wátsam ektakmalma, kenmeyk axta nahan mók ma'a mók nekha wátsam, yókxoho pelten axta nahan cha'a katnehek ekyexno xa yámet nak, doce axta cha'a katnehek ekyexneykekxa xama apyeyam, kaltakmelchesamhok axta cha'a apyókxoho énxet'ák apheykha náxop áwa' xa yámet nak. 3Méko sat nahan katnehek aksok aptaknagkamol'a Dios ma'a,#Gn 3.17. hakte keytek sat Dios aptaháno ektakmalma m'a tegma apwányam nak, exek sat nahan Nekkések Apketkok ma'a, elpeykeshok sat nahan ma'a ektaha nak apkelásenneykha. 4Apakta'ák#Sal 17.15; Mt 5.8; 1 Jn 3.2. apagko' sat nahan étak Dios ma'a ektaha nak apkelásenneykha, kaxnagkok sat nahan apwesey m'a nápakta'a. 5Méko sat nahan katnehek axta'a m'a tegma apwányam nak, kamaskok sat nahan apkepmenyého chálewaso ektaha nak apheykha m'a, tén han ma'a elsasó nak exma ekhem, hakte Dios Wese' egegkok sat egkések elseyexma,#Is 60.19; Ap 21.23. kelwese'e sat nahan etnahagkok megkatnegwayam enéxa.#Dn 7.18.
Chágketwokmek kaxwo' apweyktamxa Jesucristo
6Aptahak axta seyáneya Dios apchásenneykha s'e;
“Ekmámnaksoho agko' se'e amya'a nak, kélwanchek megkólya'asók, apcháphásek axta apchásenneykha Dios Wese' egegkok, aptaha axta apméso Espíritu apagkok ma'a énxet'ák ektaha nak apkellegaso appeywa, yakwayam enxoho exekmósek apkelásenneykha peya kañehémhok katnehek xa.”
7“¡Kaxwo' sat awata'! ¡Apkeleñémo sat ma'a ektaha nak apkelyaheykekxoho amya'a ekxeyenma nak yakwánxa katnehek egmonye eknaktáxesamaxko nak se'e weykcha'áhak nak!”
8Ko'o Juan, ekwet'ak axta ko'o xa aksok nak, ekleg'ak axta nahan. Eltekxekkek axta ko'o etapnák apkenmágkaxa Dios apchásenneykha ektaha axta sexekmóso xa, ekmokók axta alpeykeshok, natámen sekweté xa, tén han natámen seklegé. 9Wánxa agkok, aptahak axta seyáneya s'e:
“Ná etne aksa xa, ko'o nahan sekteme Dios apchásenneykha, ekhawók ko'o exchep, ekhawók nahan ma'a apkelyáxeg'a ektaha nak apkellegaso Dios appeywa, ekhawók nahan ma'a ektaha nak apkelyaheykekxoho ektémakxa nak eknaktáxésamaxche s'e weykcha'áhak nak. Elpeykesho m'a Dios.”
10Aptahak axta nahan seyáneya s'e: “Ná ekpós aksa s'e amya'a ekxeyenma nak yakwánxa katnehek egmonye, eknaktáxésamaxko nak se'e weykcha'áhak nak, hakte chágketwokmek kaxwo' ekhem yakwánxa nak kasawhaxkohok katnehek xa. 11Yoho elának aksok ekmaso m'a énxet ektaha nak ekmaso aptémakxa, yoho nahan elának aksok ekmanyása m'a énxet ekmanyása nak aptémakxa, wánxa agkok, elenxanmohok apagkok nahan apkelané aksok ektakmela m'a énxet ektaha nak ektakmela aptémakxa, tén han elenxanmohok apteme appagkanchásamap Dios#Dn 12.10. ma'a énxet ektaha nak appagkanchásamap Dios.”
12“Nakso', kaxwo' sat awata' asantámhok sat nahan ko'o ekyakmageykekxa m'a ektémakxa enxoho aksok apkelané énxet.#Jer 17.10. 13Ko'o sekteme sémha emonye tén han ektemegwánxa néxa,#Ap 1.8. sekteme nahan eyeynókxa tén han ektemegwánxa néxa,#Is 41.4; 44.6; 48.12; Ap 1.17; 2.8. sekteme nahan ektepakxa, tén han eksawhexchexa.”
14Apkeleñémo agko' énxet apkelyenyeso nak apkelnakta, hakte kaphemmok sat yakwayam etawagkok ekyexna m'a yámet ekyennaktésamo nak egnenyek,#Jn 2.9; 3.22. elepwának sat nahan elántexek ma'a tegma apwányam nak. 15Melántexek sat eyke m'a énxet ekmaso agko' nak apkeltémakxa apkelyetchesamakpoho nak semheg, tén han ma'a aptamhéyak nak kelyohóxma, tén han ma'a apkeláneykegko nak ekmaso apkeltémakxa kalmopsexta'a, tén han ma'a apchakhe nak pók, tén han ma'a apkelpeykesamo nak kéleykmáseso, tén han ma'a apyókxoho énxet ektaha nak ekleklamo apwáxók negmowána amya'a nak, cham'a aptamheykegko nak apkelmopwána amya'a.
16“Ko'o Jesús, eyáphásek ko'o seyásenneykha apkeñama néten yakwayam eltennaksek ekyókxoho apchakneykekxexa énxet ektéma nak xa, ko'o sekteme señama nepyeseksa David aptawan'ák neptámen,#Is 11.1,10. ko'o nahan sekteme yaw'a apwányam apteyapmol'a axto'o agko'.”
17Aptahak seyáneya Espíritu aptakmalma tén han Nekkések Apketkok aptáwa s'e: “¡Empoho!” Enxet ektahakxa enxoho aplegé etne nahan appeywa s'e: “Empoho” Hem agkok enchakhak énxet, cham'a, apmopmenyého nak ének yegmen, empoho eyhagwata s'e yegmen ekyennaktésamo nak egnenyek meyke ekyanmaga.#Is 55.1; Jn 4.10,14; 7.37.
18Negyókxoho ektahakxa enxoho negháxenmo xa amya'a ekxeyenma nak yakwánxa katnehek egmonye, eknaktáxésamaxko nak se'e weykcha'áhak nak, ektahak ko'o seyáneya kéxegke seyésa s'e: Apyepetchesek agkok enxama mók amya'a se'e ekyetnama nak eknaktáxésamaxche, sat katnehek aplegasáseykegkoho Dios xa ektémakxa nak aksok elmaso eknaktáxésamaxche s'e weykcha'áhak nak. 19Apmasések agkok nekha eknaktáxésamaxche enxama xa amya'a ekxeyenma nak yakwánxa katnehek egmonye, émentemekxak sat nahan Dios ektémakxa nak ekpayhémo etwok ekyexna m'a yámet ekyennaktésamo nak egnenyek, cham'a ekpehewayam enxoho apxawé, tén han emasésesek ma'a ektémakxa nak ekpayhémo etxek ma'a tegma apwányam aptakmalma ekxeyenma nak aptémakxa s'e eknaktáxésamaxche nak weykcha'áhak.#Dt 4.2; 13.1.
20Aptahak appeywa ektaha nak apxeyenma s'e: “Nakso', kaxwo' sat awata'.”
Katnahagkok sat. ¡Exyem Wese' Jesús!
21Wese' egegkok Jesús sat etnehek apméso naksa kélyókxoho kéxegke m'a ektémakxa nak segemleykekxoho.
Currently Selected:
APOCALIPSIS 22: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
