2 CORINTIOS 12
12
Pablo apwetayo tén han aksok kélxekmósamo
1Yawanchek hempasmok ma'a eyeymáxkoho nak nempeywa anxénaxchekxohok egagko'. Axének sat eyke ko'o aksok sekwetayo nak tén han ma'a aksok selxekmósamo nak eñama Wese' egegkok. 2Ekya'ásegkok ko'o xama énxet apteme nak mey'áseyam Cristo, ekweykmo nak han catorce apyeyam kélyentameykekxa axta m'a ektahakxa nak netno' agko' aphakxa nak ma'a Dios. Apyókxoho axta exaha kélyentamákxa, aphagák esenhan; Dios akke apya'ásegko'. 3Ekya'ásegkok eyke ko'o xa énxet nak (apyókxoho kexaha kélyentameykekxa, aphagák esenhan, may'ásegkok ko'o, Dios akke apya'ásegko') 4kélyentamákxeyk axta m'a néten yókxexma ektakmela nak, axta aplegágwomhok amya'a ekpowásamáxkoho m'a megkólhayo nak epakmétek xama énxet enxoho. 5Ewanchek eykhe ko'o keyxkohok sekpeywa axének énxet ektéma enxoho xa ektaha nak, mówanchek eyke ko'o keyxkohok sekpeywa axénaxchekxohok ahagko' megkañama enxoho m'a ektémakxa nak sekyelkamáxkoho ko'o. 6Emenyék agkok ko'o keyxkohok sekpeywa axénaxchekxohok ahagko', matnehek ko'o seyéháxma sektaha enxoho xa, hakte nakso' katnehek sektahakxa enxoho sekpeywa; akke atnék cha'a ko'o xa ektaha nak, yakwayam enxoho megkaxének apwáxok énxet hexnéshok ma'a maxnawo nak ko'o, esenhan exnéshok sekpeywa m'a matnamakxa nak cha'a ko'o sekpeywa, 7yakwayam enxoho megkayeykhagkók ekxeyenma apwáxok énxet yának atnahak ko'o m'a maxnawo nak ko'o, eñama sexekmóso Dios ma'a aksok ektakmela agko' nak. Ekeso eñamakxa seklegágkoho axta ko'o ektémol'a hegakhek am'ák, máxa axta entahak Satanás ekmeykha ekwa'a setwásegkoho ko'o, yakwayam enxoho megkayeykhagkók ekxeyenma ewáxok ko'o wának atnahak ma'a maxnawo nak. 8Antanxo axta entahak seltémo hemasésesek seklegeykegkoho Wese' egegkok; 9wánxa agkok, aptahak axta aksa seyáneya Wese' egegkok se'e: “Ko'o seyásekhayo akke yetnak xép, wánxa m'a; hakte xekmowáséxkók ko'o sekmowána m'a énxet'ák apkelyelkamákpoho nak.” Emenyék ko'o keyxkohok sekpeywa axének ektémakxa nak sekyelkamáxkoho, yakwayam enxoho keytek ko'o m'a Cristo apmopwána nak. 10Payhekxeyk nahan ko'o xa ewáxok eñama m'a megkeynneykha nak empehek, selwanyeykha, meyke aksok ahagkok, selyakmáseykha, seklegeykegkoho ekyentaxnamo sekha eñama m'a Cristo, hakte ekyelkáxchek agkok cha'a ko'o, cháxa sektaha ko'o sekyennakte xa.
Pablo ektemesáseykha apwáxok apchakneykekxexa énxet tegma apwányam Corinto.
11Ektemegkek axta ko'o máxa seyéháxma, hakte kéxegke axta selyateyeykegkoho atnehek ko'o máxa seyéháxma, kéxegke axta eyke kéméxchek katakmelek sexeyenma ko'o, hakte meheyeykhágweykmohok ko'o m'a seykha amya'a ekha kéláyo nak, ¡énxet mékoho eykhe ko'o! 12Cha'a keñamak ekwetamaxche sektaha ko'o seykha amya'a apmámnaksoho m'a selenmáxexkoho axta seklegeykegkoho, tén han ma'a elánexko axta m'a aksok sempelakkaso nak agweta', tén han ma'a aksok magwetaya nak katnehek, cham'a kélwet'a axta kéxegke. 13Helemlekxoho aksa kélnathawo enxoho sektahakxa sekpeywa, xama aksok aksa megkaxnawok sekteméseso kéxegke m'a sektemésesamakxa nak cha'a m'a mók apchakneykekxexa nak, cham'a maltémo nak cha'a helpasmok kéxegke.
14Ekpenchesek ko'o selaneykekxa sektahakxa yakwayam katnehek antanxo sekteme meyk'a kéxegke, malmaxneyhek sat nahan yakwayam helpasmok kéxegke. Mategyáha ko'o m'a aksok kélagkok ekyetna nak kéxegke, kéxegke eyke elchetámak; hakte kéméxchek cha'a yanchesásekxak selyakye apketchek ma'a énxet'ák ekha nak apketchek, háwe eyke kélketchek yakwayam yanchesásekxak selyakye m'a apyepmeyk. 15Mamyágwakxék sat amha ko'o m'a ekyókxoho aksok ekyetna nak ko'o, kawomhok sat nahan sekyamasma sekyókxoho, yakwayam apasmok kéxegke. ¿Kasextegwóya sat selásekhayo kéxegke m'a ekyágwokmoho enxoho selásekhayo ko'o kéxegke?
16Kaxhok sat eyke mók ekxeyenma kélwáxok kéxegke maltémo axta cha'a helpasmok kéxegke. Nápakha énxet akke apxeyenmak cha'a sekya'áseykegkoho sektemésesamakxa sektemésesama máxa kelhanma elma. 17¿Eknaktawásegkók enxoho axta eykel'a kéxegke seláphasa axta nápakha énxet kélhágkaxa kéxegke? 18Tito axta eltamhok ko'o etnehek meyk'a kéxegke. Eltamhok axta anhan étlók xama egyáxeg. ¿Apnaktawásegkok enxoho axta eykel'a kéxegke Tito? ¿Háweya ekmámnaksoho ekhawo mók negko'o nentémakxa egkánet nak, tén han ekhawo negko'o mók egwáxok?
19Kélaneykek kexaha óltamhok negko'o hẽlemlekxohok kéxegke, mantahak negko'o xa. Wánxa agkok, nentahak negko'o nempeywa m'a nentémakxal'a ampakmétek nápakto' Dios, ekhawo aptamheykegkaxal'a Cristo énxet'ák apagkok. Elyáxeg selásekhayo, yakwayam ólyennaktésesek apteme melya'áseyam énxet akke keñamak nentéma cha'a negko'o ekyókxoho xa. 20Hakte eyekak ko'o alwetágwakxak megkóltaha kéxegke m'a sekmámenyého nak ótak kóltehek kéxegke, eyekak nahan ko'o xa helwetak kéxegke atnehek ko'o m'a megkólamenyého nak helwetak atnehek. Eyekak ko'o keytek kélnepyeseksa kéxegke kélenmexamaxche, kélnatha kélmók, kélló, kélmeyókasamáxkoho kélagko' kéllané aksok, kélxeyenma aksa kélmók, kélwanyeykha kélmók, eyeymáxkoho kélwáxok, tén han megkóltakmelchesamo kéltamheykha. 21Eyekak nahan ko'o hegkések sekmegkakto Wese' egegkok kéxegke eñamakxa, cham'a sektaha sat makham meyk'a kéxegke, hegkések nahan katnehek selekxagweykha eñama megkólwáteseyam kéllané megkólya'asáxma kélnápakha kéxegke, megkólwáteseykmók nahan kéllané kéltémakxa ekmanyása, tén han ma'a ekmaso kéltémakxa megkólmasexta nak, tén han megkólwateseykmo kéllané m'a aksok ekmaso kélyespagkamakxa nak.
Currently Selected:
2 CORINTIOS 12: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
