SAN JUDAS 1
1
Ekxeyenma ewáxok
1Ko'o Judas,#Mt 13.55; Mr 6.3. sektaha nak Jesucristo apkeláneykha, sektaha nak han Santiago apyáxeg, ektáxésesek ko'o weykcha'áhak ma'a énxet'ák apkelásekhayókxa nak Dios Egyap, cham'a ektaha axta anhan apkelwóneykha, cham'a apkeltakmelchesama nak han Jesucristo. 2Kólma kéxegke ekyawe segemleykekxoho eñama nak Dios, tén han ma'a meyke ektahakxa egwáxok nak, tén han ma'a negásekhayo nak.
Enxet'ák apkelxekmóso nak megkamámnaksoho
(2 Pedro 2.1-7)
3Elyáxeg selásekhayo, awanhek axta ko'o sekmamenyého atáxésesek kéxegke yakwayam altennaksek ma'a ektémakxa nak nelwagkásamáxche teyp ekyetna nak kéxegke, tén han se'e ekyetna nak ko'o xa. Ekwet'ak eyke kaxwo' eyéméxko atáxésesek kéxegke, yakwayam enxoho wának kóllenxanmohok kéllané m'a eñama nak magya'áseyam, cham'a kéltemésesama nak xama kélmeyáseyak ektaha nak Dios énxet'ák apagkok, meyke teyp. 4Apkelyexancháseykha keñamak apkelyexamakpoho appáxakwaya kéxegke nápakha énxet apkelmopwána amya'a nak, cham'a ekxeyenma nak eknaktáxésamaxche nano' axta, yakwayam kóllegásesagkohok xa énxet'ák nak. Sagcha'ak apkeltémakxa xa, apmeykha nahan cha'a m'a ektémakxa nak Dios segásekhayo apkeláneykegko m'a apkelyeykhásamákpoho nak apkeltémakxa ekmaso, mexeyenmak nahan cha'a apwesey m'a Jesucristo aptaha nak wánxa xama Wese' egegkok.
5Kélya'ásegkok eykhe kéxegke s'e, emenyék eyke altennásekxohok kéxegke m'a apmasésakmo axta Wese' egegkok énxet'ák apteme axta apkelya'áseyam,#Nm 14.29-30. cham'a natámen apkelántekkeso axta énxet'ák Israel#Ex 12.51. ma'a yókxexma Egipto. 6Apkekhésekmek axta Dios neyseksa ekyaktesóxma aptemésesama apkelmomap megkatnegwayam enéxa m'a apkelásenneykha apkeleñama nak néten, axta apkeleyxchásak ma'a ekhem ekyawe nelyekpelchamáxchexa sat. Aptemésesegkek axta xa hakte apkelyenseykmek axta m'a ektémakxa axta apkelxaweyak apkeltamheykha, apkexakhamchek axta anhan apxanák. 7Hawók axta ektémakxa Sodoma tén han Gomorra, tén han nátegma apheyak axta nepyáwa tegma apwányam apkeltémakxa xa Dios apkelásenneykha apkeleñama axta néten, hakte apkeláneykegkek axta ekmaso nentémakxa mansexta, apchahayók axta elmoma apwáxók ma'a ekmaso nentémakxa enmexma nak negyókxa. Ekeso eñamakxa apkellegágkoho nak neyseksa táxa megkatnegwayam enéxa, keñe ekyetna kélésakxa m'a apyókxoho énxet'ák nak.#Gn 19.1-24.
8Temegkek eykhe ekxeyenma eknaktáxésamaxche xa, aptamheykegkek eyke nahan ekmanyása apkeltémakxa xa énxet'ák nak, eñama apkelyetleykekxa m'a apweté nak aksok ekxekmowásamáxkoho, aptaknagkamchek cha'a m'a apkeltémókxa nak antehek Wese' egegkok, elwanyaha nahan cha'a m'a Dios apkelásenneykha ekha nak apkeleymákpoho. 9Wánxa agkok, axta eyke ewanyeyha Miguel#Dn 10.13,21; 12.1; Ap 12.7. apkenmexa kelyekhama', cham'a apmeyawa axta Moisés#Dt 34.6. aphápak ekmoko kamok, cham'a Miguel aptaha nak apkemha apmonye Dios apchásenneykha apkeñama néten. Wánxa axta aksa aptaha apcháneya s'e: “¡Wese' egegkok sat egkések ekyennakte appeywa enókasha!”#Zac 3.2. 10Asagko' cha'a katnehek apkelxeyenma aksok melya'áseyak xa énxet'ák nak, keñe m'a aksok apkelya'áseykegkoho apancha'awo' nak apmeyncha'a aptemesáseykxo yakwayam kasexnenak, cham'a ektémakxa nak han elya'áseykegkoho aksok nawha'ák neyseksa meyke kélxekmowáseyak.
11Sagkók sat katnehek kéllegasáseykegkoho xa énxet'ák nak, hakte apkelyetleykekxek ma'a aptémakxa axta Caín.#Gn 4.3-9; He 11.4; 1 Jn 3.12. Selyakye apkelmopmenyého nahan keñamak apkelxeganeykmo, ekhawo aptémakxa axta Balaam,#Nm 22.1-35; Ap 2.14. eletsapok sat nahan eñama apkelenmexeykha apnámokkok xa énxet'ák nak,#Nm 16.1-35. ekhawo aptémakxa axta Coré. 12Hegmegkaksohok nahan cha'a negko'o xa énxet'ák nak, cham'a kélanchesákxexa enxoho kéxegke ẽlyáxeg'a apkelásekhamakpoho nak, hakte etawagkok aksa aptéyak, tén han énagkok aksa apyenéyak yetlo meyke elnawagko xama enxoho. Cháxa keláneykha nekkések aptaha nak wánxa apkeltakmelchásamákpekxoho apancha'awo' xa. Máxa anhan ma'a yaphopé meyke ekmámeyel'a, kaswok aksa exchahayam. Máxa anhan ma'a yámet megkeyxnol'a kawakxak ekyexnamakxa, cham'a étsapmo agko' la'a, ekweykmohol'a kepmenák kélpátekkeso. 13Máxa nahan ma'a yegmen elyakyahayam elyawel'a wátsam ekwányam exakhamól'a ekyakmopé apkeltémakxa segmegkasamo xa énxet'ák nak. Máxa anhan ma'a yaw'a apkelyetnakhágwayamla'a apkelxega, kélpagkanchesama nak han yakwayam kólekhésók ma'a ekyaktesamakxa agko' nak exma, megkatnegwayam enéxa.
14Apxeyenmék axta anhan Enoc,#Gn 5.18,21-24. aptaha axta siete Adán aptáwen neptámen xa, cham'a apxeyenma axta amya'a eñama Dios, aptéma axta apxeyenma énxet'ák se'e: “Ekwet'ak axta ko'o Wese' egegkok apxegakmo yetlo apxámokma apagko' apkelásenneykha apkeleñama néten, 15yakwayam etnehek apkelyekpelchémo apyókxoho énxet, tén han yának kóllegásesagkohok ma'a énxet'ák elmasagcha'a nak apkeltémakxa, eñama m'a ekyókxoho aksok ekmaso apkeláneyak axta, tén han eñama m'a ekyókxoho apkelpeywa ekmaso apkelwanyeykha axta Dios, eñama apteme elmasagcha'a apkeltémakxa.” 16Elpakmésmakha cha'a megkalchek apwáxok ekyókxoho aksok xa énxet'ák nak, ekyókxoho aksok nahan cha'a exénmakha, wánxa aksa apmenyék kalpeykesásekxak apwáxók ma'a apkelmopmenyého apancha'awo' nak. Kaleyxkohok nahan cha'a apkelpeywa, katakmelmakha nahan cha'a appeywa elának apnámokkok yakwayam elmaxnak aksok.
Kéleyso énxet'ák melya'áseyam nak
17Elyáxeg selásekhayo, kaxénwakxoho kélwáxok kéxegke aptemésesakxa axta Jesucristo seykha amya'a apagkok, 18aptéma axta apkelanagkama s'e: “Etyapok sat énxet sẽsméso m'a eyágketwokmo sat néxa ekhem, wánxa sat elanagkok ma'a aksok ekmaso apkelyespagkamakxa nak.”#2 Ti 3.1-5; 2 P 3.3. 19Cháxa énxet'ák aptekkesamo nak cha'a nexpanchásamáxche xa; elyetlakxak cha'a m'a apkeltémakxa apancha'awo' nak, mexmak nahan apwáxók Espíritu apkeñama nak Dios.
20Elyáxeg selásekhayo, kóllenxanmoho kéxegke kélyennaktésamo m'a ektémakxa nak ekyetno megkólya'áseyam ekpagkanamaxche. Kólmaxna cha'a yetlo appékesáseyak ma'a Espíritu Santo. 21Kóltakmelches ma'a segásekhayo eñama nak Dios, kólleyx nahan ma'a ekhem yakwánxa nak hegmések ekyennakte egnenyek megkatnegwayam enéxa Wese' egegkok Jesucristo, eñama m'a ektémakxa nak ektakmeleykha apwáxok henlano'.
22Kapyósho cha'a kóllanok ma'a énxet'ák apkelya'áseyam nak. 23Kólhexyawásekxa' nahan neyseksa táxa kólwagkasek teyp ma'a pók énxet'ák nak, kapyósho nahan cha'a kóllanok kélmók, wánxa agkok, kólawho eyke, kawomho nahan kéltaknawáseso m'a apkelnakta ekpeysegkeso nak eñama ekmaso apkeltémakxa.
Ektemegwánxa néxa amya'a ektakmela
24-25Yetneyk apmopwána Dios yakwayam eltakmelchesek kéxegke, yakwayam enxoho megkólpalegme', yakwayam enxoho anhan enaklakxak meyke ekyepetche xama aksok, yetlo ekyawe ekpayheykekxa kélwáxok ma'a aphamakxa nak yetlo apcheymákpoho, cham'a Dios aptaha nak wánxa xama apagko', aptaha nak han segwagkasamo teyp. Apcheymákpoho sat cha'a kóltemésesek Dios, tén han kóltemésesek meyke ekhémo, ekha apmopwána, tén han ekha kélyaheykekxoho, eñama m'a Jesucristo Wese' egegkok, eyeynamókxa m'a nano' axta, ekwokmoho s'e kaxwo' nak, megkamassegwomek nahan cha'a. Katnahagkok sat.
Currently Selected:
SAN JUDAS 1: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
