1 CORINTIOS 10
10
Sẽléso ólpeykeshok aksok kéleykmáseso
1Elyáxeg, momenyék ko'o kalwagkamagkok kéxegke apkelxegama axta kóneg yaphopé#Ex 13.21-22. apyókxoho ẽlyepmeyk nano' negko'o, cham'a apkelyeykhákxo axta apyókxoho wátsam ekwányam ekwesey nak ekyexwasé.#Ex 14.22-29. 2Cháxa ektahakxa axta kéltemésesama apkelyetleykekxa Moisés xa eñama m'a kélyakpasáseyak axta yegmen kóneg yaphopé, tén han ma'a neyseksa wátsam ekwányam. 3Apyókxoho axta anhan apteykegkok nento ektaha axta apméso Dios xa énxet'ák nak,#Ex 16.35. 4apyókxoho axta anhan apyeneykegkok yegmen ektaha axta Dios apméso,#Ex 17.6; Nm 20.11. apyeneykegkek axta cha'a yegmen ekteyapma axta meteymog ektaha axta Dios apméso, ekyetlama axta cha'a m'a apkelmahágkaxa enxoho, Cristo axta xa meteymog nak. 5Xegkesamók axta eyke esawhakpohok mepeykesáseykekxa apwáxok Dios xa énxet'ák nak, ékeso eñamakxa ekhágko axta aphopák ma'a yókxexma meykexa énxet.#Nm 14.29-30.
6Temegkek axta ekyókxoho xa, yakwayam enxoho hẽlaksek negko'o, keñe megkatsepek egnenyek ma'a nentémakxa ekmaso nak, ekhawo aptamhágkaxa axta apkelapmenyého aksok ekmaso xa énxet'ák nak.#Nm 11.4. 7Nágkólpeykesho aksa kéxegke aksok kéleykmáseso, ekhawo aptamheykegkaxa axta nápakha xa énxet'ák nak, hakte temegkek axta eknaktáxésamaxche weykcha'áhak se'e: “Apháha axta aptókagko aptéyak énxet'ák, tén han apyenágko m'a apyenéyak nak, keñe axta natámen aptéyak apchaknákxo néten apneywegko yetlo apkeláneyak ekmaso nentémakxa mansexta.”#Ex 32.6. 8Tásek negko'o manlanyek xa ekmaso nak nentémáxa mansexta, ekhawo aptamheykegkaxa axta apkelánekegko mansexta nápakha xa énxet'ák nak. Ekeso eñamakxa apkeletsapa axta veintitrés mil xama ekhem agko'.#Nm 25.1-18. 9Tásek nahan mantehek negko'o negyekkónma Cristo, ekhawo aptamheykegkaxa axta apyekkónma Cristo nápakha xa énxet'ák nak, axta keñamak apkeletsapa eñama eltakxéyak yéwa xa.#Nm 21.5-6. 10Nágkólpakmésmakha nahan kólxének ekmaso m'a Dios, ekhawo aptamheykegkaxa axta apkelpakmeteykencha'a apxeyenma ekmaso Dios nápakha xa énxet'ák nak, ékeso eñamakxa apkennapa axta Dios apchásenneykha aptaha nak tekyawa egyap.#Nm 16.41-49.
11Temegkek axta nahan nepyeseksa ẽlyepmeyk nano' ekyókxoho xa ektéma nak, yakwayam enxoho agya'asagkohok negko'o. Naktáxésamaxchek axta anhan xa, yakwayam enxoho hẽlaksek negko'o nentaha nak negheykha keso ektemegwánxa nak néxa. 12Enxet apkenagko nak keynnák apteme mey'áseyam nápakto' Dios, kéméxchek etakmelchesakpoho', etyamok katnehek. 13Axta kahapweyk kéxegke segyekkónma magmowánal'a ólenmaxaxkohok nenteme nak énxet. Kélwanchek kéxegke megkólya'asók Dios peya megyohok kóllegagkohok kéxegke m'a magmowánal'a ólenmaxaxkoho'. Chahapwa'ak agkok kéxegke xa segyekkónma nak, Dios sat egkések yakwánxa kóltehek kólmalánek kéxegke xa ekyekkónma nak, yakwayam enxoho kólenmaxaxkohok.
14Elyáxeg selásekhayo, ékeso eñamakxa seltamho nak megkólya'ammek kéxegke m'a aksok kéleykmáseso nak. 15Ektahak ko'o selpakhetchesa kéxegke m'a sektémakxal'a alpakhetchesek énxet ekha nak apkelya'áseyak: kéxegke kélagko' kéméxchek kólyekpelkohok xa sektahakxa nak seláneya kéxegke. 16Negmáha agkok negyenágko negko'o m'a egheykok ektakmela magkenatchesol'a negmésa ekxeyenma egwáxok Dios, nempasmeykxeyk negko'o Cristo éma apagkok negyókxoho nentaha enxoho xa. Nentókagkek agkok nahan ma'a pan nentemésesamol'a nápakha'a apketkók, nempasmeykxeyk negko'o negyókxoho Cristo apyókxa, nentaha enxoho xa.#Mt 26.26-28; Mr 14.22-24; Lc 22.19-20. 17Nenxámok eykhe negko'o, negyókxoho eyke nentókagkok negko'o xa xama pan nak. Cháxa keñamak nentamhákxo negko'o wánxa xama xa.
18Kóllano hana aptamheykegkaxa nak énxet'ák Israel; énxet'ák apteykegkoho nak ma'a aksok ekwatnamáxche kélmésol'a Dios, yaknekxohok cha'a epásegwók xa aksok ekwatnamáxche nak nápakto' Dios.#Lv 7.6. 19Akke ko'o axénak aksok kéleykmáseso ektaha ekha ekmowána sektaha sekpeywa xa; maltennásak ko'o ektaha ektakmela agko' ma'a ápetek kélmésol'a kéleykmáseso, keñe megkaxók ma'a mók ápetek nak, hawók mók. 20Akke ekxénak ko'o apmésama cha'a kelyekhama' aksok apkelnapma m'a énxet'ák melya'áseyak nak Dios, megkésók ma'a Dios,#Dt 32.17. momenyék eyke ko'o kólwéhenekxohok kéxegke ektémakxa nak kelyekhama'. 21Megkólwanchek kéxegke kólmaha Wese' egegkok egheykok apagkok elánéxchexa enxoho nempasmo ektakmela, keñe nahan kólmaha m'a egheykok ekméso nak kelyekhama'; megkólwanchek kéxegke kóltaswók kélto kéltemésesakxa enxoho apcheymákpoho Wese' egegkok, keñe nahan kóltaswók kélto m'a kéltemésesakxa enxoho eyeymáxkoho kelyekhama'.#2 Co 6.15-16.
22¿Neltamhok enxeykel'a anlókasek Wese' egegkok?#Ex 20.5; Dt 32.21. ¿Negyeykhágweykmók enxeykel'a ekwánxa apyennakte m'a Wese' egegkok?
Meyke sẽlya'ásekhaxma tén han nelásekhamaxkoho nenteme nak negyetlo Cristo.
23Katnohok cha'a amya'a s'e: “Egwanchek anlának negko'o negmokókxa enxoho anlának.” Nakso' xa. Háwe eyke ekyókxoho aksok ekteme ektakmela.#1 Co 6.12. Egwanchek anlának negko'o negmokókxa enxoho anlának, wánxa agkok háwe eyke ekyókxoho aksok sempasmo segwánegkeseso aksok eleñama nak Dios. 24Nágkólchetam aksa kélxakko' aksok ektakmela yakwayam nak kapasmok kélxakcha'awo', wánxa agkok, kólchetagkas aksok ektakmela m'a kélnámokkok.
25Kóltawák kéxegke ekyókxoho ápetek ekhéyak nak ma'a kélchexeykekxexa nak ápetek, meyke kélmaxneyeykha xama enxoho eñama m'a ektamheykha nak kélwáxok. 26Hakte ekyókxoho aksok ekhéyak nak keso náxop ekteme Wese' egegkok apagkok.#Sal 24.1; 50.12; 89.11.
27Apkeláneyáha agkok kóltaswók kélto apxagkok ma'a énxet metné nak mey'áseyam cristo, kólmawhok nahan kólmahagkok kéxegke, kóltawák aksa m'a ekyókxoho aksok apmésakxa enxoho, meyke kélmaxneyeykha eñama ektamheykha kélwáxok xama enxoho. 28Wánxa agkok, aptemék agkok appeywa xama énxet se'e: “Keso ápetek kélméso axta kéleykmáseso s'e”, nágkóltaw aksa, kólyahakxoho m'a aptahakxa enxoho appeywa énxet, eñama m'a ektemesáseykha nak apwáxok. 29Ekxénak ko'o m'a ektémakxa nak ektamheykha apwáxok pók énxet, akke axénak kéxegke.#1 Co 8.7,12.
Kéméxchek ko'o magwohók kasók ekxeyenma apwáxok pók énxet ektémakxa nak ko'o sekmowána alának sekmokókxa enxoho alána'. 30Ekmések agkok ko'o ekxeyenma ewáxok Dios eñama m'a sekto nak, kéméxchek ko'o magwohók kasók ekxénamaxche m'a aksok, eñamakxa nak sekméso ekpayheykekxa ewáxok Dios. 31Hawók nahan ektémakxa m'a kéltawa enxoho kélto, esenhan kélyena enxoho m'a kélya nak, esenhan ma'a kéllana enxoho mók aksok, kóllána ekyókxoho aksok yakwayam kóltemésesek apcheymákpoho Dios. 32Nágkóllanés aksa mey'asáxma kélyáxeg eñama m'a kéltahakxa enxoho; nágkólxekmósho kéltahakxa énxet'ák judíos, tén han ma'a énxet metnaha nak judíos, nágkólxekmósho nahan kéltahakxa m'a Dios énxet'ák apagkok nak. 33Ko'o nak se'e, elenxanakmek cha'a kalkohok apwáxók apyókxoho énxet'ák ma'a ekyókxoho sektahakxa enxoho, meyke seltémo alának exakko' m'a sekmokókxa enxoho alána', wánxa aksa emenyék alának ma'a yakwayam nak kapasmok apyókxoho énxet, yakwayam enxoho elwagkasakpok teyp.
Currently Selected:
1 CORINTIOS 10: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
