2 SAN JUAN 1
1
Ekmámnaksoho tén han negásekhayo
1Ko'o sektaha nak sémha emonye, apchakneykekxexa énxet'ák ektaha nak Dios apkelyéseykha ektáxesásak ko'o s'e weykcha'áhak nak, cham'a énxet'ák apkeleñama nak xa kélakneykekxexa nak, cham'a ekmámnaksoho nak selásekhayo ko'o; háwe eyke exakko' ko'o selásekhayo kéxegke, akke nahan apkelásekhayok kéxegke m'a apyókxoho énxet'ák apkelyekpelchágwayam nak amya'a ekmámnaksoho. 2Elásekhayók ko'o kéxegke eñama ekyetno egwáxok ma'a amya'a ekmámnaksoho nak, megkamassegwomek sat nahan cha'a ekyetno egwáxok. 3Dios Egyap, tén han Jesucristo aptaha nak Dios Egyap Apketche sat etnehek apméso naksa kéxegke m'a ektémakxa nak segemleykekxoho, tén han ma'a ektémakxa nak ektakmeleykha apwáxok henlano', tén han egkések ma'a meyke ektahakxa egwáxok nak, eñama m'a ektaha nak ekmámnaksoho, tén han eñama m'a segásekhayo nak.
4Awanhek axta ko'o ekpayheykekxa ewáxok sekwet'a apkelánegko nentémakxa ekmámnaksoho#3 Jn 3. nápakha énxet apkeleñama nak xa kélakneykekxexa nak, ekhawo m'a apkeltémókxa axta antehek Dios Egyap. 5Elyáxeg selásekhayo, eltamhok ko'o kaxwo' antehek nelásekhamaxkoho.#Jn 13.34; 15.12,17. Háwe axnagkok nelánemaxchexa antehek se'e sektáxesesa nak kéxegke, cháxa nenxawaya axta sekxo' agko' xa. 6Negásekhayo ekteme m'a nelyaheykekxoho nak ma'a apkeltémókxa nak antehek Dios, cham'a apkeltémókxa nak antehek Dios ma'a nelásekhamaxkoho#Jn 14.15,23-24; 1 Jn 5.3. nak, ekhawo ektémakxa axta kéllegé kéxegke sekxo' agko'.
Enxet'ák sẽlyexancháseykegkohol'a
7Apsawheykekxók énxet'ák apmopwána nak hẽlyexanchesha keso náxop mexeyenmol'a m'a apwaya nak Jesucristo apyetchásamákpoho énxet. Enxet apteme enxoho xa ektaha nak, cháxa apteme énxet apmopwána nak hẽlyexanchesha xa, apteme anhan apkenmexma m'a Cristo.#Mt 7.15; 1 Jn 2.18; 4.1-3. 8Kólleyxmakha cha'a kéxegke yakwayam enxoho megkamassegwomek ma'a kélweté axta ekyakmageykekxa eñama kéltamheykha, yakwayam enxoho kasawhaxkohok kélxawé m'a aksok kélxawé naksa nak.
9Negko'o ektahakxa enxoho negmáheyo agyeykhasagkohok ektémakxa axta sẽlxekmóso Cristo, mantehek negyepetcheyo Dios, keñe m'a énxet ektahakxa enxoho meyenseyam ektémakxa axta nelxekmowásamáxche eñama Cristo, etnehek apyepetcheyo Dios Egyap xa, tén han ma'a Apketche.#1 Jn 2.22-23; 4.15. 10Aptemék agkok meyk'a kéxegke xama énxet mesóko enxoho xa nelxekmowásamáxche eñama nak Cristo, nágkólhésem aksa kélxagkok, nágkólpeykes nahan; 11hakte énxet ektahakxa enxoho appeykeso xa énxet nak, yehekxohok ma'a ektémakxa nak ekmaso aptamheykha.
Ektemegwánxa néxa amya'a
12Xámok aksok yakwayam altennaksek ko'o kéxegke, momenyék eyke atáxésesek weykcha'áhak. Wánxa agkok, emenyék ko'o atyánegwakxohok kéxegke, yakwayam enxoho alpakhetchesaxkoho',#3 Jn 13-14. yakwayam enxoho anhan kayágwomhok agko' ekpayheykekxa egwáxok nentaha enxoho xa.
13Apcháphásesek ekxeyenma apwáxók kéxegke énxet'ák ekhawo nak apchakneykekxexa ektémakxa nak kélakneykekxexa kéxegke, ektaha nak han Dios apkelyéseykha.
Currently Selected:
2 SAN JUAN 1: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
