HEBREOS 4
4
1Ekeso eñamakxa, eyéméxko nak negko'o antakmelchesaxkohok neyseksa ekyetno makham negyeseksa m'a sempekkencháseykekxa axta appeywa Dios, cham'a apxeyenma nak yakwánxa hẽllókasesek nelyampé, mopwanchek katnehek etxek enxama. 2Hakte ẽllegasegkek axta nahan negko'oxa xa amya'a ektakmela nak, ekhawo ektémakxa axta kéllagaso xa énxet'ák nak; wánxa agkok chakho' axta eyke kéllegasama amya'a xa énxet'ák nak, hakte axta etnék melya'áseyam nepyeseksa m'a énxet'ák apkelyaheykekxoho axta xa amya'a nak. 3Keñe negko'o nenteme nak magya'áseyam, ólántexek sat ma'a yakwánxa nak hẽllókasesek nelyampé Dios, cham'a apxeyenma axta Dios aptéma appeywa s'e:
“Axta keñamak nahan sekxéna axta ko'o neyseksa seklo
peya melántexek ma'a yakwánxa nak
allókasesek apkelyampé énxet.”#Sal 95.11.
Wánxa agkok, appenchesamók axta eyke aptamheykha Dios apkeláneya keso náxop; 4mók eknaktáxésamaxche nahan entemék ekxénamaxche siete ekhem se'e:
“Apkellókasek axta apyampé Dios
ekwokmo axta siete ekhem.”#Gn 2.2.
5Entemék nahan eknaktáxésamaxche s'e:
“Melántexek sat ma'a yakwánxa nak allókasesek
apkelyampé énxet.”#Sal 95.11.
6Kéméxchek eyke makham elántexek nápakha énxet'ák xa yakwánxa nak hẽllókasesek nelyampé Dios, hakte melántaxnók ma'a énxet'ák apmonye axta kéllegaso tásek amya'a eñama m'a melyaheykekxoho axta. 7Ekeso eñamakxa appekkenákxo nak makham Dios xama ekhem, apkeltéma nak Dios “keso negwánxa nak.” Nano' axta entemék apxeyenma Dios xa, cham'a sẽlpakhetchesa axta eñama m'a ektémakxa axta appeywa David, cham'a ekyetnama nak han eknaktáxésamaxche ekxénamakxo s'e:
“kélleg'ak agkok kaxwo' kéxegke
aptahakxa appeywa Dios,
nágkólyennaktés aksa kélwáxok.”#Sal 95.7-8.
8Josué axta agkok apkellókaseso apkelyampé énxet'ák Israel,#Dt 31.7; Jos 22.4. mexének axta Dios epekkenek mók ekhem yakwayam ellókasesek apkelyampé énxet. 9Yetneyk eyke makham kélpagkancheso yakwayam ellókasek apkelyampé Dios énxet'ák apagkok; 10hakte negko'o ektahakxa enxoho nentaxnegwayam yakwánxa nak hẽllókasesek nelyampé Dios, kamaskok anlának ma'a ekyókxoho ektémakxa nak nentamheykha, ekhawo ektahakxa axta apkellókaso apyampé Dios. 11Kéméxchek cha'a ólwaskápekxohok yakwayam ólántexek xa yakwánxa nak hẽllókasesek nelyampé Dios, yakwayam enxoho méko keytlakxak apkeltémakxa axta m'a énxet'ák apkelya'áseykmo axta.
12Hakte yetneyk ekyennakte Dios appeywa, yetneyk nahan ekmowána, ahamteyk agko' nahan,#Is 49.2; Ef 6.17. yeykhágweykmók ektémakxa ekmahanta m'a sawo ekwenakte ánet nekha ekmahantal'a, ektaxnegweykmohol'a kaño' agko' egwáxok ekweykmoho m'a ekyetnamakxa nak eghagák, kawomhok nahan ma'a kaño' agko' nak apexchakkok énxet; awanchek nahan kay'asagkohok ektémakxa nak elchetamso egwáxok, yáxñakxoho nahan kapekkenekxak ma'a ekmáheyókxa nak kalának egwáxok. 13Yawanchek keyxánegkesek Dios ekyókxoho aksok ektaha axta apkelané, yáxñakxoho nahan katnehek apweté ekyókxoho aksok ma'a Dios, cham'a peya nak óltennásekxohok nentémakxa axta.
Jesús apteme apkemha apmonye apagko' appasmo apkelmaxnéseso Dios énxet'ák apagkok
14Jesús, Dios Apketche, apteme apkemha apmonye apagko' sempasmo sẽlmaxnéseso negko'o, cham'a apmeyeykekxo axta néten. Ekeso eñamakxa eyéméxko nak anlenxanmohok nelwaskápeykekxoho eñama m'a magya'áseyam nenxeyenma nak ekyetna negko'o. 15Hakte apya'ásegkok ektémakxa negyelkamáxkoho m'a apkemha apmonye sempasmo nak sẽlmaxnéseso negko'o, hakte hawók axta ektémakxa ekyekkónma m'a ektémakxa nak segyekkónma negko'o; axta eyke eláneyk mey'asáxma xama enxoho. 16Agágketchesamhok hana aphamakxa m'a Dios segásekhayo nak yetlo megkatnaheykha egwáxok, yakwayam enxoho hegemlekxohok henlanok negko'o, tén han keytlawhok ektakmeleykha apwáxok hempasmok ma'a eyakhókxa enxoho neltamhókxa hempasmok.
Currently Selected:
HEBREOS 4: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
