HEBREOS 8

Jesús apteme apkeláneykekxa m'a axnagkok ekhémo mók nelpakhetchásamáxkoho Dios nak

1Akke nenxénak negko'o ektaha ektakmela agko' se'e; yetneyk negko'o aptaha nak apkemha apmonye appasmo apkelmaxnéseso Dios énxet'ák apagkok, cham'a aphákxo nak ma'a néten ekpayhókxa nak nelya'asamakxa nekha Dios aptaháno.#Sal 110.1. 2Aptemegwákxeyk nahan apkemha apmonye appasmo apkelmaxnéseso Dios énxet'ák apagkok ma'a ektahakxa nak ekpagkanamaxchexa ekmámnaksoho agko', ektaha axta Wese' egegkok Dios apkelané, megkatnaha nak énxet apkelané.

3Apyókxoho apkelámha apmonye'e appasmo nak apkelmaxnéseso Dios énxet'ák apagkok apteme kélyeseykha yakwayam egkések Dios ma'a aksok kélméso nak, tén han egkések ma'a aksok kélnaktóso ektekyawa nak, ékeso eñamakxa eyéméxko nak han Jesucristo keytek aksok apmésakxa Dios. 4Aphegkek agkok Cristo keso náxop, metnehek appasmo apkelmaxnéseso Dios énxet'ák apagkok, hakte apháha makham énxet'ák appasmo nak apkelmaxnéseso Dios énxet'ák apagkok apmésamol'a cha'a Dios aksok kélméso, cham'a eltémókxa nak etnahagkok Moisés segánamakxa apagkok. 5Wánxa agkok, aksok ekyetno néten akke ekyetchesamaxkoho ektémakxa nak apkeláneyak apkeltamheykha xa énxet'ák appasmo nak apkelmaxnéseso Dios énxet'ák apagkok, apheyáseykegkoho eyke. Negya'ásegkok eyke negko'o ektaha apheyáseykegkoho xa énxet'ák nak, hakte xama axta peya elának Moisés tegma appagkanamap, aptahak axta Dios apcháneya s'e: “Etakmelchesho hana apkelányo s'e, exnésho apkelané m'a sektahakxa axta sekxekmóso exchep néten egkexe.”#Ex 25.40. 6Apxakak axta eyke aptamheykha Jesús yakwayam etnehek apkemha apmonye appasmo apkelmaxnéseso Dios énxet'ák apagkok, megkaxnawok ma'a ektémakxa axta apkeltamheykha énxet'ák, cham'a Jesús aptaha nak han apyepetcháseykekxa Dios énxet'ák, eñama m'a ekhémo mók nelpakhetchásamáxkoho Dios ektaha nak apkeláneykekxa Jesús megkaxnawo nak ma'a mók axta, ektaha nak ektekkeso m'a ektakmela appekkeneykekxa axta appeywa Dios.

7Tásek axta agkok ma'a émha amonye ekhémo mók nelpakhetchásamáxkoho axta Dios, chakhók axta kalanaxchekxak mók. 8Wánxa agkok, axta eyke kalchak apwáxok Dios apwet'a aptamhágkaxa énxet'ák. Aptahak axta s'e:

“kawók sat ekhem yakwánxa nak

kaxnágwakxohok mók egwáxok énxet'ák Israel,

tén han ma'a énxet'ák apkeleñama nak Judá.

9Megkaxók sat ma'a ektémakxa axta ekhémo mók

nelpakhetchásamáxkoho apyepmeyk nano'

xa énxet'ák nak,

cham'a sektakmelcháso axta selántekkesa yókxexma Egipto;

éxakkek axta ko'o xa énxet'ák nak,

hakte axta eláneykegkok ma'a

ektémakxa axta ekhémo mók nelpakhetchásamáxkoho

10Sat katnehek seláneso

ekhémo mók nelpakhetchásamáxkoho

énxet'ák Israel se'e,

cham'a natámen sat xa.

Aptahak axta Wese' egegkok apxéna s'e:

apekkenchesek sat ko'o apwáxok

seltémókxa etnahagkok xa énxet'ák nak,

atáxésesek sat nahan apwáxok.

Ko'o sat atnehek Dios apagkok xa énxet'ák nak,

keñe sat etnahagkok énxet'ák ahagkok xa énxet'ák nak.

11Kamaskok sat elxekmósek apnámokkok énxet,

tén han ma'a apkelenyémeyo xamo' nak,

esenhan ma'a apteme apnámokkok nak

yakwayam enxoho elya'asagkohok Wese' egegkok,

hakte apyókxoho énxet sat hey'asagkohok ko'o

ekweykmoho m'a énxet'ák meyke kéláyo nak,

tén han ma'a énxet'ák ekyawe kéláyo nak.

12Mayakmagkásekxék sat ko'o

apkeltémakxa ekmaso xa énxet'ák nak,

megkaxénwakxok agko' sat nahan ewáxok

apkeltémakxa nak melya'asáxma.”#Jer 31.31-34.

13Axta apxénak Dios ektaha ápak ma'a émha amonye axta ekhémo mók nelpakhetchásamáxkoho Dios, cham'a apxéna axta Dios ma'a axnagkok ekhémo mók nelpakhetchásamáxkoho Dios nak. Kaxwo' sat eyke kamassegwók xa ápak nak, ektémol'a kalesók aksok apák.

Currently Selected:

HEBREOS 8: LEGN

Highlight

Copy

Compare