1 CORINTIOS 12
12
Nenxawé naksa nelmowancha'a eñama Espíritu Santo
1Elyáxeg, emenyék ko'o kólya'asagkohok kéxegke ektémakxa nak negmowána eleñama nak Espíritu.
2Kélya'ásegkók kéxegke megkóltémakxa axta makham megkólya'áseyam Cristo, kélhayók axta ekmoma kélwáxok kéleykmáseso meyke ekpeywa ektemésesama kélxegányam kéxegke. 3Kaxwo' eyke emenyék kólya'ásegwomhok kéxegke méko kawának katnehek ekpeywa s'e: “¡Etak sat ekmaso Jesús!”, cham'a nempakmeta enxoho eñama Espíritu apmopwána apkeñama nak Dios. Méko nahan kawának katnehek ekpeywa s'e: “¡Jesús apteme Wese'!”, cham'a nempakmeta enxoho aksa meyke Espíritu Santo apmopwána.
4Xámok ektémakxa nenxawé naksa negmowána ekyetna nepyeseksa Dios énxet'ák apagkok, Espíritu eyke aptaha segméso naksa xa negmowána nak. 5Yetneyk nahan megkaxnémo mók ektémakxa nenlané nentamheykha eñama nak Wese' egegkok, Wese' egegkok akke aptaha apkeltémo anlának xa nentamheykha nak. 6Xámok nahan ektémakxa negmowána nak anlának nentamheykha eñama nak Wese' egegkok, Wese' egegkok Dios akke segméso negmowána yakwayam anlának ekyókxoho xa nentamheykha nak. 7Negyókxoho cha'a hegméshok negko'o Dios yakwayam nak agyekpelkohok ektaha nakso' apha egwáxok Espíritu Santo, yakwayam enxoho hempasmok negyókxoho nenteme nak magya'áseyam. 8Espíritu nahan keñamak apxawáya cha'a enxama yakwayam epakmétek yetlo apya'áseykegkoho; keñe nahan pók énxet'ák apkelxawáya yakwayam elpakmétek cha'a yetlo ekyawe apkelya'áseyak. 9Enxama nahan cha'a apxakak apteme mey'áseyam eñama xa Espíritu nak, keñe cha'a pók apxaka apmopwána eltakmelchesók elháxamáxche. 10Enxama nahan cha'a apxakak apmopwána elának aksok sempelakkaso nak agweta', keñe nahan cha'a enxama apxaka apmopwána eltennaha amya'a eñama nak Dios, keñe nahan cha'a enxama apmésa Dios apmopwána ékpelkohok ma'a espíritu apmopwána amya'a nak, keñe nahan ékpelkohok ma'a Espíritu apmámnaksoho nak; enxama nahan cha'a apxakak apmopwána epakmétek mók ektémakxa appeywa magya'áseyak nak; keñe anhan enxama apxaka apmopwána exénekxohok ektémakxa xa amya'a magya'áseyak nak. 11Espíritu eyke apwánxa apagkok aptaha apkelané cha'a ekyókxoho xa eñama m'a apmopwána nak, egkéshok nahan cha'a énxet apmokókxa enxoho egkések.#Ro 12.6-8.
Nenxámokxoho nenteme wánxa xama negyókxa.
12Xámok eykhe ektémakxa ekhéyak nak negyókxa, wánxa eyke xama negyókxa, hawók nahan ma'a Cristo.#Ro 12.4-5; Ef 4.4-16. 13Hawók nahan sentémakxa nak negyókxoho xa, ẽlyakpasásegkek axta yegmen yakwayam antemekxak xama negyókxa eñama apmopwána m'a aptaha nak apwánxa xama Espíritu, megkeyxek ma'a nenteme nak judíos tén han ma'a metnaha nak judíos, tén han ma'a nenteme nak negmomaxche esenhan ma'a magmomaxche nak; negyókxoho axta nenxakak yakwayam exek egwáxok xa Espíritu nak, ektémol'a agyenek ma'a negyamol'a.
14Megkalánamáxchek xama nekha ektémakxa nak negyókxa, wánxa agkok, xámok eyke ektémakxa elánamáxche. 15Temék agkok ekpeywa kélmenek se'e: “Háwe ko'o señama kélyókxa, hakte háwe ko'o kélmek”, megkamassegwomek eyke ekteme eñama kélyókxa ektaha enxoho ekpeywa xa ektaha nak. 16Temék agkok ekpeywa kélheykok se'e: “Háwe ko'o señama kélyókxa, hakte háwe ko'o kélaktek”, megkamassegwomek eyke ekteme eñama kélyókxa ektaha enxoho ekpeywa xa ektaha nak. 17Temék agkok egaktek ekyókxoho negyókxa, magwanchek anlega'. Temék agkok nahan ekyókxoho negyókxa kañe' egheykok nak, magwanchek antekhánek. 18Wánxa agkok, empekkenchesek axta eyke Dios ekyókxoho ektémakxa negyókxa, cham'a ektakmelakxa enxoho apkelano keytek. 19Temegkek agkok wánxa xama nekha negyókxa, méko axta katnehek negyókxa. 20Nakso' eykhe ekxáma ektémakxa ekhéyak nak negyókxa, wánxa eyke xama negyókxa.
21Yawanchek katnehek kának egaktek egmék se'e: “Momenyék xeye'”; Yawanchek nahan katnehek kának empátek egmagkok se'e: “Momenyék ko'o kéxegke”. 22Akke ekyagwánxa agkok kélmámenyého m'a ekyetno nak negyókxa eyánémaxko nak katnahak elyelkamáxkoho; 23keñe m'a ekyetno nak negyókxa ekmasextoho nak ekxéneykha egwáxok, cháxa nentakmelchesamol'a agaklaksohok xa, keñe m'a ekyetno nak negyókxa ekxeyenmol'a egwáxok manxekmóshok, cháxa móltémol'a cha'a kataxkohok xa, 24akke kapayhawok antemésesek ma'a negyókxa neghayól'a cha'a kataxkohok. Apkeláneyak axta Dios ektémakxa nak ekhéyak negyókxa, yakwayam enxoho kaxkak ekyawe kéláyo m'a ekyetno nak negyókxa ekxeyenma nak egwáxok ektaha mékoho. 25yakwayam enxoho megkalenmexaxche xa ekhéyak nak negyókxa, wánxa aksa kaxének cha'a awáxok ma'a mók. 26Legágkok agkok xama ekyetno nak negyókxa, kasawhaxkohok nahan ellegeykegkoho ekyókxoho nak, xakak agkok xama ekyetno negyókxa ekyawe agko' kélapeykha, kasawhaxkohok nahan elpayheykekxa awáxók ekyókxoho nak.
27Kéxegke kélteme kéleñama Cristo apyókxa, kélyókxoho nahan kélteme kéleñama xa Cristo apyókxa nak. 28Apmenyék axta Dios etnehek apkemha apmonye nepyeseksa énxet'ák apagkok ma'a seykha amya'a apwetaya axta Jesús; keñe etnehek aptéteyak ma'a énxet'ák apkelxeyenmo nak amya'a eñama Dios;#Ef 4.11. keñe xa etnehek aptéteyak ma'a énxet apkelxekmóso nak apnámokkok; tén han ma'a énxet apmopwána nak elának aksok sempelakkaso nak agweta', tén han ma'a énxet apmopwána nak eltakmelchesók elháxamáxche, esenhan ma'a énxet appasmo nak apnámokkok, esenhan ma'a apxegkeso nak kélakneykekxexa, esenhan ma'a ekteyapmol'a aksa mók ektémakxa appeywa magya'áseyak nak. 29Háwe apyókxoho énxet apteme seykha amya'a apwetayo nak Cristo, háwe nahan apyókxoho énxet apteme apkellegaso amya'a eñama nak Dios. Háwe nahan apyókxoho énxet apkelxekmóso nak apnámokkok, háwe nahan apyókxoho énxet apmopwána nak elának aksok sempelakkaso nak agweta', 30háwe nahan apyókxoho énxet ekha apkelmopwancha'a eltakmelchesók elháxamáxche, háwe nahan apyókxoho énxet ekteyapmol'a aksa mók ektémakxa appeywa magya'áseyak nak, háwe nahan apyókxoho énxet apmopwána exénekxak ektahakxa xa amya'a magya'áseyak nak. 31Kéméxchek kéxegke kólámenyéhok xa negmowána eltakmela nenxawé naksa nak.
Nelásekhamáxkoho
Alxekmósek sat ko'o kéxegke nentémakxa ektakmela nak.
Currently Selected:
1 CORINTIOS 12: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
