OKuzwa 15
15
Olwembo lwa Musa
1Awo oMusa nʼaBaisirairi ni bembera oMusengwa olwembo lunu bati,
“Nayemberanga oMusengwa,
olwʼokubba awanguliire nakimo ino abalabebe!
Embalaasi nʼabagityamaku
abidyakire omu nyanza.#Kub 15:3
2OMusengwa niiye ampa amaani era niiye olwembo lwange;
niiye andamirye abalabe.
Niiye oKibbumba wange, era nʼamuwuujanga.#Zab 118:14; Isa 12:2
Niiye oKibbumba wa bbaabba era nʼamugulumalyanga.
3OMusengwa niiye omulwani wʼolutalo omuzira,
eriinalye niiye oMusengwa.
4Adyakire omu nyanza ebigaali bya Falaawo nʼamajeege.
Abaisirikale abakugu omu maje ga Falaawo oKibbumba abaitiire omu Nyanza eNtukuliki!
5Olwabi lubamirire,
beinikiire nakimo omu lwabi ngʼeibbaale.
6“Oo Musengwa, okoleserye engaloyo endiiro eyʼamaani amabitiriri,
era nʼotentena omulabewo.
7Omu buwangulibwo obwʼamaani
oyinga abalabebo.
Obusungubwo bumeigera,
ni bubooca ni baya ooti bisubi.
8Ofuwire omwota ogwʼomu nindoyo oku nyanza,
amaizi ni gakola ontuumo.
Amaizi ni gawolomboga geekomeka ooti kitempe.
Amaizi omu lwabi ni geekwata ekibbumba.
9“Omulabewo akobere ati,
‘Njaba kubasenjaaku mmbairyewo.
Njaba okugabula ebyobusuni byabwe,
neetwalire byonabyona ebintaka.
Njaba okukuusayo empiima yange,
era mbajigirice.’
10Neye ofuwire omwotagwo,
enyanza nʼebabbuuna.
Beinikire ni bagoteramu ooti kyoma ekizito
omu maizi agafuuja.
11“Oo Musengwa, omu bakibbumba naani aali ooti niiwe?
Naani aali ooti niiwe;
owʼekitiisya era omutukulye
owentiisya ogubawuuja,
era akola ebyewunyo?
12Wagoloire engaloyo endiiro,
ekyalo ni kimira abalabe baiswe.
13“Omu kisaakyo, okubbembera
abantu aboonunula.
Omu maanigo obatuuca
e gyobba omu kifookyo ekitukulye.
14Amawanga galiwulira era ni gatya,
abʼomu Bufirisuuti entiisya nʼebakwata.
15Abakungu bʼEdomu baliwuninkirira,
nʼabeekubbemberi bʼe Mowaabbu ensisi nʼebakwata;
abatyami bʼomu Kanani ni babbalika olwʼentiisya;
16baliwaamu omwoyo, nʼentiisya nʼebagwaku olwʼobwezyebwo obwʼamaani.
Ni babba nga tibeesagalya ooti mabbaale agali aawo,
paka abantubo Musengwa owebakumba ni babitawo.
Era paka abantubo aboonunwire,
owebabitawo.
17Walibangirya nʼobateeka
oku lusozi olulwo oku lulwo,
ekifo iwe Musengwa ekiwalondere okubbangamu.
EWeema eya Musengwa eyo, Musengwa iwe onanyere egiweeyombekeire.
18Musengwa wafuganga
emirembe nʼemirembe.”
Olwembo lwa Miryamu
19ABaisirairi ni babita omu nyanza nga batambulira wakalu kwitakali. Neye ebigaali bya Falaawo aamo nʼamaje gʼoku mbalaasi, owebaingiire omu nyanza, oMusengwa nʼairyawo amaizi, ni gababbuunaku. 20Awo oMiryamu onaabbi, omwonyoko wʼAlooni, nʼakwata akagoma, abakali bonabona ni bamusengererya nga bakubba obugoma era nga babina. 21OMiryamu nʼayemba olwembo ati,
“Mwembere oMusengwa,
olwʼokubba awangwire.
Adyakire omu nyanza
embalaasi nʼamaje gaaku.”
Amaizi amalulu
22Awo oMusa nʼakubbembera aBaisirairi okuzwa oku Nyanza eNtukuliki, ni batuuka omwidungu lyʼe Suuli. Ni batambula enaku isatu omwidungu, nga tibabonaku maizi. 23Era ni batuuka omu kifo ekibeeta bati, Maala, ni batayezya okunywa amaizi gaayo, olwʼokubba gabbaire malulu. Ekifo ekyo kagira bakyeta Maala.#15:23 Maala. Omu Lwebbulaniya kitegeeza, kirulu. 24Kale abantu ni beezuluguumira oMusa nga bakoba bati, “Twanywa niki?”
25OMusa ni yeegairira oMusengwa, era oMusengwa nʼamulaga ekisaale, oMusa nʼakimuma omu maizi ni gasuuka masa.
E Mala niiyo oMusengwa e giyabaweereire aMateeka agebasengereryanga, era niiyo e giyabagezeseirye okubona ooba nga bamugonderanga. 26Era oKibbumba yakobere ati, “Owemwawulisisyanga eigono lyange nze oMusengwa iye oKibbumba waanywe nʼokwekeenenya, ni mukola ebituuce omumaiso gange, era owemwakwatanga aMateeka gange, ni mugonderanga nʼebiragiro byange byonabyona, tinalibateekaku endwaire eginateekere oku Bamisiri. Ekyo kityo olwʼokubba Ninze oMusengwa abalamya inywe endwaire.”
27Awo ni batuuka omwErimu, awabbaire ensulo gyʼamaizi eikumi na ibiri, nʼebikolo byʼensansa 70, ni bakomeka aawo eweema gyabwe okumpi nʼensulo egyo.
Currently Selected:
OKuzwa 15: GWR
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe BibLe Translators, Inc., All rights reserved.
