1 CORINTIOS 14
14
Nempakmeyesma mók ektémakxa amya'a magya'áseyakla'a
1Kólenxánem keytek kélnepyeseksa kéxegke kélásekhamaxkoho, kólámenyého nahan egkések kéxegke Dios ma'a negmowána segméso naksal'a eñama Espíritu, ekyagwánxa agkok kólámenyéhok egkések ma'a kélmowána nak kóltennaha amya'a eñama Dios. 2Enxet ektahakxa enxoho appakmeyesma mók ektémakxa amya'a magya'áseyak nak, Dios aksa epakhetchesek, háwe apkelpakhetcheso m'a énxet'ák nak, hakte méko kay'asagkohok aptahakxa enxoho appeywa, exének ma'a aksok ekyexamaxche ektaha nak aptekkeseso Espíritu, méko nahan kay'asagkohok. 3Keñe m'a énxet ektaha nak apkeltenneykha amya'a eñama nak Dios, ewánegkesesek cha'a apteme melya'áseyam apnámokkok, elwaskakkásekxohok nahan cha'a, elpeykesásekxak nahan cha'a apwáxók. 4Enxet ektahakxa enxoho appakmeyesma mók ektémakxa amya'a magya'áseyak nak, apxakko' etnehek apwánegkeso m'a mey'áseyam nak; keñe m'a énxet ektahakxa enxoho apkeltenneykha amya'a eñama nak Dios, ewánegkesesek apteme melya'áseyam ma'a Dios énxet'ák apagkok nak.
5Emenyék ko'o kólpakmétek kélyókxoho kéxegke m'a mók ektémakxa amya'a magya'áseyak nak; wánxa agkok, emenyék eyke ko'o kóltennaha kéxegke amya'a eñama nak Dios, cháxa ektaha nak ektakmela agko' xa, megkaxnawok ma'a nempakmeyesma nak mók ektémakxa amya'a magya'áseyak nak. Tásek eyke nahan xa, akke entemék ma'a apha enxoho énxet apmopwána nak exénekxak ektémakxa xa amya'a nak, yakwayam enxoho ewánegkesesek apteme melya'áseyam Dios énxet'ák apagkok. 6Elyáxeg, megkapasmek kéxegke selpakhetchesa enxoho mók ektémakxa amya'a magya'áseyak nak, cham'a sektaha enxoho meyk'a kéxegke, yakwayam eykhe axének ma'a ektaha nak segméso Dios yakwayam anxének, yakwayam eykhe nahan axének ma'a negya'ásegwayam ektaha nak ekmámnaksoho, yakwayam eykhe nahan altennaksek kéxegke m'a amya'a eñama nak Dios, yakwayam eykhe nahan altennaksek kéxegke m'a mók xama nelxekmowásamáxche nak.
7Kaxtemek axta ekhémo mók elpáwá aksok kélpáwaso nak, cham'a yámámok kélpáwaso nak, tén han ma'a yát'axpog apyawe nak, magwanchek axta agyekpelkohok ektémakxa elpáwá. 8Ekhawo nahan ektémakxa m'a eyesagko enxoho ekpáwá kélakkahaso amonye empakhamaxchel'a, méko kalánekxak ektahakxa yakwayam kampakhaxche. 9Ekhawo ektémakxa nak han kéxegkáxa, agkok kólmáha kélpakmeta enxoho m'a mók ektémakxa amya'a apmopwána nak elya'asagkohok énxet, ¿háxko katnehek ey'asagkohok énxet ektahakxa aksok kélxeyenma kéxegke? Máxa kélpakmeteykha naksa katnehek. 10Nakso' xámok mók ektémakxa amya'a ekyetna keso náxop, ekyókxoho nahan yetnak ektémakxa m'a kélpeywa nak. 11Agkok ay'ásegkok ko'o ektémakxa m'a mók amya'a nak, pók énxet sat heyának énxet ektahakxa enxoho sepakhetcheso ko'o, keñe sat ko'o xa wának pok énxet ma'a énxet ektahakxa enxoho sekpakhetcheso. 12Kólenxánem keytek kéxegke ekxámokma xa kélmowána apméso naksa nak Espíritu, cham'a ekwánegkesesamol'a apteme melya'áseyam Dios énxet'ák apagkok, hakte kélmenyék kéxegke keytek xa kélmowána apméso naksa nak Espíritu.
13Enxama ektaha enxoho ekteyapma aksa mók ektémakxa appeywa magya'áseyak nak, elmaxna Dios yakwayam enxoho egkések apmopwána exénekxohok ektémakxa xa amya'a nak. 14Ektemek agkok ko'o nempeywa nelmaxnagko ektepa enxoho aksa mók ektémakxa sekpeywa magya'áseyak nak, nakso' katnehek ko'o sekteme nempeywa nelmaxnagko ekweykmoho kañók agko' ewáxok, wánxa agkok, megkapasmek eyke m'a ektémakxa nak sekya'ásegwayam ko'o. 15¿Yaksak eyéméxko atnehek ko'o? Kéméxchek ko'o atnehek nempeywa nelmaxnagko ekweykmoho kañók agko' ewáxok, ekweykmoho nahan ma'a ektémakxa nak sekya'ásegwayam. Kéméxchek nahan ko'o anneykmaksek ekweykmoho kañók agko' ewáxok, yetlo nahan ma'a ektémakxa nak sekya'ásegwayam. 16Hakte apkeltemésesek agkok xép apcheymákpoho Dios ekweykmoho kañók agko' apwáxok, apleg'ak agkok nahan ektahakxa appeywa exchep ma'a énxet meyke kélxekmóso nak, mopwanchek ewhánhok apmésa enxoho exchep ekpayheykekxa apwáxok Dios xa énxet nak, hakte mey'asagkek ma'a aptahakxa enxoho exchep appeywa. 17Tásek kexaha eykhe katnehek apméso exchep ekpayheykekxa apwáxok ma'a Dios, wánxa agkok, megkapasmek eyke yakwayam kawánegkesesek apteme mey'áseyam ma'a pók énxet. 18Ekmések ko'o ekxeyenma ewáxok Dios hakte hágkaxwe apakmétek ma'a mók ektémakxa amya'a magya'áseyak nak, keñe kéxegke asextók cha'a kólpakmétek kélyókxoho nak. 19Wánxa agkok, emenyék eyke ko'o amha cinco amya'a sekpeywa ahagko' kélya'áseykegkoho nak, yakwayam alxekmósek enámokkok, kaxnók ma'a sekpakmeta enxoho diez mil mók ektémakxa amya'a magya'áseyak nak.
20Elyáxeg, nágkatne aksa elchetamso kélwáxok kéxegke ektémakxal'a sakcha'a elchetamso awáxok; kólhésaxkoho m'a ektémakxal'a sakcha'a megkalané aksok ekmaso. Kólteme elchetamso kélwáxok ma'a ektémakxal'a elchetamso apwáxok énxet apkelwányam nak. 21Hakte temegkek eknaktáxésamaxche weykcha'áhak se'e: “Pók énxet apkelpakmeyesma sat ko'o alpakhetchesek xa énxet'ák nak, pók énxet'ák sat nahan wásenneykxak yakwayam elpakhetchesek xa. Metnehek sat eyke sektemésesakxa, axta aptahak Wese' egegkok.”#Is 28.11-12. 22Cham'a nempakmeyesma nak mók ektémakxa amya'a magya'áseyak nak, cháxa yakwayam melchenatchesek énxet'ák melya'áseyak Dios xa, háwe eyke m'a énxet'ák apteme nak melya'áseyam Dios, keñe m'a neltenneykha nak amya'a eñama Dios, cháxa yakwayam elyekpelchágwomhok ma'a énxet'ák apteme nak melya'áseyam, háwe eyke m'a énxet'ák metné nak melya'áseyam. 23Apchaknákxeyk agkok énxet kélakneykekxexa kéxegke, apyókxoho agkok apkelpakmétak mók ektémakxa amya'a magya'áseyak nak, aptaxnegwokmek agkok énxet meyke kélxekmóso nak, esenhan ma'a énxet metné nak mey'áseyam Dios, yának sat kalyéháxma kéxegke. 24Kélyókxoho agkok kéltennáha kéxegke m'a amya'a eñama nak Dios, aptaxnegwokmek agkok nahan ma'a énxet metné nak mey'áseyam Dios, esenhan ma'a meyke kélxekmóso nak, kaxénwakxohok sat apwáxok aptémakxa mey'asáxma, apkeláneykekxoho apagko' sat etnehek apwáxok apleg'a enxoho kéltahakxa kélpeywa kélyókxoho kéxegke. 25Keñe sat keytnekxak yáxñakxoho ektémakxa nak aksok ekyetno apwáxok nápakta'awo' énxet'ák, eltekxók sat nahan aptapnák elpeykeshok Dios, ékpelchágwomhok sat nahan eyámnaksoho apha Dios kélnepyeseksa kéxegke xa énxet nak.
Kóltakmelchesho kéllané kélakneykekxa
26¿Yaksak eyéméxko anlának kaxwo'? Elyáxeg, kélaknákxeyk agkok kéxegke, kélnápakha apwanchek elmeneykmaksek negmeneykmaso eñama nak Dios, keñe nahan kélnápakha apwanchek elxekmósek apnámokkok, esenhan eltennaha m'a amya'a ektaha nak apya'asáseykegkoho Dios, esenhan elpakmétek ma'a mók ektémakxa amya'a magya'áseyak nak, keñe nahan nápakha exénekxak ektémakxa xa amya'a nak. Ekyókxoho aksok kéllanakxa enxoho, tásek kóllának yakwayam enxoho kaxhok mók kélyancháseykegkoho kélteme megkólya'áseyam. 27Kélpakmetchek agkok ma'a mók ektémakxa amya'a magya'áseyak nak, tásek kólának elpakmétek apkánet énxet, apkántanxo esenhan meyke teyp, xama sekxo' epakmétek apmonye keñe pók epakmétek axayo'; kélxama nahan apwanchek exénekxohok ektémakxa xa amya'a nak. 28Méko agkok xama énxet kélaknákxexa apmopwána exénekxak ektémakxa xa amya'a nak, tásek megkólhok elpakmétek mók ektémakxa amya'a magya'áseyak nak nápakta'awo' énxet'ák, tásek epakmétek aksa apxakko', Dios aksa etnehek apxegexma. 29Hawók nahan ektémakxa apkelpakmeta enxoho m'a apkellegaso nak Dios appeywa, tásek elpakmétek apkánet, apkántanxo esenhan, keñe nahan nápakha énxet apwanchek ékpelkohok ma'a ektahakxa enxoho aksok apkelxeyenma xa. 30Wánxa agkok, apmések agkok Dios yakwánxa etnehek appeywa pók énxet ektahakxa enxoho apha m'a neyseksa kélakneykekxa, tásek elwataksek appakmeyesma m'a ektaha appakmeyesma apmonye. 31Kéltemék agkok xa, kélxama sat cha'a kélwanchek kólxének amya'a eñama nak Dios, kólyakmagkasaxchek cha'a, cham'a ekpehewakxexa enxoho cha'a yakwayam epakmétek kélxama, yakwayam enxoho kaltámeyagkok kélyókxoho kéxegke, tén han kóltehek kélmayheykegkoho. 32Cham'a kéllegaso nak amya'a eñama Dios, kéméxchek etnehek ma'a énxet apmopwána nak apmeykha xa amya'a nak. 33Hakte Dios apteme eñamakxa meyke ektahakxa egwáxok, háwe eñama Dios ma'a mantakmelchesamo nak ektémakxa negakneykekxexa.
Tásek agyetlakxak apkeltémakxal'a cha'a Dios énxet'ák apagkok. 34Kéméxchek cha'a kalwanmeyagkok kelán'ák kañe' negakneykekxexa, cham'a megkól'awo enxoho kalpakmétek. Kéméxchek katnehek elyaheykekxoho m'a anakteyegka'a, ekhawo eltémókxa nak katnahagkok Dios segánamakxa apagkok. 35Keltamhok agkok nahan kay'asagkohok ektahakxa amya'a, tásek kalmaxneyha anakteyegka'a m'a axanák; hakte megkapayhawok kalpakmétek kelán'ák kañe' kélakneykekxexa.
36Kaxén cha'a kélwáxok megkatnaha ekteyapmakxa kélnepyeseksa kéxegke Dios appeywa, kaxén nahan kélwáxok megkóltaha kélxakcha'awo' kéllegaso kéxegke xa amya'a nak.
37Apkeneykek agkok etnahak kélxama kéxegke Dios appeywa aplegaso, esenhan ma'a apcháneya enxoho kañamak aptekkeseso appeywa m'a Espíritu, ékpelchágwomhok sat ektaha apkeltémókxa antehek Wese' egegkok se'e sektáxésesa nak kéxegke. 38Agkok exénak ektaha nakso' xa, mékpelchehek sat nahan Dios xa énxet nak.
39Elyáxeg selásekhayo, kólteme kélmámenyého kéxegke kóltennaha amya'a eñama nak Dios, kólho nahan elpakmétek kélnámokkok ma'a amya'a mók ektémakxa magya'áseyak nak; 40wánxa agkok, tásek eyke kóltakmelcheshok kéllané xa ekyókxoho nak.
Currently Selected:
1 CORINTIOS 14: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
