El Apocalipsis 7

Los 144,000 sellados

1Ngaa guisíj ni̱ guiniꞌīnj niquinꞌ ga̱nꞌanj ángel go̱ꞌngo sicúj xungüi̱ nan. Ni̱ ránj ni ángel rian ga̱nꞌanj nane̱ sisi̱ si̱ gahui ni nane̱ daj rian yoꞌój nga̱ rian nnee yanꞌanj nga̱ rian ni̱ a̱ ꞌngo̱ ni chrun nej. 2Ni̱ hué daj guiniꞌīnj ango ángel ꞌna̱ꞌ rian síj güi. Ni̱ nicaj ángel daj si-sello Yanꞌanj hua ni̱ꞌnaꞌ. Ni̱ gaguáj nucuaj ángel daj rian ango ga̱nꞌanj ángel daj. Ni̱ nicaj ni ga̱nꞌanj ángel daj sun, guiꞌyaj Yanꞌanj sisi̱ chranꞌ yunꞌunj ni ángel daj rian yoꞌój nga̱ rian nnee yanꞌanj nej. 3Ni̱ gataj ángel ꞌna̱ꞌ daj gunun ango ga̱nꞌanj ángel niquinꞌ daj:

―Si̱ chranꞌ yunꞌunj aninꞌ é re̱ꞌ yoꞌój nga̱ rian nnee yanꞌanj nej, rian ni chrun nej mánj. Ga̱ꞌninꞌ ruhua á re̱ꞌ da ga̱ri únj sello yo ni tsínj ꞌyaj sun rian Danꞌanj néꞌ. ―Daj gataj ángel daj.

4Ngaa ni̱ gunūnj número ni tsínj guixíj sello, guiꞌyaj aninꞌ ángel daj. Ni̱ ꞌngo̱ ciento táj hui̱j xia ga̱nꞌanj mí ni sij guixíj sello. Ni̱ hué ni sij huin ni tsínj ꞌna̱ꞌ ni xiꞌninꞌ ni ngüi̱ israelita.

5Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Judá. Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Rubén. Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Gad. 6Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Aser. Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Neftalí. Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Manasés. 7Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Simeón. Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Leví. Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Isacar. 8Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Zabulón. Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj José. Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Benjamín.

La multitud vestida de ropas blancas

9Ngaa guisíj ni̱ guiniꞌīnj ꞌngo̱ xiꞌninꞌ xxi ni ngüi̱ huin ni ngüi̱ ꞌna̱ꞌ daranꞌ rian xungüi̱ nga̱ daranꞌ rian xiꞌninꞌ nej, daranꞌ ni ngüi̱ aꞌmi gaꞌi̱ snánj aꞌmi ni sij nej, daranꞌ rian ni xumanꞌ nej. Ni̱ nico ni̱nꞌ ruhua ni sij huin. Ni̱ a̱ ꞌngo̱ ni tsínj si̱ gunucuaj ga̱ya u̱ndaj ni sij huin. Ni̱ ma̱n ni sij rian niquinꞌ chrun xila sa̱ꞌ nga̱ rian xachij ꞌni̱j. Ni̱ nu̱n ni sij atsij ga̱tsi. Ni̱ nicaj ni sij yun raꞌa ni sij. 10Ni̱ gaguáj nucuaj ni sij. Ni̱ gataj ni sij:

Yanꞌanj nne rian chrun xila sa̱ꞌ huin Danꞌanj néꞌ.

Ni̱ Yanꞌanj nga̱ xachij ꞌni̱j huin si ganacaj néꞌ.

Hué daj gataj ni sij.

11Ni̱ daranꞌ ni ángel niquinꞌ ganica̱j xiꞌníj chrun xila sa̱ꞌ nga̱ ni tsínj huin achij nga̱ aninꞌ ga̱nꞌanj xucu hua ni̱ꞌnaꞌ nej. Ni̱ guiniquinꞌ ráj da̱coj ni ángel daj rian chrun xila sa̱ꞌ daj. Ni̱ daꞌ huin si ganun yo ni ángel daj rian yoꞌój. Ni̱ gaꞌmi sa̱ꞌ ni ángel daj rian Yanꞌanj. 12Ni̱ gataj ni ángel daj:

Amén.

Ga̱ꞌmi sa̱ꞌ néꞌ rian Danꞌanj néꞌ.

Ni̱ ga̱ ꞌueé rian Danꞌanj néꞌ.

Ni̱ ni̱ganj gui̱niꞌi Danꞌanj néꞌ daranꞌanj.

Ni̱ ni̱ganj ga̱taj néꞌ si guruhua Danꞌanj néꞌ.

Ni̱ ni̱ganj gui̱nun yanꞌanj néꞌ rian Danꞌanj néꞌ.

Ni̱ duguꞌna̱j huin sisi̱ gui̱nicaj Danꞌanj néꞌ sun.

Ni̱ duguꞌna̱j huin sisi̱ ni̱ganj gui̱nicaj Danꞌanj néꞌ fuerza.

Amén.

Daj gataj ni ángel daj.

13Ngaa ni̱ nachínj snanꞌanj ꞌngo̱ tsínj huin achij riānj. Ni̱ gataj sij:

―Ni̱ u̱n sin huin ni ngüi̱ nu̱n atsij ga̱tsi nan, ni̱, ni̱ a̱ ꞌna̱ꞌ ni sij, ruhua á re̱ꞌ únj. ―Hué daj gataj ꞌngo̱ tsínj huin achij daj gunūnj.

14Ngaa ni̱ gatā gunun sij:

―Señor, niꞌi manꞌán re̱ꞌ, ruhuāj. ―Gatā gunun sij.

Ngaa ni̱ gataj sij gunūnj:

―Hué ni ngüi̱ nan huin ni ngüi̱ guiranꞌ nico sayun ngaa gahuin sayun nico chruhua xungüi̱. Ni̱ da̱j rúnꞌ nánj néꞌ si-ganꞌ néꞌ sisi̱ na̱huin ga̱tsij, ni̱ hué daj gahuin niman ni sij guiꞌyaj si-tun manꞌan xachij ꞌni̱j. 15Xiꞌí daj ni̱ niquinꞌ ni ngüi̱ daj rian si-chrun xila Yanꞌanj. Ni̱ nun güi ni̱ganꞌ niquinꞌ ni sij chruhua si-nuhui Yanꞌanj ꞌyaj sun ni sij rian Yanꞌanj. Ni̱ ga̱ne Yanꞌanj nga̱ ni sij sisi̱ du̱gumij ni sij. 16Ni̱ si̱ gachin xiꞌna̱ riqui ni sij ga̱ mánj. Ni̱ si̱ nagoꞌoj ni sij nnee ga̱ mánj. Ni̱ si̱ gurunun nnán rian ni sij, gui̱ꞌyaj güi. Ni̱ si̱ chranꞌ yunꞌunj gachiꞌ ni sij ga̱ mánj. 17Daj si du̱gumi xachij ꞌni̱j nne da̱ni rian chrun xila sa̱ꞌ ni sij. Ni̱ na̱caj síꞌ ni sij ga̱nꞌanj di̱gyán síꞌ rian ahui nnee sa̱ꞌ huin nnee ꞌyaj si ga̱ne ni̱ganj ni sij. Ni̱ na̱ruꞌui Yanꞌanj rian daranꞌ ni ngüi̱ aco. ―Daj gataj tsínj huin achij daj gunūnj.

Currently Selected:

El Apocalipsis 7: trqNT

Highlight

Copy

Compare