SAN MARCOS 8

Jesús apchéyak aptéyak cuatro mil énxet'ák

(Mt 15.32-39)

1Xama ekhem axta apchaknákxak makham énxet apxámokma, méko axta aptéyak, keñe axta apkelwónencha'a Jesús apkeltámeséyak. Aptahak axta s'e:

2—Apyósekak ko'o sélano s'e énxet'ák nak, hakte antanxo ekhem wokmok apheykha s'e sekhakxa nak, méko nahan aptéyak. 3Eláphásek agkok apxanák yetlo metéyak aptéyak, káhapwakxak katnehek xama náxet ámay, hakte makhawók apkeleñamakxa nápakha.

4Aptahak axta apkelátegmowágko apkeltámeséyak se'e:

—¿Háxko antehek ólmésagkok aptéyak se'e yókxexma meykexa nak aksok, méko nahan énxet?

5Aptahak axta apkelmaxneyeyncha'a Jesús se'e:

—¿Háxko apwánxa pan apyetna kéxegke?

—Siete, —axta aptahak apkelátegmowágko

6Keñe axta apkeltamho Jesús exmakha náxop énxet'ák, apkelmeyk axta xa siete pan nak, keñe axta natámen apméso ekxeyenma apwáxok Dios, apkelyepta xa pan nak, apkelmeyásegkek axta anhan apkeltámeséyak, keñe axta apkeltámeséyak apkelmeyásegko m'a énxet'ák. 7Antawók axta anhan ekyetna kelasma étkók, apmések axta anhan Jesús ekxeyenma apwáxok Dios eñama xa kelasma étkók nak, apkeltamhok axta anhan kólmelaskok. 8Apyókxoho axta aptókagkok ekwokmoho apkelyakkanakmo, siete axta anhan wokmok kélxatméyak kélxata pan nápakha'a apkeleymomap. 9Xegkásók axta emmok cuatro mil apyókxoho énxet ektaha axta aptéyak xa, keñe axta apkeláphasa Jesús xa énxet'ák nak. 10Apchánteyk axta Jesús yántakpayhe yetlo apkeltámeséyak apkelmahágko yókxexma Dalamuta natámen xa.

Enxet'ák fariseos apkeltémo étak aksok sempelakkaso agweta'

(Mt 16.1-4; Lc 12.54-56)

11Apkelwokmek axta énxet'ák fariseos ma'a. Apkelpakhetcháseykpok axta Jesús yakwayam enxoho ékkónek. Apkeltamhok axta elának xama aksok sempelakkaso agweta'#Mt 12.38; Lc 11.16. ekxekmóso aptaha apkeñama Dios ma'a Jesús. 12Aptekkásók axta apkennama Jesús, aptahak axta s'e:

—¿Yaksak ektaha apkeltamho nak étak aksok sempelakkaso agweta' xa énxet'ák nak?#Mt 12.39; Lc 11.29. Megkólxekmósek sat aksok magkenatcheso agweta' xa énxet'ák nak. Nakso' xa sektahakxa nak sekpeywa.

13Keñe axta apkexaya aksa m'a; apchántakxeyk axta makham yántakpayhe apmeyákxo m'a neyp wátsam ekpayhegwayam.

Enxet'ák fariseos kempáseyak apagkok

(Mt 16.5-12)

14Kelwagkámegkek axta mesawa aptéyak Jesús apkeltámeséyak, xama apagko' axta pan apyetna m'a kañe' yántakpayhe. 15Aptahak axta apkeláneya Jesús apchésa s'e:

—Kóllano, kólawho fariseos kempáseyak apagkok,#Lc 12.1. tén han ma'a Herodes kempáseyak apagkok nak.

16Apkelpakhetcháseykpok axta Jesús apkeltámeséyak apxéna méko pan apagkok.

17Apyekpelchek axta eyke Jesús ektahakxa apkelpeywa. Aptahak axta apkeláneya s'e:

—¿Yaksak ektaha kélxéna nak méko pan? ¿Yagkólya'ásegwokmok makham, yagkólyekpelchágwokmok nahan? ¿Mékoya kélya'áseyak kéxegke? 18Yetneyk eykhe kélakta'ák, akke kólweteyk, yetneyk eykhe anhan kélheyk'ák, akke anhan kóllegeyk.#Jer 5.21; Ez 12.2; Mr 4.12. ¿Yagkaxénak kélwáxok 19selmeyásegko axta ko'o cinco mil énxet'ák cinco pan? ¿Háxko axta ekwánxa ekwokmo kélxata m'a apkeleymomap axta?

Aptahak axta apkelátegmowágko s'e:

—Doce axta wokmok.

20—¿Háxko axta anhan ekwánxa kélxata apkeleymomap pan, cham'a selméságko axta ko'o cuatro mil énxet'ák siete pan?

Aptahak axta apkelátegmowágko s'e:

—Siete axta wokmok.

21Keñe axta aptaha apkeláneya Jesús se'e:

—¿Yagkólya'ásegkok makham kéxegke?

Jesús aptakmelcheseyam xama énxet meyke apakta'ák tegma Betsaida

22Apkelwokmek axta tegma Betsaida, kélyentegkesek axta Jesús xama énxet meyke apakta'ák, kéltamhok axta anhan epaknegwomho'. 23Apmeyk axta apmek Jesús ma'a énxet meyke apakta'ák nak. Meykexa tegma axta apya'ásak. Apyamánog axta apkeltexnasásegkok apakta'ák, apnegkenchek axta apmék apyetseksek, keñe axta apkelmaxneyeyncha'a apkeltamho ey'asagkohok apwet'a kexaha aksok. 24Chénawók axta apweteykekxaxma m'a énxet meyke apakta'ák axta. Aptahak axta s'e:

—Ekwet'ak ko'o énxet'ák. Máxa eyke aptamhágkok yenta'a, kelxegkek eyke cha'a.

25Apkelpaknegkesakmok axta makham apakta'ák Jesús xa énxet nak, aptakmelchásók axta apkelyaheyncha'a, aptakmelwokmok axta anhan. Takmelákxók axta apweteykekxaxma. 26Keñe axta apcháphasa apxagkok Jesús xa énxet nak. Aptahak axta apcháneya s'e:

—Ná emyekxa aksa apyawakxa tegma.

Pedro apxeyenma Jesús aptaha Mesías

(Mt 16.13-20; Lc 9.18-21)

27Apxegkek axta Jesús yetlo apkeltámeséyak apmahágko nátegma, nepyáwa tegma apwányam Cesarea de Filipo. Náxet ámay axta aptahak apkelmaxneyeyncha'a Jesús apkeltámeséyak se'e:

—¿Háxko aptémakxa énxet sexeyenma ko'o?

28Aptahak axta apkelátegmowágko s'e:

—Nápakha énxet'ák cha'a aptahak apxéna exchep Juan el Bautista, keñe nápakha énxet apxéna exchep aptaha Elías, keñe nahan nápakha énxet aptaha apxéna exchep pók Dios appeywa aplegaso.#Mr 6.14-15; Lc 9.7-8.

29—¿Háxko eyke kéltémakxa sexeyenma ko'o kéxegke? —axta aptahak apkelmaxneyeyncha'a.

Aptahak axta apchátegmowágko Pedro s'e:

—Xép aptaha Mesías.#Jn 6.68-69.

30Wánxa agkok, apkeltamhok axta Jesús mexének apkeltámeséyak aptaha Mesías.

Jesús apxeyenma yakwayam yetsapok

(Mt 16.21-28; Lc 9.22-27)

31Apkeltennáseyha axta Jesús apkeltámeséyak peya eñegkohok agko' ma'a aptaha nak Apketche énxet, tén han peya etaknók ma'a apkelámha apmonye'e nak kélakneykekxexa, tén han ma'a apkelámha apmonye'e nak appasmo apkelmaxnéseso Dios énxet'ák apagkok, tén han ma'a énxet'ák apkelxekmóso nak apnámokkok ektémakxa segánamakxa. Apkeltennásek axta anhan peya yakhek xa énxet'ák nak, apxénchek axta eyke peya exátekhágwók antanxo ekhem. 32Aptakmelchásók axta apkeltennaso xa. Keñe axta Pedro apyentama Jesús mók nekha, appakhetchesekmek axta anhan. 33Appeynchakpok axta Jesús apkelano apkeltámeséyak, aptahak axta appakhetchesa Pedro s'e:

—¡Kamhok mók nekha Satanás! Meteyk xép aksok ekhawo ektémakxa nak apweté Dios, wánxa m'a ektémakxa nak apweté énxet.

34Keñe axta apkelwónencha'a Jesús apkeltámeséyak, tén han ma'a énxet'ák. Aptahak axta apkeláneya s'e:

—Kélmokók agkok kóltehek selxekmóso kélxama kéxegke, kólwateys xa kélmáheyókxa nak kóltehek, kólpátem kélagko' aksok ektegyéso kélagkok, hélyetlogma ko'o.#Mt 10.38; Lc 14.27; Jn 12.24. 35Hakte kéxegke ektahakxa enxoho kélmasma ektémakxa nak kélyennakte, kamassegwók sat; wánxa agkok kéxegke ektahakxa enxoho ekmassegwayam ektémakxa nak kélyennakte eñama ko'o, tén han eñama m'a kéllegaso nak tásek amya'a, kólwetagwók sat kélyennakte.#Mt 10.39; Lc 17.33; Jn 12.25. 36¿Kapasmoya énxet ekmassegwokmo enxoho ektémakxa apyennakte m'a apweté nak ekyókxoho aksok keso náxop? 37Mopwanchek nahan eyánmagkasek énxet xama aksok yakwayam étak apyennakte. 38Agkok exénak énxet aptaha sétleykha ko'o, tén han meltenneyncha'a enxoho amya'a ahagkok nápakta'awo' ma'a énxet'ák apyenseyam nak apkelyetlo Dios, tén han ma'a melya'asáxma nak, mexének sat nahan apwesey aptaha nak Apketche énxet ma'a, cham'a apwakto sat yetlo apcheymákpoho eñama Apyap, tén han yetlo m'a apkelásenneykha apkelpagkanamap nak.

Currently Selected:

SAN MARCOS 8: LEGN

Highlight

Copy

Compare