GÁLATAS 4
4
1Akke ko'o ekmokók axének se'e: apketchetsék agkok makham sakcha'a kélpagkancheso yakwayam exkekxak aksok, exhok ma'a énxet apmomap kéltemesáseykha aksal'a, apagkok eykhe katnehek ma'a ekyókxoho aksok nak. 2Yetneyk eyke énxet ektaha aptakmelcheso xa sakcha'a nak, etakmelchesesek nahan ma'a ekyókxoho aksok apagkok nak, ekwokmoho m'a ekwokmo enxoho ekhem apkeltennasamakxa egkeyásekxak apyap xa. 3Ekhawo sentémakxa nak han negko'o xa; ẽlmomchek axta negko'o aksok ekha nak elmowancha'a eláneykencha'a nak keso náxop, cham'a nentémakxa egketkók axta.#Col 2.8-20. 4Xama axta ekwokmo ekhem, apcháphásek axta Apketche Dios, apteyekmo axta eñama kelán'a ektegkeso, apkelyaheykekxók axta m'a eltémókxa nak antehek Moisés segánamakxa apagkok. 5yakwayam enxoho hẽlhexyawásekxak negko'o neyseksa nenlané m'a eltémókxa nak antehek segánamakxa, yakwayam enxoho nahan hegmések negko'o Dios yakwayam antehek apketchek. 6Apcháphásek axta Dios Apketche Espíritu apagkok kañe' egwáxok negko'o, hakte nentemék negko'o kaxwo' Dios apketchek; etnehek nahan cha'a Espíritu ewónmakha s'e: “¡Táta!” 7Háwe kaxwo' xép énxet apmomap, Dios apketche eyke kaxwo' xép; apmenyék nahan Dios egkések xép ma'a aksok appagkancheso nak yakwayam elmésagkok ma'a ektaha nak apketchek,#Ro 8.15-17. hakte xép apteme Dios apketche.
Pablo ektemesáseykha apwáxok énxet'ák melya'áseyam
8Kelmomchek axta kéxegke aksok ekha elmowancha'a ekheyásamáxkoho nak dios, cham'a megkólya'áseykegkaxa axta Dios. 9¿Háxko katnehek kóltemekxak makham kélyaheykekxoho xa aksok mékoho nak, cham'a aksok elmayóseka ekha nak elmowancha'a, yakwayam katnésásekxak makham kélmomaxche kéxegke, keso kélya'ásegkoho nak kaxwo' Dios, tén han se'e apkelya'ásegkoho nak kaxwo' kéxegke Dios? 10kélpagkanchek cha'a kéxegke mók xama ekhem, tén han pók xama pelten, yakwánxa enxoho kóllának aksok, tén han kélpagkana pók xama apyeyam. 11¡Tamháha ko'o ewáxok katnehek eyakhémo m'a sektamheykha axta ko'o kélnepyeseksa kéxegke!
12Elyáxeg, eltamhok ko'o kóltehek sektémakxa nak ko'o, hakte ekheyásexchekxók axta ko'o kéxegke. Axta heltawáseykegkohok ko'o kéxegke xama enxoho. 13Kélya'ásegkok eyke kéxegke sekxo' seltennáseykencha'a axta kéxegke tásek amya'a,#Hch 16.6. sekháxamáxche axta keñamak seltennáseykencha'a kéxegke. 14Xámásesek axta eykhe kéltahakxa kéxegke m'a sekháxexko axta ko'o, axta eyke heltaknaweyk, axta anhan heltekkásak, wánxa agkok, elápeyha axta ko'o kéxegke ektémol'a agmok takha' Dios apchásenneykha apkeñama néten, máxa axta eltemesásak ko'o Cristo selápencha'a. 15¿Háxko ekmahágkaxa kaxwo' ma'a ektémakxa axta ektakmeleykha kélwáxok? Ewanchek ko'o axének ektakmela kéxegke, kawomhok axta exaha kélleklo kélaktek yakwayam helmések ko'o, cham'a kélewagko enxoho. 16¿Selenmexma enxeykel'a kélaneyk atnahak ko'o kéxegke, eñama m'a seltennaso ekmámnaksoho agko' nak?
17Awanhek kéxegke apkelmopmenyého xa énxet'ák nak, wánxa agkok sagko' eyke m'a ektémakxa nak elchetamso apwáxók. Apmenyék eyke kamaskok sempaxkeyncha'a negko'o kéxegke xa énxet'ák nak, yakwayam enxoho kólámenyéhok kéxegkáxa natámen xa énxet'ák nak. 18Tásek eyke antehek negko'o negmámenyého apyókxoho énxet, wánxa agkok, yetlo ektakmela elchetamso egwáxok akke, tásek megkólwátesemek kélteme kélmámenyého kélnámokkok, háwe ekwánxa agkok so sekha nak ko'o kélnepyeseksa kéxegke. 19Etchek ahancha'awo nak, eklegágkok makham ko'o ekmáske, ektémol'a kañegkohok kelán'a amonye ektegkeso étche, alenxanmohok sat ko'o seklegeykegkoho ekwokmoho kélhágwákxoho kéxegke Cristo.#Ro 8.29; 2 Co 3.18; Flp 3.10. 20¡Emenyék eykhe ko'o axek xamo' kéxegke keso kaxwo' nak yakwayam enxoho agkések sekpeywa ektakmela kéxegke, akke ay'ásegkok yakwánxa atnésesek kéxegke!
Ektémakxa axta Agar tén han Sara
21Heltennés hana kéxegkáxa xama aksok, kéxegke kélmámenyého nak kóltehek kélyaheykekxoho eltémókxa nak antehek segánamakxa ¿Enxoho axta eykel'a kóllegeyk kéxegke ektémakxa nak ekpeywa xa segánamakxa nak? 22Xeyenmék axta segánamakxa apwetaya apkánet apketchek Abraham: xama sakcha'a axta étche m'a kelán'a ektaha axta ekmomaxche#Gn 16.15. keñe axta pók sakcha'a étche m'a kelán'a ektaha axta aptáwa apagko' Abraham, ektaha axta anhan megkamomaxche.#Gn 21.2. 23Apteyekmek axta étche m'a kelán'a ektaha axta ekmomaxche, hawók axta m'a ektémakxal'a etyamok sakcha'a; apteyekmek axta anhan étche m'a kelán'a ektaha axta megkamomaxche, yakwayam enxoho katnehek ma'a ektahakxa axta appekkencháseykekxa appeywa Dios. 24Yetneyk senxekmóso xa ánet nak: cháxa ánet kelán'a nak ekyetchásamáxkoho m'a ánet ekhémo nak mók nelpakhetchásamáxkoho Dios: xama ekhémo mók nelpakhetchásamáxkoho Dios elánexko axta egkexe Sinaí, ekyetchesamaxkoho m'a Agar, ektaha axta egken ma'a énxet yakwayam nak kóltemésesek apmomap. 25Hakte Agar ekyetchesamaxkoho m'a egkexe Sinaí ekyetna nak yókxexma Arabia, ektaha nak han ekyetchesamaxkoho m'a tegma apwányam Jerusalén apyetna nak kaxwo' nak, hakte máxa apmomap aptemék xa tegma apwányam nak, yetlo m'a énxet ektaha nak apheykha m'a. 26Wánxa agkok, háwe eyke apmomap ma'a tegma apwányam Jerusalén apyetna nak néten, negko'o nahan nentaha neleñamakxa xa tegma apwányam nak. 27Hakte temegkek eknaktáxésamaxche s'e:
“kapayhekxa awáxok, kelán'a megkaté étche nak;
kalpáxamha yetlo ekpayheykekxa awáxok xeye' kelán'a
megkay'áseyak nak ektémakxa
ekmáske ekteme nakláwa.
Hakte kelán'a ektaha axta
apyamasma atáwa, exámagkok sat étchek
megkaxók sat ma'a kelán'a apha nak atáwa.”#Is 54.1.
28Elyáxeg, kéxegke kéltaha kélhawo m'a Isaac: kéxegke kéltaha Dios apketchek, cham'a apxeyenma axta anhan katnehek Dios. 29Ekhawo ektémakxa axta nahan apteyékmo m'a sakcha'a ektaha axta apteyam ektémakxal'a etyamok sakcha'a, etaknók axta cha'a m'a sakcha'a apteyam axta eñama Espíritu aptamheykha,#Gn 21.9. cham'a nano' axta, katnohok nahan cha'a so kaxwo' nak. 30¿Háxko eyke ektémakxa eknaktáxésamaxche? Temék ekpeywa s'e: “Kóltekkes kelán'a ekmomaxche tén han ma'a étche, hakte mopwanchek exkohok xamo' kelán'a ekmomaxche étche aksok kélpagkancheso yakwayam kólmések ma'a sakcha'a, ektaha nak étche kelán'a megkamomaxche.”#Gn 21.10. 31Elyáxeg, háwe negko'o étchek ma'a kelán'a ekmomaxche nak, akke negko'o étchek ma'a kelán'a megkamomaxche nak.
Currently Selected:
GÁLATAS 4: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
