GÁLATAS 1
1
Ekxeyenma ewáxok
1Ko'o Pablo sektaha nak seykha amya'a megkatnaha énxet seyápháseykha, tén han megkatnaha énxet selyéseykha, Jesucristo apagko' axta eyke selyéseykha ko'o, tén han ma'a Dios Egyap, aptaha axta apxátekháseyam ma'a Jesús. 2Ektáxésesek ko'o weykcha'áhak apchakneykekxexa nak énxet yókxexma Galacia, yetlo nahan selxegexma'a ẽlyáxeg nentémo xamo' nak magya'áseyam apheyncha'a nak se'e sekhakxa nak. 3Dios Egyap, tén han Jesucristo Wese' egegkok sat etnehek apméso naksa kéxegke m'a ektémakxa nak segemleykekxoho, tén han ma'a meyke ektahakxa egwáxok nak. 4Apmeyáseykpók axta apagko' Jesucristo yakwayam emátog, eñama m'a nentémakxa nak mólya'asáxma,#Mt 20.28; Mr 10.45; 1 Ti 2.6; Tit 2.14. yakwayam hẽlmeyók se'e negwokmo nak eyesagkexa, ekhawo m'a apmopmenyého nak katnehek Dios Egyap. 5¡Apcheymákpoho sat cha'a kóltemésesek Dios! Katnahagkok sat.
Méko mók amya'a segwagkasamo nak teyp
6Etlakkasek ko'o sekwet'a enyahamo kélyensakmo kélyetlo kéxegke Dios, aptaha axta apkelwóneykha kéxegke eñama apkelásekhayo m'a Cristo, tén han kélyetlákxo m'a tásek amya'a mók ektémakxa nak. 7Méko eyke mók tásek amya'a, apyetneyk eyke énxet apketsagkaseso nak elchetamso kélwáxok, apmenyék nahan étnakhásók ma'a ektémakxa nak amya'a ektakmela eñama Cristo. 8Apkeltennáseyha agkok kéxegke énxet tásek amya'a mók ektémakxa nak, megkaxnawo nak ma'a neltennáseykencha'a axta kéxegke, Dios sat eñásesagkohok énxet apteme enxoho xa, megkeyxek sektaha enxoho ko'o xa, esenhan aptaha enxoho m'a Dios apchásenneykha apkeñama nak néten. 9Eltennásek xeyk kéxegke, eltennásekxók eyke makham: apkeltennáseyha agkok kéxegke énxet tásek amya'a mók ektémakxa nak, megkaxnawo nak ma'a kélma nak takha' kéxegke, Dios sat eñásesagkohok énxet apteme enxoho xa.
10Maktámak ko'o m'a ekleklamókxa nak apwáxok antehek énxet, akke etámak ko'o m'a ekleklamókxa nak apwáxok antehek Dios.#1 Ts 2.4. Maktámak ko'o yakwayam katakmelhok sexeyenma énxet'ák. Emenyék agkok ko'o katakmelek sexeyenma énxet, matnehek ko'o Cristo apchásenneykha.
Sekxo' aptéma Pablo seykha amya'a
11Elyáxeg, kólya'ásegwomho kéxegke s'e: megkañamak énxet elchetamso apwáxok ma'a tásek amya'a seltenneykencha'a nak ko'o. 12Háwe axta énxet segkéso xa, háwe axta nahan seltámeso énxet xama enxoho, Jesucristo axta eyke sey'asásegwayam ko'o xa.
13Kéllegayak axta kéxegke amya'a sektémakxa axta ko'o nano', sekyetlama axta m'a ektémakxa nak apkelpeykesamo Dios énxet'ák judíos, kéllegayak axta anhan amya'a sektémakxa axta ko'o sekmenxeneykencha'a yetlo seknaktawáseykegkoho m'a Dios énxet'ák apagkok nak, ekmáheyok axta amasesók.#Hch 8.3; 22.4-5; 26.9-11. 14Ekyeykhágweykmok axta ko'o sekpeywomo xamo' sekyetlama m'a ektémakxa nak apkelpeykesamo Dios énxet'ák judíos, cham'a sektegeykegkoho xamo' axta, hakte ekyennaktésamaxkók axta ko'o sekmasma m'a apkeltémakxa axta elyepmeyk nano',#Hch 22.3. axta kaxnók xa selxegexma'a nak. 15-16Wánxa agkok, Dios axta eyke selyéseykha ko'o amonye sekteyam, ewóneykha axta anhan eñama ekyawe seyásekhayo. Exekmósek axta Apketche,#Hch 9.3-6; 22.6-10; 26.13-18. cham'a ekwokmo axta yakwánxa hexekmósek, yakwayam enxoho ko'o altennaha tásek amya'a nepyeseksa énxet'ák metnaha nak judíos. Axta ay'áyekmok xama énxet enxoho yakwayam heltennasagkohok ektémakxa; 17axta nahan amheykegkok tegma apwányam Jerusalén yakwayam atyánegwomhok ma'a nano' seykha amya'a matnamakxa axta ko'o seykha amya'a. Axta eyke atnahak xa, wánxa agkok ekpekheyásók axta aksa sekmahéyak ma'a yókxexma Arabia, keñe axta sekmeyánto Damasco.
18Apkántanxo apyeyam axta entemék sekmaheykegko nahan ma'a tegma apwányam Jerusalén#Hch 9.26-30. quince ekhem axta ekhakmok ma'a, yakwayam enxoho ótak Pedro. 19Axta eyke alwet'ak nápakha seykha amya'a, Santiago axta aksa ekwet'ak aptaha nak Wese' egegkok apyáxeg. 20Nakso' ektemesásak ko'o ektaha ekmámnaksoho nápakto' Dios se'e sektáxéseso nak.
21Keñe axta sekmeyákxo m'a yókxexma Siria tén han ma'a yókxexma Cilicia. 22Akke heték makham sekyókxoho ko'o m'a Cristo énxet'ák apagkok apheykha nak Judea. 23Wánxa axta aksa apkellegaya ektéma amya'a sekxénamaxko s'e: “Apkeltenneykha tásek amya'a kaxwo' aptemék énxet segmenxeneykencha'a axta, cham'a apmáheyo axta anhan emasesók tásek amya'a nano' axta.” 24Apkeltemésesek axta apcheymákpoho Dios xa énxet'ák nak, ko'o eñamakxa.
Currently Selected:
GÁLATAS 1: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
