HECHOS 12
12
Guhty Jacob, no nu Pedr lidzyguiib
1Leññ gahc dze-wé yahc guzlo ptzoo ṟeiy-Herody mdad ctzoo csahc yâme lahd meññ-idoo. 2Günahzy yâme Jacob, behtzy Juaṉ, no ptzoo Herody mdad biꞌdy yâme leeme no spad. 3Bwieꞌ Herody biuꞌladzy meññ-Isṟael ni guhty Jacob. Were ptzoo me mdad günahzy yâme Pedr zegahc leññ dze-lni, dze-rahgü meññ-Isṟael paṉ ni nehx rahp levadur. 4Ptzoo me mdad güyuꞌ Pedr lidzyguiib, no luxu psaꞌn me tahp cuib soldad ni gayahp. Tahp gá soldad guhc to cuib. Ganii leññ ihqy Herody gboo me Pedr tedyz lni lehdy tziyno me lee lo meññ-guiedzy. 5No leewe, güyuꞌ Pedr lidzyguiib, per meññ-idoo nehx rsandzie ganab lo Dioz por leeme.
Güloo Dioz Pedr lidzyguiib
6Nash Pedr leññ lidzyguiib guial-caḻ, no ba tzusy byniꞌ gboo Herody leeme lehdy tza me lo meññ-guiedzy. Nishcahsy me glaꞌy chohp soldad, no nliiby me chohp caden, no zrieñ soldad gayahp ruꞌ lidzyguiib. 7Tohzydzi bydzihñ to x‑ángel Dioz, lé güyuꞌ byniꞌ leññ lidzyguiib. Güdihñ ña me coo leññ Pedr lehdy psiuꞌ me lo, no ra me lee:
―Biahs laaḻiꞌ.
No lo hor-wé gahc xgann caden ni nliiby ña Pedr byxacu. 8No ra ángel leeme:
―Bihtz shabiꞌ no pquee xguidguialiꞌ nieꞌy.
Byluxz pquee xguidguial me nieꞌ me, ra ángel leeme:
―Bihtz shab-ruhtziꞌ xtziguia no náḻiꞌ naa.
9Were byruu Pedr, náḻ leeme. Per nehx rlíladzy me bâḻ ni uli ni gatzoo ángel. Nlâdzyx me ganii xcaaḻ me we. 10Güdedy yâme ru gayahp to cuib soldad, no gyzac güdedy yâme ni rrohp cuib soldad ni gayahp. No ru bydzihñ yâme ruꞌ to puert-guiib ni rruu ñaz-lo call, byxal gahcu xgannu, no byruu yâme. Güdedyr yâme to call, no wé byrusytzu ángel, psaꞌn me nunzy Pedr. 11No were bihd xguîlriehñ Pedr, ne me:
―Nirieꞌ ni ulix‑e leeu. Dioz pshahl x‑ángel me güloo naa lidzyguiib lehdy gylaan de lo ña Herody no de gyre ni nadz ni racladzy meññ-Isṟael ntzoo naa.
12Mod-wé ganii leññ ihqy me, za me xiryuꞌ Maríe xmam Juaṉ, ni ra yâme lee Marcü, ru dxie xtahl xmeññ Crist ganab lo Dioz. 13Hor-bydzihñ Pedr li Maríe, gülagü me chehsh puert. Were byruu to ndzabxtohby ni le Rode, za zigüieꞌ dxu we leeme. 14Ru bzaclo me xriedz Pedr‑e naꞌ, di nshal me puert porni modni gaxihly me. Gubyguiat-güxuunn me sto, bigyne me meññ-dxie leññ yuꞌ, ra me leeyâme Pedr‑e zu chehsh puert. 15Per nehx bylíladzy yâme, aaḻ ra yâme leeme:
―¡Zoꞌn nguidz ihqyiꞌ we!
Per leeme gaya me ni uli Pedr‑e leeme. Were ra yâme leeme:
―X‑ángel me we.
16Pedr naꞌ nehx rsaꞌn de ni gabagü me chehsh puert. Ru pshal yâme puert‑e naꞌ, rtzunadz yâme hor-bwieꞌ yâme leeme. 17Were ptzoo me señ güyudzie yâme. Luxu bieno me diidz leeyâme mod-güloo Dioz leeme lidzyguiib. No ra me:
―Gyre ni gayun lo laꞌd, lâ gu leeu lo Jacob no lo zrieñ meññ-rman.
No luxu, byruu me za me zrieñ lad.
18Ni byre guiaal‑e naꞌ, ba di rdzial bia ctzoo soldad yahc, porni dgann yâme bia guhc Pedr, dgueññ me leññ lidzyguiib. 19Were pshahl Herody meññ bigyo yâme Pedr, per nehx bydzial yâme leeme. Bwieꞌ Herody di ndzial yâme Pedr, were psaꞌn meu chehsh soldad yahc ni güdahp ruꞌ lidzyguiib. No ptzoo me mdad guhty gyre soldad-wé yahc. Byluxu, byruu Herody Judea, zia me Cesarea no uga biaꞌn me.
Ni guhty Herody
20Leññ dze-wé yahc zegahc gadziadzyno Herody meññ-Tiro no meññ-Sidóṉ. Were meññ-wé yahc ptzoo yâme diidz gydzihñ yâme lo Herody. Günino yâme to xmeññ me ni le Blasto ni nu lo xtziiñ me. Mpyquie-rieꞌ biuꞌladzy me mod-ra yâme leeme. Leewe gucno me meññ-wé yahc, lehdy di gydziadzynor Herody gyrop ciuda-wé, porni de lo ṟegióṉ ru rtzoo Herody mdad riahd ni rdedydzé yâme. 21Were psieññ Herody leeyâme guiaad yâme to dzé. Ru ba bydzihñ dzé ni guiaad yâme, bihtz shab me ni ruhtz ṟeiy. No luxu, bicchie me ru rbia me de ṟeiy, no guzlo ganii me. 22Were meññ ni gayieññ guzlo rquee yâme riedz, ne yâme:
―¡Dac‑e cuentz meññ mpyquie-rieꞌ! ¡To dioz‑e leeme!
23No hor-caḻ gahc biahd to x‑ángel Dioz ni rtzoo mdad, pshahl to guihdz günahzy leeme, porni bdee me ñahz psahc meññ leeme Dioz. No leewe güyuꞌ mcuch leeme guhty me, no leemaꞌ güdahgü leeme.
24Per xtiidz Dioz to to dzé ma gayann meññ leeu byzaꞌzy.
25Bylux dziiñ ni ptzoo Bernabé no Saul Jerusaléṉ, gubyguiat yâme Antioquía sto, ziyno yâme Juaṉ, ni ra yâme lee Marcü.
Currently Selected:
HECHOS 12: zpg
Highlight
Share
Compare
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
