APOCALIPSIS 12

Kelán'a tén han yéwa ekwányam

1Tekkek axta néten aksok sempelakkaso agko' nak agweta': xama kelán'a eyaklamaxche ekhem axta m'a ektémol'a apáwa, keñe axta apyetna pelten ma'a kóneg amagkok, keñe axta étcheso akkátek elyenma aphágko doce yaw'a. 2Lósok axta anhan xa kelán'a nak, payheykha axta átog eñama ekmáske awáxok, eñama nahan eklegeykegkoho ekteme nakláwa. 3Keñe axta ektepékxo makham mók aksok sempelakkaso nak agweta' ma'a néten: yéwa ekwányam ekyexwasé axta m'a, siete axta akkatkók, diez axta ekyókxoho m'a kepet'ák,#Dn 7.7. étcheso akkátek axta nahan eghak ekyókxoho akkátek. 4Epakyek axta kelyenyawásak nápakha yaw'a m'a néten, kexeyntek axta náxop.#Dn 8.10. Yakwa'ak axta yakwánxa kategkesek étche kelán'a xa yéwa ekwányam nak, kelhaxneyk axta yakwayam kanaksapok ekmanyehe agko' sakcha'a kaxwé aptéyam. 5Tegkesek axta étche apkelnáwa#Is 66.7. xa kelán'a nak, cham'a peya sat etnehek apkeláneykha ekyókxoho apkelókxa yetlo meyke apmopyósa elanok apkelenmexma.#Sal 2.9. Wánxa agkok, kélyementegkek axta eyke étche xa kelán'a nak, kélyentamákxeyk axta m'a nápakto' Dios, cham'a ekyetnamakxa nak aptaháno ektakmalma; 6keñe axta ekmahágko enyaha yókxexma meykexa énxet xa kelán'a nak, cham'a apkelanésamakxa axta Dios yakwánxa cha'a kólmések ekto ekweykmoho mil doscientos sesenta ekhem.

7Tekkek axta kempakhakma néten natámen xa: Miguel,#Dn 10.13,21; 12.1; Jud 9. Dios apchásenneykha apkeñama néten axta apkempakha'ak yetlo apkelxegexma'a, axta apkenmexak xa yéwa ekwányam nak, kennápeyxchek axta nahan xa yéwa ekwányam nak, yetlo nahan elxegexma'a, 8wánxa agkok, axta eyke kaxnawok yéwa ekwányam ma'a, tén han ma'a elxegexma'a nak, axta anhan kól'awok kaxmakha m'a néten. 9Kéltekkesek axta yéwa ekwányam ma'a néten, cham'a nano' yéwa#Gn 3.1. eltamhomaxko nak kelyekhama', ekwesey nak Satanás, cham'a elyexancháseykencha'a nak cha'a apyókxoho énxet'ák keso náxop. Kélyenyenteyk axta yéwa ekwányam keso náxop#Lc 10.11. yetlo elásenneykha.

10Ekleg'ak axta ko'o kélpeywa ekyennakte agko' ma'a néten. Entahak axta amya'a s'e:

“Wa'ak kaxwo' nelwagkásamáxche teyp,

tén han ma'a Wese' egegkok Dios apmopwána nak,

wa'ak nahan kaxwo' negyeseksa m'a

aptémakxa nak Wese' apwányam Dios,

tén han ma'a ektémakxa nak

kélyaheykekxoho Mesías apagkok;

hakte kéltekkesegkek axta m'a

elsexnenagkama axta ẽlyáxeg#Job 1.6-12; Zac 3.1.

cham'a elsexnenagkama axta cha'a

ekyókxoho ekhem, tén han

ekyókxoho axta'a nápakto' ma'a

Dios egagkok.

11Apkelmalanchek axta ẽlyáxeg'a xa

eñama m'a apyegkenma axta éma apagkok

Nekkések Apketkok

eñama nahan ma'a apkellegaso axta

amya'a ektakmela agko' xa énxet'ák nak;

axta elayeyk eletsapok

apmayheykegkok axta aksa eletsapok.

12¡Kalpayhekxa' kélwáxok kéxegke kélheykha nak néten!

¡Wánxa agkok, kéxegke sat laye

kélheykha nak náxop

tén han ma'a ekheyak nak wátsam ekwányam,

hakte weywenték kelyekhama' yetlo eklómo agko'

enmexa kéxegke, ya'ásegwokmek eyéméxko

antawók ekhem!”

13Xama axta ekwet'a kélyenyento náxop xa yéwa ekwányam nak, kelanak axta m'a kelán'a ektegkeso axta étche apkenna. 14Náta axempenák elyawe axta eyke xakak xa kelán'a nak, yakwayam enxoho kawának kampak aksa m'a ekhamakxa nak meykexa énxet, cham'a ekxaweykxa axta cha'a ekto ekweykmoho apkántanxo apyeyam nepxet pók,#Dn 7.25; 12.7. kamhagkok eyátépexa ekyetnakxa m'a yéwa ekwányam nak. 15Tekkesek axta yegmen átog xa yéwa ekwányam nak, yakwayam enxoho katnesásekxak wátsam, yakwayam enxoho nahan keynyawaksek xa kelán'a nak; 16wánxa agkok, xapop axta eyke pasmak xa kelán'a nak, mayhak axta xóp, keñe axta eknaksapa m'a wátsam ektekkeso axta átog yéwa ekwányam. 17Ekeso eñamakxa ektaknókoho agko' axta kelán'a m'a yéwa ekwányam nak, keñe axta elnápexko aksa m'a apkeleymomap nak atawan'ák natámen xa kelán'a nak, axta kelenmexak ma'a énxet'ák ektaha nak apkelyaheykekxoho apkeltémókxa nak antehek Dios tén han ma'a meyenseyam nak apkelxeyenma apwesey Jesús. 18Neyáwa wátsam ekwányam axta yákwokmok xa yéwa ekwányam nak.

Currently Selected:

APOCALIPSIS 12: LEGN

Highlight

Copy

Compare