1 SAN JUAN 3
3
Dios apketchek
1Kóllano hana, awanhek segásekhayo Dios Egyap, ékeso eñamakxa neltamhomaxko nak negko'o Dios apketchek,#Jn 1.12. nentemegkek nahan negko'o Dios apketchek. Ekeso eñamakxa mehẽlyekpelchama nak han negko'o énxet'ák ektaha nak apkeleñamakxa apagko' keso náxop, hakte melyekpelchék ma'a Dios Egyap. 2Elyáxeg selásekhayo, nentemegkek negko'o Dios apketchek. Eykhe agya'ásegkok makham negko'o yakwánxa hentéhek ma'a natámen sat, negya'ásegkok eyke peya anxohok Jesucristo m'a apwakto sat makham, hakte agwetak sat aptémakxa. 3Negyókxoho ekyetnakxa enxoho xa nelhaxanma nak, nentemesásamáxkoho egagko' antehek negáxñeyo, ekhawo m'a ektémakxa nak megkeypetchegweykmoho Jesucristo xama aksok ekmanyása.
4Negyókxoho nenlané nak mólya'asáxma, aksok ekmaso cha'a anlána', hakte mólya'asáxma ekteme ekmaso nentémakxa. 5Kélya'ásegkok eyke kaxwo' kéxegke apwaya axta Jesucristo keso náxop yakwayam emasésak mólya'asáxma,#Jn 1.29. kélya'ásegkok nahan Cristo meláneya mey'asáxma xama enxoho. 6Ekhawo ektémakxa nak han negyókxoho nenlenxáneykmoho nak nenteme negyepetcheyo Cristo, manlanyek mólya'asáxma; keñe m'a énxet'ák ektahakxa enxoho apkeláneyak melya'asáxma, melweték ma'a Cristo, melya'ásegkok nahan. 7Etchek selásekhayo, nágkólho aksa kólyexanchesha xama enxoho: énxet ektahakxa enxoho apkelané ekpéwomo nentémakxa, cháxa aptaha énxet ekpéwomo aptémakxa xa, ekhawo m'a ektémakxa nak appéwomo Cristo; 8keñe m'a énxet ektahakxa enxoho apkelané mólya'asáxma, cháxa kelyekhama' énxet agkok xa, hakte kelyekhama' axta elané amonye mólya'asáxma sekxo' agko'. Axta keñamak apwaya Dios Apketche xa, yakwayam emasésak ektémakxa axta aksok elané kelyekhama'.#He 2.14-15.
9Melanyek cha'a mólya'asáxma énxet apteme nak Dios apketche, hakte keytek ma'a nentémakxa ektaha axta apméso Dios; mopwanchek nahan elának mólya'asáxma, hakte Dios apketche xa. 10Kólya'asagkohok cha'a m'a énxet'ák apteme nak Dios apketchek, kólya'asagkohok nahan cha'a m'a énxet'ák apteme nak kelyekhama' étchek, hakte apyókxoho énxet melané nak nentémakxa ektakmela esenhan ma'a megyásekhayo nak apyáxeg aptémo xamo' nak mey'áseyam, háwe Dios énxet apagkok xa.
Nelásekhamaxkoho
11Keso amya'a kéllegaya axta kéxegke sekxo' agko' se'e: ólásekhaxkohok hana.#Jn 13.34; 15.12. 12Mantehek sat negko'o aptémakxa axta Caín, aptaha axta kelyekhama' énxet agkok, apchakhak axta apyáxeg.#Gn 4.8. ¿Yaksak axta ektéma apchakhama apyáxeg Caín? Axta keñamak ma'a eyesagko axta aksok apkelané Caín, keñe axta apyáxeg apkelana aksok ektakmela.
13Elyáxeg selásekhayo, nágkólchenatches aksa kéxegke aptaknawe enxoho énxet'ák apkeleñamakxa apagko' nak keso náxop. 14Negyeykhayak axta negko'o nétsapma negmoma ekyennakte egnenyek,#Jn 5.24. negya'ásegkok nahan negko'oxa xa, hakte nelásekhayók negko'o ẽlyáxeg'a nentémo xamo' nak magya'áseyam. Kéxegke ektahakxa enxoho megkólásekhayo kélmók, máxa kéletsapma makham kóltehek. 15Negyókxoho ektahakxa enxoho nentaknagko egyáxeg nentémo xamo' nak magya'áseyam, cháxa nentaha negakhé egmók xa, kélya'ásegkok nahan kéxegke énxet'ák ekyetno nak apyógkexma megkeytek ma'a ekyennakte egnenyek megkatnegwayam enéxa nak. 16Negya'ásegkok eyke kaxwo' negko'o ektémakxa m'a ekha nak negásekhayo, hakte apmeyásamákpoho apagko' axta aptemék Jesucristo yakwayam emátog negko'o eñamakxa;#Jn 15.13. ekhawo nahan negko'o xa kéméxchek agmawhok agyenyók negyókxa yakwayam agmátog eñama m'a egyáxeg nentémo xamo' nak magya'áseyam. 17Enxet ekxákma nak aksok apagkok, apwet'ak agkok apyáxeg aptémo xamo' mey'áseyam eyéméxko kólpasmok, wánxa agkok, megkések eyke m'a aksok eyéméxchexa enxoho, megkeytek apwáxok ma'a negásekhayo eñama nak Dios. 18Etchek selásekhayo nak, tásek mantehek wánxa negásekhayo egmók ma'a nempeywa nak, kéméxchek nahan anxekmósek ektakmela nentemésesakxa.
Megkatnaheykha egwáxok nápakto' Dios
19Agya'ásegwók sat negko'o nentaha neleñama Dios aptaha nak apmámnaksoho eñama nenteme xa, nakso' sat nahan katnehek megkatnaheykha egwáxok nápakto' Dios; 20egwáxok agkok keñamak negya'ásegweykekxoho eyesagko nentahakxa, Dios akke apteme apwányam apagko' megkaxnawok ma'a egwáxok, apteme nahan apya'áseykegkoho ekyókxoho aksok. 21Elyáxeg selásekhayo, agkok kaxénwákxohok egwáxok eyesagko nentahakxa, keytek negko'o megkatnaheykha egwáxok nápakto' Dios; 22Dios sat nahan hegmések ekyókxoho aksok nelmaxneyakxa enxoho, hakte nelyaheykekxók negko'o m'a apkeltémókxa nak antehek, nenláneyak nahan ma'a ekleklamókxa nak apwáxok antehek. 23Apkeltamhok negko'o Dios antehek magya'áseyam Jesucristo aptaha nak Dios Apketche, tén han apkepmenyého ólásekhaxkohok negko'o ekhawo m'a apkeltamhókxa axta antehek Dios.#Jn 13.34; 15.12,17. 24Negko'o ektahakxa enxoho nelyaheykekxoho apkeltémókxa nak antehek Dios, negyepetcheyo antehek ma'a Dios, hegyepetkohok nahan negko'o xa Dios. Espíritu nahan keñamak negya'ásegkoho negko'o aptaha segyepetcheyo Dios, cham'a Espíritu aptaha axta segméso Dios.
Currently Selected:
1 SAN JUAN 3: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
