2 TESALONICENSES 3
3
Hẽlmaxnéses negko'o
1Elyáxeg, amonye selwateso eltamhok ko'o hẽlmaxnésesek negko'o, yakwayam enxoho kapayheykxak heykxa ekyókxoho yókxexma amya'a eñama nak Wese' egegkok, yakwayam enxoho kamaxchek takha' yetlo kéláyo xa amya'a nak, ekhawo ektahakxa axta kélnepyeseksa kéxegke. 2Hẽlmaxnéses sat nahan yakwayam enxoho hegmeyók negko'o Wese' egegkok nepyeseksa m'a énxet'ák elmasagcha'a nak apkeltémakxa, hakte háwe apyókxoho énxet apteme mey'áseyam Wese' egegkok. 3Wese' egegkok akke apteme mehegyenyaweykha, elwaskakkasek sat nahan kéxegke m'a, elmeyók sat kéxegke neyseksa aksok ekmaso. 4Magya'ásekmok negko'o Wese' egegkok kéllana kéxegke m'a neltamhókxa axta kóltehek, magya'áseykmok nahan peya kóllenxanmohok kéllané kéxegke xa. 5Wese' egegkok sat epasmok kéxegke yakwayam enxoho kóltehek kélásekhamaxkoho ekhawo m'a ektémakxa nak segásekhayo Dios, tén han egkések kéxegke m'a ektémakxa axta apwaskápeykekxoho Cristo neyseksa aplegeykegkoho.
Kéltémo antemeykha
6Elyáxeg, neltennásek negko'o kéxegke yetlo nenxeyenma Jesucristo Wese' egegkok apwesey, neltamho megkólyepetchaha egyáxeg nentémo xamo' magya'áseyam, memáheyo nak etneykha, cham'a meláneya nak han ma'a nentahakxa axta nelxekmóso negko'o kéxegke. 7Hakte kélya'ásegkok kéxegke eyéméxchexa nak kóltehek yakwayam kólyetlók ma'a nentémakxa nak negko'o: axta agheykha aksa negko'o kélnepyeseksa kéxegke meyke nentamheykha, 8axta anhan antókasók aksa kéltéyak meyke negyanmagkaso kélxama enxoho. Wánxa agkok, nenlenxáneykmok axta eyke aksa nentamheykha, neltamheykha axta ekyókxoho ekhem tén han ekyókxoho axta'a, yakwayam enxoho manxamásesek kéltahakxa kéxegke kélxama enxoho.#Hch 18.3; 1 Ts 2.9. 9Nakso' axta eykhe negkegwagko negko'o agának kéxegke hẽlpasmok, wánxa agkok, neltamheykha axta eyke aksa negko'o yakwayam enxoho kólyetlakxak nentémakxa negko'o. 10Antamhohok axta cha'a agának kéxegke negheykencha'a axta kélnepyeseksa s'e: kéxegke ektahakxa enxoho megkólmáheyo kóltemeykha, megkólxakyek sat kélto. 11Nenleg'ak axta negko'o amya'a kélnápakha kéxegke apheykencha'a aksa meyke apkeltamheykha, elya'ammok hek aksa m'a megkapayhawo nak elya'ammok. 12Kéxegke kélteme nak xa ektaha nak, yetlo nenxeyenma Jesucristo Wese' egegkok apwesey negko'o neltamhok kóltakmelcheshok kéltamheykha yakwayam enxoho kólwetak kélto.
13Elyáxeg, nágkalleklágwom aksa kéllané m'a aksok ektakmela nak.#Gá 6.9. 14Agkok elyahákxohok kélxama kéxegke s'e nentahakxa nak nentáxéseso weykcha'áhak, Kólya'asagkoho sekxo' ma'a énxet ektahakxa enxoho melyaheykekxoho, nágkólyepetchaha aksa, keñe sat emegké'. 15Akke nágkólteme aksa kélenmexma, kólmés aksa cha'a kélpeywa ektakmela ekhawo nentémakxal'a anlának egyáxeg nentémo xamo' nak magya'áseyam.
Pablo apkelmaxnéseso aksok eltakmela eleñama Dios énxet'ák
16Wese' egegkok aptaha nak eñamakxa meyke ektahakxa egwáxok sat egkések kéxegke meyke ektahakxa kélwáxok ekyókxoho ekhem, cham'a ekyókxoho ektémakxa nak meyke ektahakxa egwáxok. Wese' egegkok sat exek kélnepyeseksa kélyókxoho kéxegke.
17Ko'o Pablo, ko'o ahagko' sektáxéseso kéxegke s'e ekxeyenma ewáxok nak. Cháxa sektémakxa nak cha'a ataxaksek sekwesey ekyókxoho weykcha'áhak seyáphaso xa ektaha nak, cháxa sektémakxa nak han cha'a sektáxéso xa. 18Jesucristo Wese' egegkok sat etnehek apméso naksa kélyókxoho kéxegke m'a ektémakxa nak segemleykekxoho.
Currently Selected:
2 TESALONICENSES 3: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
